काठमाडौं– राष्ट्रपति विद्यादेवी भण्डारीले वर्तमान शासन व्यवस्थाले दशकौंदेखि व्यक्त हुँदै आएको सहिदको सपना र जनताको आकांक्षालाई मूर्त रुप दिन सक्नुपर्ने बताएकी छन्।
प्रजातन्त्र दिवसको पूर्व सन्ध्यामा शनिबार साझ शुभकामना सन्देश जारी गर्दै राष्ट्रपति भण्डारीले भनेकी छन्, ‘वर्तमान शासन व्यवस्थाले दशकौंदेखि व्यक्त हुँदै आएको सहिदको सपना एवं जनताको आकांक्षालाई मूर्त रूप दिन सक्नुपर्दछ।’
उनले यसका लागि सामाजिक न्याय, समानता, सामाजिक सद्भाव तथा आर्थिक समृद्धिलाई राष्ट्रको मूल लक्ष्य बनाउनुपर्नेमा जोड दिएकी छन्। सन्देशमा उनले भनेकी छन्, ‘जनता नै राज्य शक्तिको सम्पूर्ण स्रोत हुन् भन्ने मान्यतामा आधारित रही लोकतान्त्रिक आचरणलाई जीवन पद्धति बनाउन सकेको खण्डमा प्रजातन्त्र दिवसको सार्थकता पुष्टि हुन सक्दछ।’
उनले नेपालको राजनीतिक इतिहासमा फागुन ७ गतेको विशिष्ट महत्त्व रहेको भन्दै विसं. २००७ सालमा सोही दिन जहानिया निरङ्कुश शासनविरूद्ध जनताको संघर्षले विजय हासिल गरेको उल्लेख गरेकी छन्।
उनले भनेकी छन्, ‘जनताको एकतावद्ध सामर्थ्यले जस्तोसुकै निरङ्कुशतालाई पराजित गरी मानवअधिकार तथा राजनैतिक स्वतन्त्रता बहाल गर्न सक्छ भन्ने यथार्थलाई प्रजातन्त्र दिवसले सदैव स्मरण गराउँछ।’
विसं. १९९७ मा प्रजापरिषद्को अगुवाईमा भएको आन्दोलनको क्रममा सहिदहरू गंगालाल श्रेष्ठ‚ धर्मभक्त माथेमा‚ शुक्रराज शास्त्री र दशरथ चन्दको सहादत भएको स्मरण गराउँदै राष्ट्रपति भण्डारीले उक्त बलिदानले वर्तमान समयसम्मका हाम्रा राजनीतिक एवं सामाजिक सुधारका आन्दोलनहरूलाई प्रेरणा दिएको बताएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1764146706.png)
-1779545841.jpg)
