दाङमा पनि बढ्दै पशुमा लाग्ने लम्पीस्किन रोगको संक्रमण

कृषि

रासस आइतबार, वैशाख १७, २०८० ०८:३६

दाङ– पशुमा लाग्ने लम्पीस्किन रोगको संक्रमण दाङमा पनि बढ्दै गएको छ। पछिल्लो समय जिल्लाको बङ्गलाचुली, राप्ती, लमही, गढवा, राजपुर, घोराहीका लगायत क्षेत्रका रोगको संक्रमण बढेको जनाइएको छ।

बङ्गलाचुली गाउँपालिकाको वडा नम्बर ४, ५, ६, ७ र ८ मा बढी मात्रामा रोग संक्रमण देखापरेको छ। रोगका कारण बङ्गलाचुली–७ जबरकोटका टीकाराम नेपाली, जुद्धबहादुर नेपाली, वडा नम्बर ८ पाँचपोखरीका तिलकराम घर्तीमगर र गोठीवनका गुमानसिंह घर्तीमगरका पशु चौपाया बिरामी परेका उपचारमा खटिएका बङ्गलाचुली गाउँपालिकाका पशु शाखा प्रमुख गोविन्द नेपालीले जानकारी दिए। उनका अनुसार पालिकाका करिब दुई सय ५० भन्दा बढी पशु चौपाया बिरामी परेका छन्।

रोग लागेमा पशुका शरीरमा खटिरा आउने, खटिराबाट तरल पदार्थ बगिरहने, ज्वरो आउने, खुट्टा सुन्निने तथा लुलो हुने, दूध दिन छाड्ने समस्या हुने गरेको नेपालीले बताए। जिल्लास्थित पशु सेवा विज्ञ केन्द्रसँगको समन्वयमा बिरामी पशुको नमूना सङ्कलन गरी क्षेत्रीय प्रयोगशाला सुर्खेत पठाएकामा त्यहाँबाट लम्पीस्किन पुष्टि भएको विज्ञ केन्द्रका भेटेरेनरी अधिकृत भरत देवकोटाले जानकारी दिए। उनका अनुसार यसको थप अनुसन्धानका लागि नमूना संकलन गरी परीक्षणका लागि काठमाडौं पठाइएको छ।

राप्ती गाउँपालिकाको वडा नम्बर ५, ७, ८ र ९ का विभिन्न बस्तीमा सो रोगले पशु थलिएका छन्। यहाँ ३५० भन्दा बढी गाईगोरु बिरामी परेका पशु सेवा शाखा प्रमुख जीवराज पौडेलले बताए। उनका अनुसार पशु प्राविधिकको टोलीले पालिकाको वडा नम्बर ५ को करङ्गेकोट, थकरीकोट, वडा नम्बर ९ को घोसखोला, देवीकोटलगायत स्थानमा एक साताभन्दा बढी समय लगाएर उपचार गरेको छ। अहिलेसम्म राप्ती गाउँपालिकाको रुपाकोट, घोसखोलालगायत स्थानमा पाँच पशु मरेका उनले जानकारी दिए।

लम्पीस्किनका कारण राजपुर, लमहीलगायत ठाउँमा पनि समस्या बढ्दै गएको छ। ‘पहिले पहाडी क्षेत्रमा समस्या देखियो अब विस्तारै तराईतिर सर्दै गएको छ, पशु सेवा विज्ञ केन्द्र प्रमुख सुदाम भट्टले भने, ‘लम्पीस्किन एक प्रकारको बिफरजस्तै रोग हो। भाइरसका कारण रोग लाग्ने भएकाले उपचार छैन। रोकथामको प्रयास गर्ने हो। सबैभन्दा महत्वपूर्ण कुरा सावधानी अपनाउनु नै हो।’

‘दाङमा प्रयोगशाला छैन, सुर्खेत पठाउनुपर्छ, अहिलेसम्म यसरी नै काम चलेको छ। उता पनि नभ्याउने भएपछि केन्द्रमा पठाउने गरिएको छ। यसले गर्दा पनि उपचारमा समस्या हुने गरेको छ,’ भट्टले भने, ‘यहाँ रोगले ग्रस्त बनाइसकेको हुन्छ, के भएको हो भन्ने थाहा पाउन लामो समय कुर्नु परिरहेको हुन्छ।’

घोराही उपमहानगरपालिका–१९ का पहाडी क्षेत्रमा पनि लम्पीस्किन रोगका कारण किसान समस्यामा परेका छन् भने पशुलाई सास्ती भएको छ। राप्ती गाउँपालिकाको पहाडी क्षेत्रमा देखिएको लम्पीस्किनको सङ्क्रमण वडा नम्बर २, ३ र ४ मा पनि देखापरेको पशु सेवा शाखाले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।