काठमाडौं- नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले व्यवसायीहरुलाई धेरै निराश नहुन आग्रह गरेका छन्। नेपालगञ्ज उद्योग वाणिज्य संघको २१ वार्षिक साधारण सभामा बोल्दै ढकालले अर्थतन्त्रका धेरै सूचकहरु सुधारोन्मुख रहेको र अहिलेको भन्दा परिस्थिति नबिग्रने बताए।
‘अर्थतन्त्रका धेरै सूचकहरु विस्तारै सकारात्मक हुँदै आएका छन्। हामी व्यवसायीहरु जस्तोसुकै असजिलो आउँदा पनि हडबडाउनु हुँदैन। नैराश्यताले आफैलाई हानि गर्छ,’ उनले भने।
छिमेकी राष्ट्र श्रीलंकाको अर्थतन्त्रमा समस्या देखिएको हुनाले नेपालको नियामक निकाय तथा सरकारको तर्फबाट केही कसिलो नीतिहरू अपनाउँदा नेपालको अर्थतन्त्रमा समस्या देखिएको र व्यवसायीहरू मर्कामा परेको बताउँदै त्यो कुरालाई मध्यनजर गर्दै सरकार तथा नियामक निकायले तुरुन्तै कोर्स करेक्सन गरेकोले अर्थतन्त्रमा बिस्तारै सहज स्थिति आउने उनले बताए।
आफू उपस्थित हुने हरेक कार्यक्रममा बैंकको व्याजसम्बन्धी कुराहरु उठ्ने गरेको बताउँदै उनले कुनै एक बैंक वा वित्तीय संस्थाको सञ्चालकले मात्र व्याजदर परिवर्तन गर्न असम्भव रहेको उल्लेख गरे।
‘म जुन कार्यक्रममा सहभागी हुन्छु, त्यहाँ बैंकको ब्याजदर सम्बन्धी विषयहरु उठ्ने गरेको छ। धेरै साथीहरुले बैंकको सञ्चालक भएकै कारण मैले चाहेको खण्डमा ब्याजदर घटाउन सक्ने र बैंकिङ क्षेत्रमा देखिएको तरलता अभाव समाधान हुने खालको अभिव्यक्तिहरु दिने गर्नुभएको छ। म के कुरा स्पष्ट पार्न चाहन्छु भने यो कुनै एउटा बैंकको सञ्चालक वा लगानीकर्ताले निर्धारण गर्ने वा चाहनाले परिवर्तन गर्ने कुरा होइन,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
