काठमाडौं– भुटानी शरणार्थी बनाएर अमेरिका पठाइदिने भन्दै भएको ठगी प्रकरणमा संलग्नहरुलाई कानुनी दायरमा ल्याउन माग गर्दै बृहत् नागरिक आन्दोलनले ‘नागरिक प्रदर्शन’ गर्ने भएको छ। अभियानले बुधबार दिउँसो ३ बजे, भद्रकालीमा विरोध प्रदर्शन गरिने जनाएको छ।
भुटानी शरणार्थी बनाएर अमेरिका पठाइदिने भन्दै रकम असुलीमा संलग्न पूर्वमन्त्री, नेता तथा तिनका परिवारका सदस्य र कर्मचारीलाई संरक्षण गर्न दलका नेतृत्वबाट ढाकछोप भइरहेको भन्दै बृहत् नागरिक आन्दोलनले गम्भीर आपत्ति जनाएको छ।
‘नेपालीलाई भुटानी शरणार्थी बनाउँदै ठग्नु र मानव तस्करी गर्नु संगठित अपराध हो, जसले नेपालको राजनीतिक र प्रशासनिक नेतृत्वको मिलेमतोमा भइरहेको आपराधिक क्रियाकलापलाई उजागर गरेको छ,’ बृहत् नागरिक आन्दोलनका तर्फबाट जारी वक्तव्यमा भनिएको छ, ‘यस्तो गम्भीर संगठित अपराधको अनुसन्धानलाई दलीय पहुँच र राजनीतिक हस्तक्षेपका आधारमा प्रभावहीन बनाउनु र दोषीलाई संरक्षण गरी उन्मुक्ति दिनु दण्डहीनताको प्रोत्साहन र कानुनी शासनको बदख्वाइँ हो।’
देशको अर्थतन्त्रलाई धराशायी बनाउने र अन्तर्राष्ट्रिय स्तरमै नेपालको छवि धूमिल बनाउने जघन्य अपराधमा संलग्न रहेकामाथि कानुनी कारबाही अगाडि बढाउन आन्दोलनले जोडदार माग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790409093.jpg)
-1786602170.png)
