काठमाडौं– नेकपा एमालेमा कमजोर हुँदै गएको लोकतान्त्रिक अभ्यास पुन: फर्किएको छ। एमालेनिकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले आन्तरिक प्रतिस्पर्धाको इतिहासलाई निरन्तरता दिएको हो।
संयोगले एमालेले ‘मिसन ग्रासरुट’ अभियानको उद्घाटन गर्ने दिन नै विद्यार्थी संगठनको नयाँ कार्यसमितिका लागि भएको निर्वाचनको नतिजा आएको छ। अनेरास्ववियुमा पनि एमाले दोस्रो तहको नेतृत्वले ‘सर्वसम्मत’ गर्ने प्रयास गरेको थियो। त्यसका लागि दुई दिन खेर फालिएको थियो।
आफूनिकट विद्यार्थी नेताहरुलाई स्थापित गर्ने गरी तयार पारिन थालेको सूचीलाई आकांक्षीले चुनौती दिएपछि बिहीबार राति निर्वाचन भएको हो। निर्वाचनमा अध्यक्षमा समिक बडाल र अर्को कार्यकारी पद महासचिवमा नरेश रोकाया विजयी भएका हुन्।
नेताको सूचीमा नपरेका, तर विद्यार्थीमाझ लोकप्रिय केही प्रतिस्पर्धीले उम्मेदवारीपछि सहमति गर्न दबाब आउन सक्ने भन्दै मतदान सुनिश्चित नहुन्जेल सम्पर्कविहीन भएर बस्नुपरेको थियो।
यद्यपि अध्यक्ष केपी शर्मा ओलीले भने सुरुदेखि नै प्रतिस्पर्धाका लागि तयार रहन भनेका थिए। निर्वाचनमा प्यानल बनाउन बन्देज लगाउँदै स्वतन्त्र प्रतिस्पर्धाका लागि तयारी गर्न ओलीको सन्देश थियो। त्यसैले यसपल्ट औपचारिक रुपमा प्यानल बनेन। तर, अनौपचारिक रुपमा पदाधिकारी तहमा समिकरण भने निर्माण भएको थियो।
विद्यार्थी संगठनमा चुनाव भएसँगै राष्ट्रिय युवा संघको नेतृत्वका आकांक्षीहरुलाई पनि प्रतिस्पर्धा गर्नुपर्ने संकेत मिलेको छ। आगामी चैतमा महाधिवेशन गर्ने तयारी थालिसकेको युवा संघको नेतृत्वका आकांक्षीहरुमा रहेको अन्योल हटेको छ।
अहिले निर्वाचन भएको अनेरास्ववियुमा २ पटकसम्म नेतृत्वमा मनोनित गरिएको थियो। ७ वर्षअघि नविना लामा निर्वाचनबाट चुनिएकी थिइन्। त्यसपछि नेकपाकालमा ऐन महर र फुटपछि सुनिता बराल मनोनित भएका थिए।
एमालेको नवौं महाधिवेशनमा प्रतिस्पर्धाबाटै अध्यक्षमा केपी शर्मा ओली छानिएका थिए। त्यसको केही समयपछि माओवादी केन्द्रसँग पार्टी एकता गरेर नेकपा बनाइएको थियो। नेकपा फुटेर फेरि एमाले नै बनेपछि भएका सवै नेतृत्व चयन प्रक्रियामा ‘सहमति’ खोजिएको थियो।
यही बीचमा जिल्ला कमिटीहरु निर्माण भए। सबै जिल्ला कमिटीहरुमा ‘सहमति’बाटै नेतृत्व चयन गरियो। कतिपय जिल्लामा संगठनमा कम र शीर्ष नेतामा बढी प्रभाव भएका नेताहरु छनोट भएको भन्दै विरोध समेत भएको थियो।
एमालेको दशौं महाधिवेशनमा पनि ‘सहमति’कै प्रयास भयो। तर, भीम रावल, घनश्याम भुसाल र टंक कार्कीले ‘विद्रोह’ गरेपछि निर्वाचन गरियो। तर, पहिल्यै ‘आधिकारिक सूची’ तय गरेर गरिएको निर्वाचनमा लोकतन्त्रको ‘पूर्ण अभ्यास’ हुन पाएन।
एमालेले क्रमिक रुपमा गर्दै जान लागेको भातृ संगठनका अबका महाधिवेशन भने फेरि प्रतिस्पर्धात्मक हुने अनेरास्ववियुको महाधिवेशनले संकेत गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1764146706.png)
-1779545841.jpg)
