काठमाडौं– होटल संघ नेपालले होटल व्यवसायीका समस्या समाधानका लागि पहल नगरे व्यवसाय बन्द गर्ने चेतावनी दिएको छ। सोमबार ललितपुरमा पत्रकार सम्मेलन गर्दै हानले बिग्रँदो अर्थतन्त्रसँगै मुलुकको होटल क्षेत्र धरासायी बनेको भन्दै व्यवसायीहरुको समस्या समाधानको लागि सरकारले पहल नगरे होटल बन्द गर्ने चेतावनी दिएको हो।
हानले सरकारलाई होटल व्यवसायीहरुका समस्या समाधानको लागि ध्यानाकर्षण गराउँदासमेत समस्या सामाधानको लागि पहल नगरेकाले व्यवसाय बन्द गर्नुपर्ने अवस्था आएको आरोप लगाएको छ।
हानका प्रथम उपाध्यक्ष विनायक साहले बैंक तथा वित्तीय संस्थाहरुबाट होटल व्यवसाय प्रवर्द्धन र विकासका लागि प्रवाह भएका ऋणका साँवा व्याज भुक्तानीमा थेग्नै नसकिने अवस्था आएको बताए।
उनले सरकारका नीति निर्माताहरु, संवद्ध सरकारी निकायलगायत नेपाल राष्ट्र बैंक, बैंक तथा वित्तीय संस्थाहरुमा बढ्दै गएको समस्या समाधानका लागि गरिएको पटक–पटकको बैठक, ज्ञापनपत्र, सुनुवाइ लगायतका प्रयासहरुबाट हालसम्म कुनै वाञ्छित नतिजा नआएको बताए।
पछिल्लो समय चालू खर्चसमेत धान्न नसक्ने गरी होटलहरु घाटामा सञ्चालित रहेको उनको भनाइ छ। उनले राष्ट्रिय वार्षिक बजेटभन्दा बढी परिमाणको लगानी भइसकेको नेपाली होटल क्षेत्रलाई नेपाल सरकारले हालसम्म पनि उद्योग सरहको मान्यतासमेत नदिनु खेदजनक रहेको बताए।
उनले होटल क्षेत्रलाई कठिन आर्थिक चक्रव्यूहबाट बचाउँदै पुनर्जिवन प्रदान गर्न, ऋणको साँवा व्याज भुक्तानीको भाका व्यवहारिक ढंगमा बढाउने लगायत कर्जा पुनर्संरचना, पुनर्तालिकीकरण नितान्त आवश्यक रहेको र बढ्दै गएको ब्याजदर एकल अंकमा झार्न माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
