काठमाडौं- गुल्मीको दुर्गम गाउँमा जन्मे-हुर्केर राष्ट्रसंघको उच्च ओहोदासम्म पुगेका कुलचन्द्र गौतमले आफ्नो जीवनीलाई पुस्तकमा समेटेका छन्। मध्यपहाडी जिल्ला गुल्मीको एउटा कमै नाम सुनिएको गाउँबाट उनले कसरी त्यहाँसम्मको यात्रा तय गरे? के कस्ता चुनौती सामना गरे? भन्नेबारे उनले प्रकाशोन्मुक पुस्तक ‘ग्लोबल सिटिजन फ्रम गुल्मी – माइ जर्नी फ्रम दि हिल्स अफ नेपाल टु दि हल्स अफ युनाइटेड नेसन्स’मा आफ्ना भोगाइ र अनुभव लेखेका छन्।
गौतमको पुस्तक साउन २२ गते मंगलबार सार्वजनिक हुँदैछ।
संयुक्त राष्ट्रसंघको उपमहासचिव र राष्ट्रसंघीय बालकोष (युनिसेफ) को कार्यकारी उपनिर्देशकसम्मको जिम्मेवारी निभाएका गौतमका भोगाइ नै यस पुस्तकमा समेटिएका छन्।
पुस्तकको प्रस्तावनामा राष्ट्रपति विद्यादेवी भण्डारीले युनिसेफमा गौतमको योगदानले संसारलाई आमा तथा बालबालिकाका निम्ति अझ सुरक्षित स्थानमा परिणत गरेको उल्लेख गरेकी छिन्।
‘नेपालको शान्ति प्रक्रियामा गौतमको संलग्नताले राजनीतिमा हिंसाको पुनरावृत्तिलाई नियन्त्रित गर्न सघाउ पुर्याकएको छ,’ राष्ट्रपति भण्डारीको भनाइ छ, ‘अवकाशका दिनमा पनि अन्तर्राष्ट्रिय प्रशासनको अनुभवसहित नागरिक समाजको अगुवाका रुपमा योगदान दिइरहने गौतमको जीवनपथ अरुका निम्ति अनुकरणीय हुनसक्छ।’
आफ्ना सहकर्मीको जीवनी प्रकाशित हुन लागेकामा प्रसिद्ध विकास अर्थशास्त्री सर रिचार्ड जोलीले भूमिका लेखेका छन्, ‘यस पुस्तकमार्फत विश्वकै नेताहरु र सेलिब्रेटीसँगको कुलचन्द्रका रोचक र गहिरो संसर्गका आनन्द पाठकहरुले पाउनेछन्। नेपालको एउटा गाउँबाट उठेको व्यक्तिले यति ऊर्जा र दूरदर्शिता प्रस्तुत गर्नसक्छ भने विश्वका अन्यत्र जन्मेका मानिसभित्र यसैगरी लुकेका प्रतिभा उजागर भइदिए झन् कस्तो होला?’
स्कुल, बिजुली वा बाटोघाटो केही नभएको गौतमको ग्रामीण बाल्यकालबाट पुस्तक सुरुहुन्छ। त्यस्तो ठाउँबाट उठेर उनी युनिसेफको उच्च ओहदामा पुग्छन्। त्यसपछिको ३ दशकसम्मका उथलपुथल र उकाली-ओराली यात्राका रोचक वर्णन पुस्तकमा समेटिएको छ।
उनले पुस्तकमा नेल्सन मन्डेला, आङ सान सू की, बिल गेट्स, एडवार्ड सेभर्नात्जेदेखि थाइल्यान्डका राजा भूमिबोल अदुल्यादेजसम्मका व्यक्तित्वसँगक रोचक भेटघाटलाई पुस्तकमा उतारेका छन्।
यिनै अनुभवका आधारमा गौतमले नेपाल, संयुक्त राष्ट्रसंघदेखि समग्र विश्व समाजकै भविष्यबारे आफ्ना धारणासमेत प्रस्तुत गरेका छन्।
‘एउटा गाउँले केटो कसरी राष्ट्रसंघीय संयन्त्रकै उपल्लो ओहदासम्म पुग्न सक्यो भन्ने प्रेरणादायी जानकारी गौतमको यस जीवनीबाट मिल्छ,’ पत्रकार कुन्द दीक्षितले पुस्तकको अन्तिम पातोमा लेखेका छन्, ‘झट्ट हेर्दा नरम बोलीमा प्रकट भए पनि चट्टानी मान्यताहरु र सामाजिक न्यायका निम्ति कदापि पछि नहट्ने अडानहरु नै गौतमको पहिचान हो।’
भोलि सार्वजनिक हुने गौतमको पुस्तक अमेजोनको पिओडी (प्रिन्ट अन डिमान्ड) र किन्डल मार्फत संसारभर उपलब्ध हुने प्रकाशक संस्था नेपालयका अर्पण शर्माले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789992067.jpeg)
-1789631269.jpg)
