काठमाडौं– स्पेन राष्ट्रिय फुटबल टोलीका कप्तान सर्जियो बुस्केट्सले अन्तर्राष्ट्रिय फुटबलबाट सन्यास लिने घोषणा गरेका छन्। उनले सामाजिक सञ्जालमार्फत हालै यस्तो घोषणा गरेका हुन्।
बुस्केट्सको कप्तानीमा रहेको स्पेन मोरक्कोसँग पराजित हुँदै कतारमा जारी विश्वकपको अन्तिम १६ बाटै बाहिरिएको थियो। टोलीले गरेको खराब प्रदर्शनको जिम्मेवारी दिँदै मुख्य प्रशिक्षक लुइस एनरिकेले यसअघि नै पदबाट राजीनामा दिएका थिए। उनको ठाउँमा लुइस फुइन्टे आइसकेका छन्।
सामाजिक सञ्जालमार्फत सन्यास घोषणा गर्दै बुस्केट्सले देशको प्रतिनिधित्व गर्नु र कप्तान बन्नु अविश्मरणीय क्षण भएको बताएका छन्।
साथै, उनले अब आफू स्पेनको एक समर्थक हुने र स्पेनिस टोलीलाई बिनाशर्त समर्थन गरिरहने स्पष्ट पारेका छन्।
‘मेरो देशको प्रतिनिधित्व गर्नु र यसलाई शीर्षमा लैजान पाउनु, विश्वकप र युरो च्याम्पियन बन्नु, कप्तान हुनु र धेरै खेल खेल्नु, ठूलो वा कम सफलता पाउनुसँगै अद्वितीय, अविस्मरणीय र ऐतिहासिक अनुभवसहित बिदा लिने निर्णय गरेको छु’, उनले सामाजिक सञ्जालहरूमा लेखेका छन्, ‘म राष्ट्रिय टोलीमा बिताएका क्षणहरूलाई सधैँ सम्झिनेछु। अन्त्यमा, म मेरो टोलीका साथीहरू र नयाँ प्रशिक्षक लुइस फुइन्टेलाई सफलताको कमना गर्दछु। अब म एक समर्थक हुनेछु। म रमाइलो गर्नेछु र हाम्रो टोलीलाई बिनाशर्त समर्थन गरिरहनेछु।’
बार्सिलोनाका कप्तानसमेत रहेका बुस्केट्सले सन् २००९ मा राष्ट्रिय टोलीमा डेब्यू गरेका थिए। उनले खेलेको पहिलो विश्वकप नै सुखद रह्यो। २०१० मा दक्षिण अफ्रिाका भएको विश्वकप स्पेनले जित्दा उनी डिफेन्सिप मिडिफिल्डमा निर्बिकल्प खेलाडी थिए।
बुस्केट्स सम्मिलित स्पेनिस टोलीले २०१२ मा युरोकप पनि जित्यो। उनले स्पेनका लागि १४३ खेल खेल्दै २ गोल गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
