काठमाडौं– राष्ट्रिय सभाका सांसदहरुले संसदलाई ‘बिजनेश’नै नदिएको भन्दै सरकारको आलोचना गरेका छन्। सत्तारुढ नेकपा (माओवादी केन्द्र)का सांसद नारायणप्रसाद दाहालले मन्त्रीहरुको कार्यशैलीप्रति नै असन्तुष्टि जनाए।
बिहीबार सिंहदरबारमा आयोजित राष्ट्रिय सभा अन्तर्गतको दिगो विकास तथा सुशासन समितिको बैठकमा बोल्दै माओवादी केन्द्रका सांसद दाहालले मन्त्री र सचिवले दिनभर गोप्य मिटिङ भनेर समय बिताउने गरेको भन्दै असन्तुष्टि व्यक्त गरे।
उनले बैठक भनेर समय बिताउने मन्त्रीहरुको तौरतरिका ठीक नभएको बताए। सांसद दाहालले बेलुका सचिवसँग छलफल गरेर दिनभर काम गर्ने गरी समयको व्यवस्थापन गर्न पनि मन्त्रीहरुको गम्भिर ध्यानाकर्षण गराए।
उनले भने, ‘बिहान मन्त्री र सचिव दुई घण्टा बैठक भनेर बसेका छन्। दिउँसो त्यसो गरेपछि त्यत्तिकै बित्छ नि। बेलुका सचिवसँग बसेर भोलिका लागि कामको बारेमा छलफल गरे पो हुन्छ। मन्त्रीहरुको काम गर्नै तौरतरिका एकदम गलत भन्ने मलाई लाग्दछ। संघीयता हामीले ल्यायौं। समितिहरु धेरै भए।’
यस्तै नेपाली कांग्रेसकी सांसद कमला पन्तले संसद्लाई ‘बिजनेश’नै दिन नसकेको भन्दै सरकारको आलोचना गरिन्। उनले निजामती कर्मचारी ऐन कहाँ छ? भन्दै सरकारलाई प्रश्न गरेकी छन्।
सांसद पन्तले ऐन बनाउने काममा सरकारले ध्यान नदिएकाले प्रदेश र स्थानीय तहले काम गर्न सक्ने अवस्था नरहेको स्पष्ट पारिन्। उनले भनिन्, ‘निजामती ऐन कता लुकेको छ? अहिलेको यो सरकारले बिजनेश नै दिएन पार्लियामेन्टलाई। संसद्मा ऐन भटाभट आउनुपर्यो। समिति बस्छन्। त्यस विषयमा छलफल गर्छन्। ऐनकै अभावमा प्रदेश र स्थानीय तहले कानुन बनाएर काम गर्न सकेका छैनन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
