काठमाडौं– सवारी चालक अनुमतिपत्र (लाइसेन्स) मा घोटाला गरेको अभियोगमा विशेष अदालतले यातायात कार्यालय एकान्तकुनाका तत्कालीन प्रमुखदेखि नेपाल प्रहरीका डीएसपी, इन्सपेक्टर गरी ७ जनालाई दोषी ठहर गरेको छ।
लाइसेन्सको परीक्षामा फेल भएकालाई समेत मोटो रकम लिएर पास गरेको पाइएपछि अख्तियार दुरुपयोग अनुसन्धान आयोगले एकान्तकुनाका तत्कालीन कार्यालय प्रमुख आनन्दकिशोरी पोखरेलसहित ३८ जनाविरुद्ध मुद्दा चलाएको थियो।
विशेष अदालतका न्यायाधीशहरु श्रीकान्त पौडेल, यमुना भट्टराई र खुसीप्रसाद थारुको इजलासले मुद्दा चलाइएका मध्ये ७ जनालाई दोषी ठहर गरेको हो।
दोषी ठहर हुनेहरुमा एकान्तकुनाका तत्कालीन प्रमुख आनन्दकेशरी पोखरेल, नेपाल प्रहरीका प्रहरी नायव उपरीक्षक (डीएसपी) नवराज थापा, इन्सपेक्टर मुरारी मिश्र, अवकाशप्राप्त शाखा अधिकृत राममणि पोखरेल, अवकाशप्राप्त इन्जिनियर वासुदेव पोखरेल, शाखा अधिकृतहरु शम्भूप्रसाद थपलिया र इश्वरराज रेग्मी रहेको विशेष अदालतका प्रवक्ता दीपेन्द्रनाथ योगीले बताए।
उनीहरुविरुद्ध अख्तियारले राजस्व चुहावट गरी भ्रष्टाचार गरेको र परीक्षाको परिणाम फेरबदल (फेललाई पास) गरी भ्रष्टाचार गरेको आरोपमा दुई वटा मुद्दा चलाएको थियो।
राजस्व चुहावटर गरेर भ्रष्टाचार गरेको कसुरमा दोषी ठहर भएका तत्कालीन कार्यालय प्रमुख पोखेरललाई ८ महिना कैद र ९ हजार जरिवानाको फैसला सुनाइएको छ।
डीएसपी थापा र इन्सपेक्टर मिश्रलाई ६ महिना कैद र ८ हजार रुपैयाँ जरिवानाको फैसला सुनाइएको छ। अवकाश भइसकेका इन्जिनियर पोखरेललाई पनि ६ महिना कैद र ८ हजार रुपैयाँ जरिवानाको फैसला सुनाइएको छ। शाखा अधिकृतहरु पोखरेल, थपलिया र रेग्मीलाई समान ४ महिना कैद र ६ हजार रुपैयाँ जरिवानाको फैसला सुनाइएको योगीले बताए। बाँकी ३१ जनाले भने सफाइ पाएका छन्।
अख्तियारले २०७६ मंसिर ८ गते ३८ जनाविरुद्ध मुद्दा चलाएको थियो। लाइसेन्स परीक्षामा फेल भएका तथा उपस्थिती नै नभएकाहरुलाई पास बनाएर भ्रष्टाचार गरेको पाइएपछि मुद्दा चलाइएको थियो।
यातायात कार्यालयले २०६९ बैशाख, जेठ र असारमा सञ्चालित प्रयोगात्मक परिक्षामा फेल भएका पास बनाएको आरोपमा अख्तियारले मुद्दा चलाएको थियो। १ हजार २८४ जनालाई रकम असुलेर पास गराएको दाबी अख्तियारले गरेको थियो।
तत्कालीन कार्यालय प्रमुखलाई ८ लाख ५९ हजार ५५० रुपैयाँ, अवकास प्राप्त इन्जिनयर पोखरेललाई ३ लाख ४६ हजार ७५०, प्रहरी उपरीक्षक (डीएसपी) थापालाई २४ हजार ९००, अवकासप्राप्त अधिकृत पोखरेललाई ३५ हजार ९००, प्रहरी निरीक्षक मिश्रलाई २४ हजार ३००, शाखा अधिकृत रेग्मीलाई ३० हजार, अधिकृत थपलियालाई ११ हजार १०० रुपैयाँ बिगो रकम कायम गर्दै विशेषमा मुद्दा दायर भएको थियो।
उपसचिवसहित ३१ जनालाई सफाइ
अख्तियारले आरोपी बनाएका उपसचिवहरु धर्मराज ढुंगाना, बाबुलाल रेग्मीसहित ३१ जनाले भने सफाइ पाएका छन्। ढुंगानाविरुद्ध ३ हजार २०० र रेग्मीविरुद्ध ७०० बिगो कायम गर्दै मुद्दा चलाइएको थियो।
सफाइ पाउनेमा ६ जना शाखा अधिकृतहरु पनि छन्। सफाइ पाउने शाखा अधिकृतहरुमा १ हजार ७०० बिगो माग गरिएका चक्रबहादुर श्रेष्ठ, २ हजार ८०० बिगो माग गरिएका पदमप्रसाद पोखरेल, ३ हजार ३०० बिगो माग गरिएका बासुदेव तिवारी, १ हजार ७०० बिगो माग गरिएका भरतकुमार थापा, ४ हजार १५० बिगो माग गरिएका सिताराम खनाल र ३ हजार ५० बिगो माग गर्दै मुद्दा दर्ता गरिएका भविन्द्र कार्की छन्।
नायव सुब्बाहरु बच्चुप्रसाद पोखरेल, स्थानेश्वर ढुंगाना, कमलकुमार खत्री, मदन गिरि, प्रेमराज निरौला, राधाकृष्ण पोखरेल (अवकाश प्राप्त), सत्यबहादुर भण्डारी, शिवप्रसाद चापागाई, उमाकान्त जोशीले पनि सफाइ पाएका छन्।
अवकाश पाएका प्राविधिक नासु सूर्यबज्र बज्राचार्य, कम्युटर अपरेटर सन्जिव न्यौपाने, टाइपिस्ट नासुहरु कविता खड्का, रन्जुसेन पाण्डेले सफाइ पाएका छन्।
घोटाला भएका बेलाका खरदारहरु बाबुकृष्ण महत, बद्रीप्रसाद दाहाल, कोषबहादुर थापा, माधवप्रसाद कोइराला, मणिराम कोइराला, प्रतिभा न्यौपाने क्षेत्री, रघुनाथ केसी, रामप्रसाद भट्टराई, तिर्थराज जैशी र तुलसा श्रेष्ठ अधिकारीले पनि सफाइ पाएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
