काठमाडौं- पञ्चहरुको पार्टीको रुपमा चिनिएको राष्ट्रिय प्रजातन्त्र पार्टी (राप्रपा)लाई सरकार फाप्दैन। हरेक पटक सरकारमा गएलगत्तै पार्टी विभाजन भएको इतिहास राप्रपासँग छ।
२०४७ सालमा पञ्चायत समाप्त भएर प्रजातन्त्र आएसँगै पूर्वपञ्चहरु सूर्यबहादुर थापा, लोकेन्द्रबहादुर चन्द र पशुपतिशमशेर राणा लगायतले स्थापना गरेको पार्टी हो राप्रपा।
पछिल्लो एकता महाधिवेशनमा स्थापनाकालकै नेता कमल थापालाई पराजित गर्दै जनजातिको छोरो राजेन्द्र लिङ्देन हिन्दु धर्म र राजसंस्थाको वकालत गर्ने राप्रपाको अध्यक्ष बने। २०७८ मंसिरमा भएको महाधिवेशनमा आफ्नै राजनीतिक संरक्षक थापालाई पराजित गर्दै उनी अध्यक्ष बनेका थिए।
अध्यक्षमा निर्वाचित हुँदा पूर्वराजा ज्ञानेन्द्र शाहले खेलेको आरोप भने उनीमाथि लाग्यो। कमल थापा अध्यक्ष रहँदा लगातार दुई कार्यकाल केन्द्रीय समितिका महामन्त्री भएका लिङ्देनले पछिल्लो महाधिवेशनमा आफूलाई अध्यक्षका लागि अघि सारेका थिए। २०७४ सालको प्रतिनिधि सभा निर्वाचनमा नेपाली कांग्रेसका कृष्ण सिटौलालाई हराएपछि उनी चर्चामा आएका थिए।
उनी उक्त संसदको अन्तिम समयतिर राजीनामा दिँदै बलियो शक्तिसहित आउने चेतावनी दिएर हिँडेका थिए। आफूले दिएको चेतावनी अनुसार उनी सम्पूर्ण रुपमा बलियो शक्ति बन्न त सकेनन् तर राप्रपालाई राष्ट्रिय दल बनाउन भने सफल भए। देशभरका कार्यकर्तामा ऊर्जा ल्याउन सफल देखिए।
२०७४ को निर्वाचनमा ३ प्रतिशत मत पुर्याउन नसकेर राष्ट्रिय दल नबन्दा स्वतन्त्र सांसदको रुपमा बसेका उनी यस पटक १४ सांसदसहित सत्तापक्ष बन्न सफल भएका छन्।
लिङ्देनको पार्टी माओवादी केन्द्रका अध्यक्ष पुष्पकमल दाहाल प्रचण्डलाई विश्वासको मत दिँदै सत्तामा पुगेको हो। उनै लिङ्देनले मंगलबार उपप्रधानसहित ऊर्जा मन्त्रीको रुपमा सपथ लिएका छन्। राप्रपाले लिङ्देनसहित तीन मन्त्री र एक राज्यमन्त्री पाएको छ।
वि.सं. २०२२ साल भदौ २२ गते पाँचथरको अमरपुरमा जन्मिएका लिङ्देनको परिवार नै राजनीतिक थियो। उनका बुबा पञ्चायतकालमा गाउँ पञ्चायतको अध्यक्ष थिए।
बाबुको पथ पछ्याउँदै लिङ्देन विद्यालय तहदेखि नै सक्रिय राजनीतिमा लागेका थिए।
उनी पञ्चायतकालको अन्त्यतिर २०४५ सालमा मेची क्याम्पसमा विद्यार्थी संगठनको निर्वाचनमा पञ्चायत समर्थक विद्यार्थी संगठन राष्ट्रवादी विद्यार्थी मण्डलका तर्फबाट अध्यक्ष पदमा उठेका थिए। तर पराजित भए।
२०४९ सालमा राप्रपाको विद्यार्थी संगठन सुरु हुँदा उनी संस्थापक अध्यक्ष बनेका थिए।
लिङ्देनको यात्रा वडाध्यक्षदेखि उपप्रधानमन्त्रीसम्म
राप्रविसंघको केन्द्रीय अध्यक्ष बन्नु अघि उनी झापाको तत्कालीन गोलधाप गाविस वडा नम्बर ३ को वडाध्यक्ष निर्वाचित भएका थिए। जनप्रतिनिधिको रुपमा यो उनको पहिलो निर्वाचन थियो।
राजा ज्ञानेन्द्र शाहको प्रत्यक्ष शासनकालमा लिङ्देन जिल्ला विकास समिति झापाको सभापति बने। शाहले मनोनयन गरेर जिल्ला सभापति बनेपछि उनी केन्द्रीय सक्रिय भए।
२०६२/०६३ को जनआन्दोलनका बेला उनमाथि आक्रमण पनि भएको थियो। राजावादी भन्दै झापाको बिर्तामोडमा कालोमोसो दलिएको थियो।
उनी माओवादीको निशानामा परेका थिए। सशस्त्र द्वन्द्वकालमा माओवादी कार्यकर्ताले उनको झापा गोलधापस्थित घरमा आगजनी गरेका थिए। राजावादी र भ्रष्ट शासकको आरोप लगाउँदै उनीमाथि 'जनकारबाही' गरेको थियो।
माओवादीले घरमा आगो लगाएपछि उनी परिवारसहित त्यहाँबाट बिर्तामोड सरे अनि त्यहीँ बसोबास गरेर राजनीतिमा सक्रिय भए। अहिले उनी पुन: गोलधापमै सरेका छन्।
२०६२/०६३ को राजनीतिक परिवर्तनपछि पनि उनले राजतन्त्र र हिन्दु राष्ट्रको मुद्दा भने छोडेनन्। राजतन्त्र पुनर्स्थापना र हिन्दु राष्ट्रबारे कडा अभिव्यक्ति दिँदै उनी चर्चामा आए। कांग्रेसको महाधिवेशनमा उनले दिएको एउटा भाषण चर्चित भएको थियो। उनले गाउँमा नेता आउँदा जनताले ‘कुन चोर आयो’ भन्छन् भनी गरेको टिप्पणीको चर्चा भएको थियो। नेपाली कांग्रेसको १४औं महाधिवेशनमा शुभकामना मन्तव्य राख्दै लिङ्देनले नेताले जनताको विश्वास गुमाएको भन्दै पहिले गाउँमा जाँदा कुन नेता आनुभएको छ भन्ने थरिन्थ्यो अहिले कुन चोर आएछ भन्ने गरेका टिप्पणी गरेका थिए ।
आफू सत्ता बाहिर रहँदा अरुलाई लगाउँदै आएको भ्रष्टाचार चुलिएको, सुशासन नभएको र जनतालाई डेलिभरी दिन नसकेको जस्ता आरोप चिर्दै काम गर्नुपर्ने चुनौती उनलाई छ।
सरकारमा गएर लिङ्देनले केही गर्न सकेनन् भने आगामी निर्वाचनमा राप्रपा फेरि रेलिगेसनमा धकेलिने निश्चित छ। राप्रपालाई आगामी दिन अझै बलियो बनाउन उनले मन्त्रीको रुपमा उच्च प्रदर्शन गर्नु अनिवार्य देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788061592.webp)
-1786602170.png)
-1786513116.png)
