तस्बिर : रासस। काठमाडौं– निलम्बित प्रधानन्यायाधीश चोलेन्द्रशमशेर राणाले पूर्वप्रधानन्यायाधीश, नेपाल बार एसोसिएसनका पदाधिकारी र सर्वोच्च अदालत बारका पदाधिकारीहरूले न्यायाधीश नियुक्तिमा भाग मागेको गम्भीर आरोप लगाएका छन्।
आफूमाथि दर्ता गरिएको महाभियोग प्रस्तावबारे महाभियोग सिफारिस समितिलाई बुधबार बयान दिने क्रममा राणाले यस्तो आरोप लगाएका हुन्। उनले प्रधानन्यायाधीशबाट निवृत्त भइसकेपछि पनि अदालत चलाउन खोजेको आरोप लगाए। राणाले खासगरी कल्याण श्रेष्ठ र सुशीला कार्कीप्रति लक्षित गर्दै यस्तो टिप्पणी गरेका हुन्।
यसअघि पनि उनले सार्वजनिक रुपमा उनीहरूमाथि आरोप र आलोचना गर्दै आएका थिए।
‘अवकाश पाएपछि पनि पूर्वप्रधानन्यायाधीशहरूले विभिन्न कोणबाट न्यायपालिकामा डिक्टेट गर्न खोज्नुभयो। कर्मचारीमा आफ्नो अनुकूलता खोज्नुभयो। न्यायाधीश आफू अनुकूल पठाउन खोज्नु भयो’, राणाले भने, ‘पूर्वप्रधानन्यायाधीश संरक्षक हो भन्दै न्यायाधीश र कर्मचारीमा भाग खोज्ने काम भयो।’
उनले आफूले यी कुरा अस्वीकार गरेकाले आफ्नाविरुद्ध विज्ञप्ति निकाल्नेदेखि न्यायाधीश र कानुन व्यवसायीलाई आन्दोलनमा उत्रन उक्साएको आरोप लगाए। उनले न्यायाधीशहरू, नेपाल बारका पदाधिकारी, पूर्वअध्यक्ष र सर्वोच्च बारका अध्यक्षलाई समेत मुछे।
नेपाल बारका पूर्वपदाधिकारीले उच्च अदालतको न्यायाधीश मागेको र सर्वोच्च अदालत बारका अध्यक्ष वरिष्ठ अधिवक्ता पूर्णमान शाक्यले मुद्दा मिलाइदिनुपर्ने कुरा राखेको राणाले आरोप लगाए। संवैधानिक कानुनका विज्ञ शाक्यले अदालतमा देखिएको अवरोध हटाउन भनी गरेको छलफलका क्रममा आफूसँग यस्तो माग गरेको राणाको दाबी छ।
बयान दिने क्रममा राणाले नामै लिएर नेपाल बारका पूर्वअध्यक्ष वरिष्ठ अधिवक्ता चण्डेश्वर श्रेष्ठ र पूर्वमहासचिव लिलामणि पौडेलले उच्च अदालतमा न्यायाधीश मागेको पनि आरोप लगाए।
‘नेपाल बारका तत्कालीन अध्यक्ष चण्डेश्वर श्रेष्ठले उच्च अदालतको न्यायाधीशमा कोटा माग्नु भयो’, राणाले भने, ‘बारका महासचिवले उच्च अदालतको मुख्य न्यायाधीशमा आफैंलाई राख्न माग गर्नुभयो। उहाँ न त वरिष्ठ अधिवक्ता हुनुहुन्थ्यो, न लैजान मिल्थ्यो। त्यसैले मैले हुँदैन भनेको थिएँ।’
बारका पदाधिकारी सिद्धान्त र नैतिकताले आन्दोलनमा नगएको राणाको टिप्पणी छ। ‘सर्वोच्च बारका अध्यक्ष प्राध्यापक हुनुहुन्छ। उहाँले आफ्नो मुद्दाको कुरा गर्नुभयो’, राणाले थपे।
उनले आफ्ना सहकर्मीहरूको आन्दोलन बारको उक्साहटमा भएको आरोप लगाए। राणामाथि बुधबार ४ प्रश्नमा मात्र बयान भएको छ। बिहीबार ११ बजे फेरि बयानका लागि बोलाइएको छ। बिहीबार बाँकी प्रश्नमा बयान गरेर समिति निष्कर्षतिर जाने समितिका सदस्यहरूले बताएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
![Nepal Live Samachar नेपाल लाइभ समाचार, जेठ २९ [भिडियाे]](https://nepallive.net/uploads/posts/500X300/samachar++-299-1718118150.jpg)
![Nepal Live Samachar नेपाल लाइभ समाचार, जेठ २७ [भिडियाे]](https://nepallive.net/uploads/posts/500X300/samachar++-1717941479.jpg)
-1732370421.png)
