प्रहरीले बरामद गरेको नक्कली मदिरा।
काठमाडौं– यतिबेला काठाडौं उपत्यकामा नक्कलीदेखि म्याद गुज्रेका मदिरा भेटिन थालेका छन्। विदेशी ब्राण्डका मदिराको बोतल प्रयोग गरेर नक्कली मदिरा बनाएर पसलेसँगको मिलोमतोमा बिक्री गर्नेदेखि पसलेले म्याद गुज्रेका मदिरा लुकाएर बिक्री गरेको समेत पाइएको छ।
फागुन ३ गते वाणिज्य आपूर्ति तथा उपभोक्ता संरक्षण विभागबाट खटिएको बजार अनुगमन टोलीले सिनामंगलमा रहेको संस्कार ट्रेडर्स प्रालिको गैह्रीगाउँको गोदाममा भण्डारण गरिएको अवस्थामा म्याद गुज्रेका मदिरा फेला पारेको थियो।
जसमा टुबोर्ग, सानमिगल, गोर्खा प्रिमियम र काल्सबर्ग, नेपाल आइस, बड्वाइजर र गोर्खा ब्राण्डका बियर करिब ३५५ कार्टुन थिए। उक्त बियरको परिमाणात्मक मूल्य करिब १३ लाख ९० हजार रुपैयाँ पर्ने देखिएको छ। विभागले कार्टुन सिलबन्दी गरी कारबाहीको प्रक्रिया अगाडि बढाएको छ।
सोही दिन सिनामंगलकै सिके टे«डिङ प्रालिको गोदाममा भण्डारण गरिरहेको अवस्थामा ३०२ कार्टुन टुबोर्ग, सानमिगेल, गोर्खा प्रिमियम र काल्सबर्ग ब्राण्डका बियर म्याद गुज्रेको अवस्थामा फेला पारेको छ। उक्त परिमाणको बियरको बजारमूल्य करिब ८ लाख ७५ हजार रुपैयाँ पर्ने देखिएको छ। उक्त सिलबन्दी गरिएका २ ओटा गोदामबाट म्याद गुज्रेका बियरको मूल्य करिब २२ लाख ६५ हजार पर्ने देखिएको छ।
गत फागुन २ गते विभागबाट खटिएको बजार अनुगमन टोलीले बजारमा अनुगमन गर्ने क्रममा धुमबाराहिस्थित याक ब्रुअरी कम्पनीका डिलर क्लाइमेक्स ट्रेडिङ प्रालिका ३ ओटा गोदाममा भण्डारण गरी राखेका बाह्रसिङ्गे ब्राण्डका २१ सय कार्टुन बियर म्याद गुज्रेको फेला पारेको थियो। उक्त बियर दुई आकार (६५० मिलि र ३३० मिलि)का बोतलमा थिए। जसको मूल्य करिब ६० लाख रुपैयाँ बराबर पर्ने देखिएको थियो। उक्त डिलर कम्पनीलाई विभागको टोलीले सिलबन्दी गरेको छ। उक्त डिलरमा विशेष गरी भोजभतेर तथा कतिपय रात्रिकालिन व्यवसायमा म्याद गुज्रिएका बियर तथा अल्कोहल पेयपदार्थ कारोबार हुनसक्ने सूचनाका आधारमा विभागको टोली पुगेको थियो।
विदेशी ब्राण्डको बोतलमा नक्कली रक्सी!
गत माघ १३ गते काठमाडौं उपत्यका अपराध अनुसन्धान कार्यालयको प्रहरी टोलीले नक्कली रक्सी उत्पादन गरी बेचेको आरोपमा तीन जनालाई पक्राउ गर्यो।
दोलखाको कालिञ्चोक गाउँपालिका–३ घर भई ललितपुरको कुपण्डोल बस्ने २७ वर्षीय निरज उप्रेती, स्याङ्जा गल्याङ नगरपालिका–९ घर भई काठमाडौं टोखा बस्ने २६ वर्षीया धर्मी गौडेल र सिन्धुली तीनपाटन गाउँपालिका–२ घर भई ललितपुर टिकाथली बस्ने २६ वर्षीय गणेशबहादुर रानामगर पक्राउ परेका थिए।
उपत्यकामा स्वदेशी र विदेशी ब्राण्डका नक्कली तथा गुणस्तरहीन मदिरा उत्पादन गरी कालोबजारी भइरहेको भन्ने सूचनाको आधारमा अपराध अनुसन्धान कार्यालयले ‘अप्रेसन लिमा–२’ चलाएको थियो। त्यसक्रममा उप्रेतीले सञ्चालन गरेको कुपण्डोलस्थित ‘नेक्स्ट टेस्ट लिक्वेयर स्टोर’ नक्कली ‘खुकुरी रम’ बरामद गरेको थियो।
माघ १४ गते अनुसन्धानकै क्रमममा प्रहरीले ललितपुर महालक्ष्मी नगरपालिका–५ टिकाथलीस्थित ‘एस.टी लिक्वेयर स्टोर’मा छापा मार्दा नक्कली खुकुरी रम, रूस्लान भोड्का रक्सी गरेको थियो।
ललितपुर महालक्ष्मी नगरपालिका–५ टिकाथलीस्थित टहरा भाडामा लिइ विनोद कार्की, भगवान बस्नेत, गोपाल पुन मगर, हरि वली, मनोज खत्री, गौरव तामाङ र गोपीकृष्ण श्रेष्ठ समेतले नक्कली मदिरा बनाएर कालोबजारी गर्ने गरेको खुल्यो। भगवान बस्नेतलगायत ५ जनाविरुद्ध गत भदौ ८ मा नक्कली मदिरा उत्पादन तथा बिक्री वितरण गरेबापत ‘कालो बजार तथा केही अन्य सामाजिक अपराध तथा सजाय ऐन’ अन्तर्गत कसुरमा जिल्ला प्रशासन कार्यालय काठमाडौंमा मुद्दा दर्ता भएको थियो। उक्त कसुरमा बस्नेत असोज ४ गते एक लाख रुपैयाँ धरौटीमा छुटेका थिए भने, अन्य चार जना ४०÷४० हजार रुपैयाँ धरौटीमा छुटेका थिए। उनीहरुले नै पुनः नक्कली रक्सी उत्पादन तथा बिक्री वितरण थालेको पाइएको छ।
उनीहरूले स्वदेशी तथा विदेशी ब्राण्डका गुणस्तरहीन नक्कली रक्सीलाई बोतलमा केही मात्रा सक्कली रक्सी हालेर थप रसायन, रंग लगायत हालेर प्याकेजिङ गर्ने गरेको प्रारम्भिक अनुसन्धानमा खुलेको छ।
पुरानो बोतलको प्रयोग गर्दा आन्तरिक राजस्व विभागको स्टिकरहरू पनि पुरानै प्रयोग गरेको देखिन्छ। प्रहरीले गत भदौमा पनि नक्कली रक्सी बरामद गरेको थियो। उक्त नक्कली रक्सी पार्टी प्यालेस, लिक्वयर स्टोरलगायतमा प्रचलित बजार दरभाउ भन्दा कम मूल्यमा बेचबिखन गर्ने गरेको पाइएको छ। नक्कली रक्सी बिक्रीमा रक्सी पसल सञ्चालकको समेत मिलेमतो देखिएको प्रहरीले जनाएको छ।
प्रहरीले पछिल्लोपटक ६ वटा गोल्डेन ओक, ४८ वटा ८८४८ भोड्का, ४२० वटा मुग्लाङ, ३० वटा २०२० एप्पल, ९२ वटा खुकुरी रम र १३२ बोतल रूस्लान भोड्का बरामद गरेको छ। त्यसैगरी, प्रहरीले नक्कली मदिरा प्रयोग गर्न राखिएको स्वदेशी तथा विदेशी ब्राण्डका ९७२ वटा खाली बोतलहरू, नक्कली मदिरा बनाउन प्रयोग हुने विभिन्न रसायनिक पदार्थ, कच्चा पदार्थ तथा उपकरणहरु बरामद गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
