काठमाडौं- नेकपा एकीकृत समाजवादीका अध्यक्ष माधवकुमार नेपालले राजनीतिले कुन कोर्स लिने हो भनेर राष्ट्रपतिको चुनावसम्म थाहा हुने बताएका छन्। पार्टी निकट विद्यार्थी संगठन अनेरास्ववियुको दोस्रो स्थायी कमिटीको दोस्रो पूर्ण बैठकमा सम्बोधन गर्दै उनले राजनीतिमा कुन प्रवृत्ति हाबी हुने भन्ने पनि थाहा हुने बताए।
'सबै पद लिन खोजेर नेपाली राजनीतिमा आफ्नो एकाधिकार चलाउन खोज्ने प्रवृत्ति हाबी हुने हो कि! होइन, त्यस्तो गर्न पाइँदैन, सन्तुलनको राजनीति अपनाएर मात्रै जानुपर्छ भन्ने मान्यता हाबी हुने? त्यसको फैसला महिना दिन भित्रमा सम्भवतः भइसक्छ। त्यसका निम्ति हामी तयार रहौँ', उनले भने।
अध्यक्ष नेपालले राष्ट्रिय स्वतन्त्र पार्टीतर्फ संकेत गर्दै नयाँ घण्टी बजाउँदै आएको पार्टीले पनि पदप्रति आशक्ति देखाएको बताए। 'पहिले त केके न गर्ला भन्ने लागेको थियो। पुरानो पार्टीबाट हुँदैन। नयाँ चाहिन्छ। पुरानाहरुलाई छोडौँ भन्नेहरुले नयाँ ल्याए। घाँडो भए। अदालतले मुद्दा लगायो। पदबाट हटे। त्यही पनि पदका निम्ति आशक्त भएर त्यही पद चाहिन्छ भनेर हैरान पारेपछि त्यो गठबन्धन पनि संकटमा परेको छ', उनले भने।
उनले कुन दिन गठबन्धन भत्किने हो, ठेगान नभएको बताए। गठबन्धनको सरकार भत्किएपछि कांग्रेस र एकीकृत समाजवादीले काँध थाप्ला कि भनेर त्यहाँ चिन्ता सुरु भइसकेको उनको दाबी छ। उनले भने, 'ढोक्सा थाप्ने भनेको त्यही हो। त्यताबाट आएपछि यता यिनीहरुले जोगाउँछन् कि भन्ने छ।'
उनले अहिलेको सत्ता गठबन्धनमा राजतन्त्रलाई फेरि ल्याउन खोज्ने तत्वहरु, संघीयतता विरोधीहरु, संविधान विरोधीहरु र संविधानका रक्षकहरु रहेको बताए।
उनले यसअघिको गठबन्धनमा भने संविधानको पक्षमा उभिने कांग्रेस, गणतन्त्र र परिवर्तनको पक्षमा उभिने वामपन्थीहरु रहेको भन्दै त्यसरी वाम र लोकतान्त्रिकहरुको गठबन्धन स्मरण गरे। 'चुनावपछि नयाँ किसिमको शक्ति सन्तुलन भइदियो। शक्ति सन्तुलन नयाँ भए पनि पुष्पकमल दाहाल प्रचण्डलाई प्रधानमन्त्री दिने कि नदिने भन्ने कुरामा विवाद भयो। कांग्रेसमा सारा पद आफू लिनुपर्छ भन्ने प्रवृत्ति देखियो। यो प्रवृत्तिले गर्दा समस्या पर्यो', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
