काठमाडौं– नेकपा एमालेका सचिव तथा प्रतिनिधि सभा सदस्य टोपबहादुर रायमाझीले भुटानी शरणार्थी बनाएर अमेरिका पठाइदिने भन्दै भएको ठगी प्रकरणको अनुसन्धानमा ‘सहयोग गर्न’ आफैं उपस्थित हुने भन्दै प्रहरीलाई फोन गरेका छन्।
बुधबार पक्राउ पूर्जी जारी भएपछि रायमाझी सम्पर्कविहीन भएका थिए। प्रहरीले बुधबारदेखि नै खोजी गरेपनि उनले बिहीबार फोन गरेर दिउँसो २ बजे आफैं उपस्थित हुने भनेर जानकारी गराएका हुन्।
‘उहाँ (रायमाझी)ले फोन गरेर दिउँसो २ बजे आफैं पुग्छु भन्नुभएको छ,’ जिल्ला प्रहरी परिसर स्रोतले नेपाल लाइभसँग भन्यो।
बुधबार अर्चाखाँचीको एक कार्यक्रममा विशेष अतिथि बनेर काठमाडौं फर्कने बताएका रायमाझी त्यसपछि सम्पर्कबिहिन भएका थिए ।
यसअघि रायमाझीका छोरा सन्दीपलाई पनि प्रहरीले रुपन्देहीबाटै पक्राउ गरेको थियो। उनलाई काठमाडौं ल्याइसकिएको छ। रायमाझीका बाबु–छोरा पक्राउ पर्नुभन्दा पहिले जिल्ला प्रहरी परिसर काठमाडौंको टोलीले नेपाल सरकारका सचिव तथा हाल उपराष्ट्रपति कार्यलयमा रहेका सचिव टेकनारायण पाण्डेलाई पनि पक्राउ गरेको थियो।
पाण्डे गृहसचिव रहेका बेला यो ठगी गिरोहका नाइकेहरुसँग कनेक्सन देखिएपछि उनीविरुद्ध पक्राउ पूर्जी जारी भएको थियो। यसभन्दा अघि एमाले नेता तथा तत्कालीन गृहमन्त्री रामबहादुर थापा बादलका सुरक्षा सल्लाहाकार इन्द्रजित राई पनि पक्राउ परेका थिए। ललितपुरको ठेचोस्थित घरबाटै राईलाई प्रहरीले पक्राउ गरेको हो।
नेता रायमाझी प्रहरीमा आफैं उपस्थित हुने भएसँगै यो प्रकरणमा अहिलेसम्म पक्राउ पर्नेको संख्या ९ पुगेको छ। रायमाझीका बाबुछोरा, सचिव टेकनारायण पाण्डे, बादलका सुरक्षा सल्लाहाकार इन्द्रजित राई, ललितपुर महानगरपालिका–२३ घर भएकी ५० वर्षीय सानु भण्डारी, मोरङको पथरी शनिश्चरे नगरपालिका–१० घर भएका ४९ वर्षीय केशवप्रसाद दुलाल र पाँचथरको फिदिम नगरपालिका–७ घर भएका ४५ वर्षीय टंककुमार गुरुङ पक्राउ परेका छन्। यस्तै, दाङ घर भएका सन्देश शर्मा, मोरङको पथरी शनिश्चरे नगरपालिका–१० का पूर्ववडाध्यक्ष सागर राई पनि प्रहरीले पक्राउ गरिसकेको छ।
यही प्रकरणमा एमाले नेता रामबहादुर थापाका छोरा प्रतीक थापा र इन्द्रजितका छोरा निरजविरुद्ध पनि पक्राउ पूर्जी जारी भएको छ। उनीहरु भने अहिलेसम्म फरार छन् ।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए।
तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसवापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको खुलेको थियो।
तीमध्ये अधिकांश वास्तविक भुटानी शरणार्थी नभइ नेपाली नागरिक रहेको खुलेको थियो। नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन भने अहिले पक्राउ परेको गिरोहको हातमा पुगेको थियो। उनीहरुले त्यही प्रतिवेदनमा ४४६ जना नेपाली नागरिकको नाम समेट्दै उनीहरुलाई अमेरिका लैजाने भनेर रकम उठाउने गरेको पाइएको छ। यो गिरोहले करिब १ अर्ब रुपैयाँ ठगी गरेको पाइएको प्रहरी अनुसन्धानबाट खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
