तस्बिर: एपी
काठमाडौं– विश्वव्यापी खाद्य संकट टार्नका लागि भनेर रुस र युक्रेनबीच भएको सम्झौताअनुसार युक्रेनबाट खाद्यान्नको निर्यात सुरु भएको छ।
बीबीसीका अनुसार खाद्यान्न बोकेको एक जहाजले युक्रेन छाडेको छ। युक्रेनको ओडेसा बन्दरगाहबाट खाद्यान्न बोकेको जहाज लेबनानका लागि छुटेको टर्किको डिफेन्स मन्त्रालयले जानकारी दिएको छ।
सिएरा लियोनको ध्वजावाहक जहाज 'राजोनी'ले २६ हजार टन खाद्यान्न बोकेको अन्तर्राष्ट्रिय सञ्चारमाध्यमहरुले जनाएका छन्। यो जहाज मंगलबार टर्कीको इस्तानबुल आइपुग्ने अपेक्षा गरिएको छ।
अघिल्लो हप्ता मात्रै रुस र युक्रेनका अधिकारीबीच टर्कीमा एउटा 'मिरर' सम्झौता भएको थियो। विश्वव्यापी रुपमा बढिरहेको खाद्य संकटको समस्यालाई सम्बोधनका लागि भन्दै रुस युक्रेनबाट खाद्यान्न निर्यातका लागि सम्झौता गर्न तयार भएको थियो।
सम्झौताअनुसार युक्रेनको कालो सागर (ब्ल्याक सी) हुँदै खाद्यान्न निर्यात हुन सक्नेछ।
यो सम्झौतापछि युद्धका बीच युक्रेनमा थन्किएको लाखौं टन खाद्यान्न निर्यात गर्न सकिने अपेक्षा गरिएको छ।
गत फेब्रुअर २४ मा रुसले युक्रेनमाथि हमला गरेपछि धेरै देशमा खाद्य संकट निम्तिरहेको छ। बढ्दो खाद्य संकटलाई सम्बोधन गर्नेगरी दुई देश युद्धकै बीच सम्झौता गर्न तयार भएका हुन्।
यो सम्झौता अहिलेको लागि ४ महिनासम्म लागू हुनेछ। यसका लागि समन्वय र निगरानीको काम टर्कीको सहर इस्तानबुलमा गरिनेछ। यहाँ संयुक्त राष्ट्रसंघ, टर्की, रुस र युक्रेनका अधिकारीहरु काम गर्नेछन्।
सम्झौताअनुसार समुद्रको बाटोबाट खाद्यान्न ढुवानी गर्ने मालवाहक जहाजमाथि रुसले आक्रमण गर्ने छैन। रुसले ती बन्दरगाहमा पनि आक्रमण गर्नेछैन, जहाँबाट खाद्यान्नको सप्लाइ गरिनेछ।
रुसले युक्रेनमाथि आक्रमण गरेयता विश्वका धेरै देशमा गहुँ र गहुँबाट बन्ने खाद्य पदार्थको संकट निम्तिएको थियो। यस्तै, खाने पकाउने तेलको पनि मूल्य बढेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
