३ महिनामा विद्युत्‌ प्राधिकरणको नाफा साढे ८ अर्ब रूपैयाँ

अर्थ समाचार

नेपाल लाइभ बिहीबार, मंसिर १५, २०७९ १४:३६

काठमाडौं– नेपाल विद्युत्‌ प्राधिकरणले चालु आर्थिक वर्ष २०७९/८० को पहिलो ३ महिना (साउन, भदौ र असोज) मा साढे ८ अर्ब रूपैयाँ नाफा कमाएको छ। आर्थिक वर्षको पहिलो तीन महिनामा २४ अर्ब ४८ करोड खर्च गरी प्राधिकरणले ८ अर्ब ५० करोड रूपैयाँ (करअघि) नाफा कमाएको हो।

चालु आर्थिक वर्षका साउन, भदौ र असोजसम्मको वित्तीय विवरण (अपरिस्कृत) अनुसार, प्राधिकरणले यस अवधिमा विद्युत्‌ बिक्री, ब्याज तथा अन्य आम्दानीबाट ३२ अर्व ९८ करोड रूपैयाँ आम्दानी गरेको छ। आर्थिक वर्षको पहिलो ३ महिनामा २४ अर्ब ४८ करोड खर्च गरी प्राधिकरणले ८ अर्ब ५० करोड रुपैयाँ (करअघि) नाफा कमाएको छ।

चालु आवको ३ महिनामा सम्पादित प्रमुख क्रियाकलापहरु समेटिएको विवरणअनुसार प्राधिकरणले यस अवधिमा निजी क्षेत्रबाट १४ अर्ब १५ करोड रूपैयाँको विद्युत्‌ खरिद गरेको छ। आफ्नो स्वामित्वमा रहेका विद्युत्‌ गृहरुबाट उत्पादित र निजी क्षेत्रबाट खरिद गरिएको विद्युत्‌ देशभित्र बिक्री गरी खुद २२ अर्ब २० करोड रूपैयाँ आम्दानी भएको छ। देशभित्र खपत गरी बढी भएको विद्युत्‌ भारतीय प्रतिस्पर्धी बजारमा बिक्री गरी ३ महिनामा ६ अर्ब १७ करोड रूपैयाँ आम्दानी भएको प्राधिकरणले जनाएको छ।

आव २०७२/७३ मा ८ अर्ब ८९ करोड रुपैयाँ वार्षिक घाटामा रहेको प्राधिकरण त्यसपछिका वर्षहरुमा निरन्तर नाफामा छ। आव २०७६/७७ मा ११ अर्ब ७५ करोड रूपैयाँ पुगेको प्राधिकरणको नाफा आव २०७७/७८मा घटेर ६ अर्ब ९ करोडमा सीमित भएको थियो। गत आर्थिक वर्ष २०७८/७९मा प्राधिकरणले नाफालाई बढाएर १६ अर्ब १६ करोड रूपैयाँ पुर्‍याएको थियो।

प्राधिकरणका कार्यकारी निर्देशक कुलमान घिसिङले चुहावट नियन्त्रण, आन्तरिक रुपमा तथा भारततर्फको विद्युत्‌ निर्यात बढ्दा आम्दानीमा भएको बृद्धि, खर्च नियन्त्रण लगायतले गर्दा चालु आवको पहिलो ३ महिनामा उल्लेख्य नाफा कमाउन सफल भएको बताए। कार्यकारी निर्देशक घिसिङले नाफाबाट प्राप्त रकमलाई विद्युत्‌ खपत बढाउन, उपभोक्तालाई भरपर्दो र गुणस्तरीय विद्युत्‌ उपलब्ध गराउन प्रसारण र वितरणतर्फको पूर्वाधार विस्तार तथा सुदृढीकरणमा खर्च गरिएको उल्लेख गरे।

‘आगामी दिनमा विद्युत्‌ खपत बढाउन, उपभोक्तालाई भरपर्दो र गुणस्तरीय विद्युत्‌ आपूर्तिका लागि ४/५ वर्षभित्रमा ३/४ खर्ब रुपैयाँ लगानी गर्नु पर्ने छ, नेपाल सरकारसँग स्रोतको सीमितताका कारण पर्याप्त बजेट पाउन सक्ने अवस्था छैन, त्यसैले हरेक वर्षको नाफाबाट उत्पादन, प्रसारण र वितरणतर्फका पूर्वाधार विस्तार तथा सुदृढीकरणमा खर्च गरिरहेका छौं।’

नाफा/नोक्सानको अवस्था:

आर्थिक वर्ष	खुद नाफा रुपैयाँ	खुद घाटा रुपैयाँ
२०७२/७३		८ अर्ब ८९ करोड
२०७३/७४	१ अर्ब ५० करोड
२०७४/७५	३ अर्ब ४४ करोड
२०७५/७६	९ अर्ब ८१ करोड
२०७६/७७	११ अर्ब ७५ करोड
२०७७/७८	६ अर्ब ९ करोड
२०७८/७९	१६ अर्ब १६ करोड
२०७९/८० (पहिलो ३ महिनामा)	८ अर्ब ५० करोड

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

भारत–पाकिस्तान तनावः भारतद्वारा ३२ विमानस्थलबाट नागरिक उडान बन्द

सुरक्षा जोखिमलाई लिएर पाकिस्तान सुपर लिग पनि स्थगित

पाकिस्तानले घोषणा गर्यो भारतविरुद्ध अपरेशन ‘बुन्यान उल मर्सूस’