काठमाडौं– प्रतिनिधि सभाको सभामुखमा सत्ता साझेदार दलका तर्फबाट एमाले नेता देवराज घिमिरे उम्मेदवार बन्ने सम्भावना बढेको छ। अध्यक्ष केपी शर्मा ओलीले त्यसका लागि तयारी गर्न भनेको घिमिरेनिकट एक नेताले जनाएका छन्।
मंगलबार एमाले संसदीय दलको कार्यालय सिंहदरबार पुगेका उनले त्यहाँ उपलब्ध नेता-कार्यकर्ताको सभामुखका लागि दिइएको बधाई सहज रुपमा ग्रहण गरेका थिए। त्यसपछि सभामुख निर्वाचनको कार्यतालिका समेत सचिवालयबाट प्रिन्ट गर्न लगाएर लिएर गएका थिए।
स्वभावले समेत भद्र रहेका उनी सभामुखका लागि उपयुक्त हुने भन्दै उनलाई अघि बढाउन पार्टीभित्रै चर्चा चलिरहेको थियो। अध्यक्ष ओलीकै गृहजिल्लाका सांसद घिमिरे शीतलनिवास (राष्ट्रपति विद्यादेवी भण्डारी) र ओली दुवैका विश्वास पात्र मानिन्छन्।
‘ओली गुटको उदय’को एउटा महत्त्वपूर्ण आधार मानिने मदन भण्डारी फाउण्डेसनमा उनी सुरुवाती समयमा कार्यालय प्रमुख बनेका थिए। एमाले अध्यक्षमा ओली निर्वाचित भएपछि उनलाई सचिवालय प्रमुखको जिम्मेवारी दिइएको थियो। उनले पनि हालसम्म त्यस्तो कुनै महत्त्वपूर्ण अवसर हासिल गरेका छैनन्। मन्त्री वा अन्य कुनै महत्वपूर्ण जिम्मेवारीमध्ये एक दिइने संकेत नेताहरुबाट पाएका घिमिरे मन्त्री परिषद्मा समेटिएनन्।
मन्त्रीको सूचीमा नाम नभएपछि पार्टी नेताहरुले सभामुखका रुपमा आफूलाई बुझेको हुनसक्ने नेता घिमिरे बताउँछन्। ‘कुनै एउटा जिम्मेवारी दिनुपर्छ भनेर पार्टीका नेताहरुले भनिरहनुभएको थियो। त्यही भएर अब सभामुखका रुपमा बुझ्नुभएको होला,’ छोटो प्रतिक्रिया दिँदै उनले भने।
गत सोमबारको प्रतिनिधि सभा बैठकमा एमालेका तर्फबाट अध्यक्ष मण्डलमा घिमिरेको नाम सिफारिस गरिएको थियो। भावी सभामुखका रुपमा उनलाई अघि सार्ने संकेतका रुपमा एमालेका नेताहरुको बुझाइ थियो।
सभामुखका लागि यसअघि गण्डकी प्रदेशका पूर्व मुख्यमन्त्री समेत रहेका उपमहासचिव पृथ्वी सुब्बा गुरुङ र सचिव छविलाल विश्वकर्माको समेत चर्चा थियो। उनीहरु यसपल्ट रोकिने सम्भावना बढेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775464606-1775465458.jpg)
-1764146706.png)
