काठमाडौं– मंसिर ४ गते सम्पन्न प्रतिनिधि तथा प्रदेश निर्वाचनमा कयौं उम्मेदवार ले आफ्नो निर्वाचन क्षेत्र परिवर्तन गरेर निर्वाचनमा होमिए।
क्षेत्र परिवर्तन गरेर निर्वाचनमा जाँदा केही प्रभावशाली भनिएका दलका उम्मेदवारले आफ्नो साख जोगाउन सकेनन् भने केही उम्मेदवारले सहजै जित हासिल गरे। जसमध्ये केही उम्मेदवाको चर्चा गरौँ।
पुष्पकमल दाहाल ‘प्रचण्ड’
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ आफूलाई सुरक्षित गर्नका लागि हरेक निर्वाचनमा क्षेत्र परिवर्तन गर्ने उम्मेदवारमा पर्छन्।
पूर्व प्रधानमन्त्री समेत रहेका अध्यक्ष प्रचण्ड पहिलो संविधानसभा निर्वाचन २०६४ मा रोल्पा र काठमाडौं–१० बाट निर्वाचित भएका थिए।
दोस्रो संविधानसभा २०७० मा सिरहा–५बाट निर्वाचित भएका थिए भने प्रतिनिधिसभा निर्वाचन ०७४ मा चितवन–३ बाट निर्वाचित भएका थिए। यस पटक पनि चितवन–३ बाट नै निर्वाचन लड्ने तयारी गरेका अध्यक्ष प्रचण्ड अन्ततः आफ्नो पक्षमा माहोल नदेखेपछि गोरखा–२ बाट उम्मेदवार बने।
नेपाल जनता समाजवादी पार्टीका अध्यक्ष डा. बाबुराम भट्टराई र गोरखाका नारायणकाजी श्रेष्ठलाई साथमै राखेर चुनावमा होमिएका अध्यक्ष प्रचण्डले भारी मतान्तरसहित विजयी हासिल गरे।
अध्यक्ष प्रचण्डले २६ हजार १ सय ३ मत प्राप्त गर्दा उनका प्रतिद्वन्द्वी राष्ट्रिय स्वतन्त्र पार्टीका उम्मेदवार कविन्द्र बुर्लाकोटीले १२ हजार ६ सय ३७ मत ल्याएर पराजित भए।
माधव कुमार नेपाल
नेकपा एकीकृत समाजवादीका अध्यक्ष माधव कुमार नेपाल पनि क्षेत्र परिवर्तन गर्ने नेता मध्येका एक हुन्।
उनी ०४८ देखि ०५६ सम्म राष्ट्रिय सभा सदस्य बनेका थिए। प्रतिनिधिसभा सदस्य ०५६ (रौतहट) १ र ४) बाट उनी निर्वाचित भएका थिए। संविधानसभा सदस्य ०६५ (मनोनित) भएका नेपाल संविधानसभा सदस्य निर्वाचन ०७० मा काठमाडौं– २ र रौतहटबाट विजयी भएका थिए। प्रतिनिधिसभा सदस्य, ०७४ (काठमाडौँ २) बाट निर्वाचित भएका थिए।
यस पटक उनी रौतहट–१ बाट ३३ हजार ५ सय २२ मतसहित विजयी भए। उनका प्रतिद्वन्द्वी एमालेका अजय कुमार गुप्ताले २६ हजार ९ सय २२ मतसहित पराजित भए।
वीर बहादुर बलायर
नेपाली कांग्रेस सुदूरपश्चिम प्रदेश सभापति वीर बहादुर बलायरको गृह जिल्ला डोटी हो।
डोटीबाट निर्वाचन लड्ने उद्घोष गरेका बलायर कैलाली–४बाट निर्वाचनमा होमिए। सत्ता गठबन्धनका कारण डोटीमा नेकपा एकीकृत समाजवादी पार्टीका प्रेम आलेलाई छोड्न परेपछि बलायर कैलाली–४बाट निर्वाचनमा होमिएका थिए।
उनले कैलाली–४ मा नेकपा माओवादी परित्याग गर्दै एमाले रोजेका एमाले सचिव एवम् एमाले सुदूरपश्चिम प्रदेश इन्चार्ज लेखराज भट्टलाई पराजित गर्दै निर्वाचित भएका छन्।
०७० को संविधानसभामा कांग्रेसका तर्फबाट डोटीबाट विजयी भएका बलायर ०७४को संघीय निर्वाचनमा कांग्रेस उम्मेदवार भएर पराजित भएका थिए। पूर्वमन्त्री समेत रहेका बलायर लोकतान्त्रिक गठबन्धनका साझा उम्मेदवार भएपछि यस पटक उनलाई जित सहज भएको हो। ्बलायरले २६ हजार १ सय ७१ मत प्राप्त गरेर विजयी हुँदा उनका प्रतिद्वन्द्वी भट्टले २२ हजार ५ सय ८७ मत प्राप्त गरेर पराजित भए।
कृष्ण कुमार श्रेष्ठ
नेकपा समाजवादी पार्टीका नेता कृष्ण कुमार श्रेष्ठको स्थायी ठेगाना तनहुँ हो। उनी ०७४ सालको निर्वाचनमा तनुहँ–१बाट निर्वाचित भएका थिए। कांग्रेसका नेता रामचन्द्रलाई पराजित गरेका श्रेष्ठ यतिबेला नेकपा एकीकृत समाजवादी पार्टीका तर्फबाट बारा–४ बाट उम्मेदवार बने।
तनहुँमा रामचन्द्र पौडेललाई उम्मेदवार बनाउने गठबन्धनको निर्णय अनुसार उनी क्षेत्र परिवर्तन गरेर बारा–४मा जानु परेको थियो।
बारा–४ बाट उनले एमालेका एकवाल मियाँलाई पराजित गरेका छन्। श्रेष्ठले २० हजार २ सय ९७ मत प्राप्त गर्दा उनका प्रतिद्वन्द्वी एमालेका मियाँले १३ हजार ८ सय ६३ मत सहित पराजित भए।
प्रदीप पौडेल
नेपाली कांग्रेसका नेता प्रदीप पौडेल यसपटक क्षेत्र परिवर्तन गरेर काठमाडौं–५ बाट उम्मेदवार बने। ०७४ को प्रदेश सभा निर्वाचनमा उनी तनहुँ–२ (१) बाट प्रतिस्पर्धामा उत्रिएका थिए। माओवादी केन्द्रका उम्मेदवारसँग पराजित भएका पौडेल लोकतान्त्रिक वाम गठबन्धनका तर्फबाट काठमाडौं–५ मा उम्मेदवार बनेका उनी एमालेका वरिष्ठ उपाध्यक्ष ईश्वर पोखरलेलाई पराजित गर्दै जित हासिल गरे।
प्रदीपले १५ हजार २ सय ३७ मतसहित विजय हासिल गर्दा उनका प्रतिद्वन्द्वी ईश्वरले १० हजार १ सय ७५ मतसहित हार व्यहोरे।
घनश्याम भुषाल
घनश्याम भुषाल नेकपा एमालेबाट टिकट नपाएपछि विद्रोही बनेर रुपन्देही–१बाट उम्मेदवार बने। ०५३ सालको उपनिर्वाचनमा क्षेत्र नम्बर २ रुपन्देहीबाट निर्वाचित भएका भुषाल संघीय संसद्को प्रतिनिधिसभा निर्वाचन ०७४ सालमा क्षेत्र नम्बर ३ रुपन्देहीबाट निर्वाचित भएका थिए।
एमाले अध्यक्ष ओलीले टिकट नदिएपछि उनी क्षेत्र परिवर्तन गरेर रुपेन्देही–१ बाट उम्मेदवार बनेका थिए। उनले निर्वाचनमा भने सफलता हासिल गर्न सकेका छैनन्। उनी एमालेका छबिलाल विश्वकर्मासँग पराजित भए।
विश्वकर्माले १६ हजार ७ सय ७३ मतसहित विजयी हुँदा भुषाल १३ हजार ४ सय ४८ मतसहित पराजित भए।
अनिल कुमार झा
लोकतान्त्रिक समाजवादी पार्टी (लोसपा)का उम्मेदवार अनिल कुमार झाको धनुषा निर्वाचन क्षेत्र २ भए पनि उनी धनुषा–३बाट प्रतिनिधि सभा सदस्यका लागि उम्मेदवार बने। उनी यस पटक एमालेकी उम्मेदवार जुली कुमारी महतोसँग पराजित बनेका छन्।
क्षेत्र परिवर्तनकै कारण झा पराजित भएको अनुमान गरिएको छ। एमालेकी महतोले ३३ हजार ३ सय ८८ मत प्राप्त गर्दा झाले २३ हजार ६ सय ८६ मा चित्त बुझाउन बाध्य बनेका छन्।
लक्ष्मणलाल कर्ण
लोकतान्त्रिक समाजवादी पार्टी नेपालका नेता लक्ष्मणलाल कर्णले क्षेत्र परिवर्तन गरेसँगै नराम्रोसँग पराजित भएका छन्। उनी यस पटक पर्सा–१ बाट उम्मेदवार बनेका थिए।
संघीय संसद् प्रतिनिधिसभा निर्वाचनमा ०७४ सालमा पर्सा–४बाट निर्वाचित भएका कर्ण संविधानसभा सदस्य निर्वाचन ०६४ र ०७० मा लगातार समानुपातिक निर्वाचन प्रणालीबाट निर्वाचित भएका थिए।
यस पटक उनी पर्सा–१बाट पराजित भएका हुन। उनी जसपाका प्रदीप यादवसँग पराजित भएका हुन। प्रदीप यादव पहिलो भएर विजेता हुँदा,अजयकुमार सुवेदी दोस्रो,किरणमान ढंगोल तेस्रो र कर्ण चौथो नम्बरमा देखिएका हुन्।
ओनसरी घर्ती
काठमाडौं–२बाट लोकतान्त्रिक बाम गठबन्धनका तर्फबाट उम्मेदवार बनेकी ओनसरी घर्तीले आफ्नो निर्वाचन क्षेत्र परित्याग गर्दै काठमाडौं रोजेकी थिइन्। क्षेत्र परिवर्तन गरेसँगै घर्ती काठमाडौं–२ बाट पराजित बनिन्।
संविधानसभा सदस्य निर्वाचन ०६४ मा समानुपातिक सदस्य बनेकी घर्ती दोस्रो संविधानसभा ०७० मा रोल्पा २ बाट प्रत्यक्ष निर्वाचित भइन्। प्रतिनिधिसभा सदस्य ०७४ मा पनि निर्वाचित बनेकी घर्ती यसपटक काठमाडौं–२ बाट पराजित बन्न पुगिन्।
काठमाडौं–२बाट राष्ट्रिय स्वतन्त्र पार्टीकी उम्मेदवार सोबिता गौतम निर्वाचित भइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765528419.png)
-1764146706.png)
-1763721444.png)
-1765273665.jpg)
