काठमाडौं– भदौ ९ अर्थात् निर्वाचन आयोगबाट दर्ता प्रमाणपत्र पाएकै दिन नेकपा एकीकृत समाजवादीले स्थापना दिसव मनाउँदैछ। यसलाई 'पार्टी पुनर्गठन'को संज्ञा दिइएको छ। एमालेबाट छुट्टिएपछि निरन्तर सत्ता गठबन्धनको हिस्सा बनिरहेको एकीकृत समाजवादीले एक वर्षमा आफू जन्मिनुको औचित्य पुष्टि गरेको कि गरेन? अपेक्षाअनुसार नै पार्टी अघि बढिरहेको छ वा छैन? आदि विषयमा महासचिव बेदुराम भुसालसँग नेपाल लाइभको कुराकानी :
'पार्टी पुनर्गठन'को वार्षिकोत्सव मनाउँदै हुनुहुँदो रहेछ। आफू जन्मिनुको औचित्य पुष्टि भएको आत्ममूल्यांकन छ?
पहिलो कुरा त विद्रोह गर्ने बेलामा लोकतन्त्र र संविधानकको रक्षा गर्न सकेका छौं। यो राम्रो उपलब्धी हो। नेपालको कम्युनिष्ट आन्दोलनलाई पुनर्गठन गर्ने र वाम एकताको कुरा गरेका थियौं। पुनर्गठनको अभियान एक वर्षभित्र हामी सबै ठाउँमा पूरा गर्छौं। ७७ जिल्लामा पार्टी कमिटी र पार्टीको जनवर्गीय संगठन बनाएका छौं। पालिकामा ७५ प्रतिशतभन्दा बढी पुर्याएका छौं। वडा तहमा पुगेका छौं। ५५ प्रतिशतभन्दा बढी वडामा पार्टी कमिटी बनाएका छौं। यि सबै पुनर्गठनका राम्रै उपलब्धी हुन्।
यही बीचमा स्थानीय तहको निर्वाचन पनि सामना गरेका छौं। कतै एकल रुपमा त कतै गठबन्धन भयो। गठबन्धनका कारण सबै ठाउँमा उम्मेदवारी दिन सकेनौं। उम्मेदवारीका हिसाबले जे जति मत र जित प्राप्त गरियो त्यसमा हामी सन्तुष्ट नै छौं। २७ प्रतिशत उम्मेदवारी दिएर ३ दशमलव ७७ प्रतिशत मत पाएका छौं।
अहिले पार्टी प्रशिक्षणको अभियान सुरु गरेका छौं। सँग–सँगै एकताको अभियान सुरु गर्न हामीसँग सबैभन्दा धेरै विचार मिल्ने पार्टी एकीकृत माओवादीसँग सहकार्यका निम्ति समन्वय समिति बनाएर जाने प्रस्तावना अघि सारेका छौं। हामीले राष्ट्रियता र लोकतन्त्रप्रति भूमिका निर्वाह गरेका छौं। वैचारिक अभियान पनि सुरु गरेका छौं।
स्थानीय तहमा एमालेबाट छुट्टिँदा झन्डै १० प्रतिशत जनप्रतिनिधि लिनुभएको थियो तर गएको निर्वाचननमा ३ दशमलव ७७ प्रतिशतमा झर्नुभयो भन्ने कोणबाट पनि चर्चा हुन्छ नि?
त्यो चर्चा सान्दर्भिक छ जस्तो लाग्दैन। दोस्रो कुरा ठाउँहरु चाहिँ धेरैजसो वडाका वडाध्यक्ष र वडासदस्य जस्ता लिएका थियौं। अहिले हामीले महानगर र उपमहानगर नै प्राप्त गरेका छौं। करिब ८ पालिकामा सेट नै विजयी बनाएका छौं।
६ वटा पालिकामा हामीले एकल उम्मेदवारी दिएका हौं। केही ठाउँमा निर्विरोध भएका छौं। महत्वपूर्ण पदका हिसाबले कमजोर देखिँदैन, संख्याका हिसाबले अलिकति कम देखिएको हो।
पुनर्गठन भन्नुभएको छ तर तपाईंहरु आफ्नै अस्तित्व संकटमा पर्ने डरले माओवादी केन्द्रसँग चुनावअघि नै एकता खोजिरहेको जस्तो देखिएको छ नि?
आफ्नो अस्तित्वका लागि लत्रिदैछ भन्ने कुरा जुन छ, यी मनोगत कुरा हो। हामीले २७ प्रतिशत उम्मेदवारी दिएर राष्ट्रिय पार्टी हुनका निम्ति चाहिनेभन्दा बढी मत प्राप्त गरेका छौं। सबै ठाउँमा उम्मेदवारी दिने हो भने जनसमर्थनको अवस्था राम्रै देखिन्छ। हामीले आत्तिनुपर्ने वा अस्तित्वका निम्ति कसैसँग जानुपर्ने भन्ने कुरै होइन।
माओवादी केन्द्रसँग एकताका लागि समिति बनाउनुको कारण के हो?
हामीले कम्युनिष्ट एकता गरेर अगाडि बढ्नुपर्छ। त्यसका लागि सबैभन्दा पहिले कोसँग हात मिलाउने भन्दा जो निकट छ, हामीसँग प्रतिगमनविरुद्ध सँगै लडेको थियो। जोसँग एकता भइसकेको थियो, जोसँग आज हाम्रा धेरै कुरा मिल्छन्, त्यसैसँग पहिले हात बढाएको हो। छलफल प्रारम्भ गर्ने कुरा गरेका हौं। एकताका आधार हेरौं।
हामी दुई पार्टी सँग–सँगै अरु पार्टी पनि लिएर नेपाली कम्युनिष्ट आन्दोलनलाई एकताबद्ध बनाउन के गर्न सकिन्छ भनेर एकै ठाउँमा छलफल गर्न समिति बनाएका हौं। सहकार्य सघन बनाउन खाका निर्माण गर्न संयोजन समिति बनाएर अघि जान खोजेका हौं। सहकार्य त हामीले राजनीतिक हिसाबले जतिबेला विद्रोह गरेका थियौं, त्यही बेलादेखि छँदै छ नि।
तत्कालीन एमाले केपी शर्मा ओलीको पार्टी चलाउने शैली र संसद् विघटनविरुद्ध थियो। विद्रोहको औचित्य पुष्टि भयो? एमाले र ओलीलाई साइजमा राख्न सफल भएको मूल्यांकन छ कि छैन?
ओली कहाँ पुग्छन्, एमाले कहाँ जान्छ, त्यो हाम्रो विषय होइन। उनीहरु कुन साइजमा बस्छन्, त्यो हाम्रो सरोकार होइन। हाम्रो विषय भनेको ओलीले अगाडि सारेको विचार गलत छ। खाली कार्यशैली मात्रै होइन, उनले सारेको विचार र काम गलत छन् भनेका छौं।
ओलीको नेतृत्वमा एमालेमा रहेको नेतृत्व पंक्तिको काम सैद्धान्तिक रुपले गलत छ। वैचारिक हिसाबले पनि गलत बाटोमा छ। समाजवादतर्फ अघि बढ्ने बेला नभएको बताउँछ, एउटा कम्युनिष्ट नेता र पार्टी। कम्युनिष्ट पार्टीले समाजवादतर्फ जाने कुरा गर्दैन भने त्यो कम्युनिष्ट नै रहँदैन। कम्युनिष्ट विचारधारा नै त्यागिसकेको छ। धार्मिक विचार लिएर मार्क्सवाद बिर्सिसकेको छ। संविधान पनि तहस-नहस गरेर अघि बढ्यो भनेर हामी विद्रोहमा पुगेका हौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769576758.png)
-1764146706.png)
