काठमाडौं– नेकपा (एमाले)का अध्यक्ष केपी शर्मा ओलीले स्ववियु निर्वाचनको तयारीमा जुट्न पार्टीनिकट विद्यार्थी संगठन अनेरास्ववियुलाई निर्देशन दिएका छन्।
अनेरास्ववियुको नवनिर्वाचित केन्द्रिय कमिटीलाई शुक्रबार च्यासलस्थित पार्टी केन्द्रिय कार्यालयमा शपथग्रहण गराउने क्रममा उनले तत्काल स्ववियु निर्वाचनको तयारीमा जुटनुपर्ने अवस्था रहेको बताएका हुन्।
स्ववियु निर्वाचन आगामी चैत ५ गते हुँदैछ। सो निर्वाचनका लागि आजैबाट अनेरास्ववियुले काम गर्नुपर्ने अध्यक्ष ओलीको भनाई थियो। उनले स्ववियु निर्वाचनमा टिक्न नसकेकै कारण नेविसंघको जन्म भएको उल्लेख गर्दै उसलाई परास्त गर्नेगरी अन्य संगठनहरुसँगको सहकार्यलाई अघि बढाउन पनि अनेरास्ववियु सफल हुने विश्वास व्यक्त गरे।
‘चैत्र ५ गते स्ववियु निर्वाचन आउँदैछ। नेविसंघ स्ववियु निर्वाचनमा टिक्न नसकेर जन्मेको संगठन हो। फेरि भिड्न आउँदैछ। अब तपाईंहरुले त्यसको तयारी गरिहाल्नु हुनेछ। अहिले तपाईंहरुले स्ववियुको निर्वाचनमा जाँदा अहिले नै एक महिना बाँकी छँदै तयारी गर्नुस्। शालिन र नम्र व्यवहार गर्नुस्’, ओलीले भने।
ओलीले अनेरास्ववियुका नेताहरुलाई अहंकार नलिई काम गर्न पनि आग्रह गरे। अहंकार र दम्भले आफैं सकिने भएकाले अनेरास्ववियुका नेता, कार्यकर्ताहरुले त्यस्ता खालको गतिविधि गर्न नहुने बताए। अनेरास्ववियुको हालै सम्पन्न २३औं राष्ट्रिय महाधिवेशनले समिक बडालको नेतृत्वमा नयाँ केन्द्रीय कमिटी चयन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
