कहिले एमालेको लिंग पहिचान हुन बाँकी नै रहेको त कहिले नेपालमा कम्युनिस्टहरु नै नरहेको बताएर नयाँशक्ति संयोजक बाबुराम भट्टराई चर्चा र विवादमा तानिँदै आएका छन् । केहीअघि मात्र आफ्नो माउ पार्टी माओवादीसँग यो जुनीमा एकता सम्भव नरहेको अभिव्यक्ति दिएका भट्टराई यतिखेर त्यही एमाले–माओवादी गठबन्धनसँग एकता प्रक्रियामा जुटेका छन् । आखिर कसरी यो परिस्थिति निर्माण भयो ? भट्टराईसँग सरोजराज अधिकारीले गरेको संक्षिप्त संवाद :
एमालेको लिंग नै पहिचान नभएको पार्टी हो भन्नुहुन्थ्यो, उसैको नेतृत्वको वाम एकतामा सहभागी हुन लाग्नुभएछ । एमालेको लिंग पहिचान भयो?
अहिले विज्ञानको युगमा लिंग नै परिवर्तन गर्न पाइन्छ । पहिचानको कुरा ठूलो रहेन । मूल कुरा मुद्दाको हो । देशको समृद्धिको हो । त्यो मिलाएर अघि बढ्ने सहमति भएपछि बाँकी कुरा मिल्दै जान्छन्।
नेपालमा कम्युनिस्ट पार्टीको औचित्य छैन, कुनै पार्टी कम्युनिस्ट रहेनन् पनि भन्नुहुन्थ्यो । अहिले बृहत् कम्युनिस्ट एकतामा लाग्नुभयो, किन?
मैले मार्क्सवाद गलत हो कहिल्यै भनिनँ । द्वन्द्वात्मक भौतिकवादको औचित्य पनि अस्वीकार गरिनँ । मूल कुरा के हो भने नाम कम्युनिस्ट, व्यवहार दलाल पुँजीपतिको जस्तो देखियो नेपालका कम्युनिस्ट पार्टीहरुको । कम्युनिस्टको बोर्ड मात्र झुन्ड्याएर हुँदैन, व्यवहारमै कम्युनिस्ट हुनुपर्छ । यस अर्थमा नेपालमा कम्युनिस्ट पार्टी छैनन् भनेको हुँ।
अर्कोतर्फ सुधारको सम्भावना त जहाँ पनि रहन्छ । सबैले सच्चिएर अघि बढ्ने भनेपछि यो एकता प्रक्रिया अगाडि बढेको हो । हामी सबै नयाँ बन्ने दिशामा अघि बढ्ने हो । पुरानै ठाउँमा अडिएर रहने होइन । वामपन्थी–प्रगतिशीलहरु मिलेर नयाँ पार्टीको निर्माण गर्ने हो।
स्थानीय तहको चुनावी परिणामले ‘नयाँशक्ति’को अस्तित्व नै संकटमा परेको देखेर अत्तालिनुभएको त होइन?
बिल्कुल होइन । हामी स्पस्ट मूल्य–मान्यता र विचारधाराबाट अघि बढेका थियौं । त्यो ढिलो–चाँडो स्थापित भएरै छाड्थ्यो । त्यसैलाई अझ घनीभूत रुपमा अघि बढाउन हामीले एकता प्रक्रिया अगाडि बढाएका हौं । ५ ‘स’ का रुपमा रहेका मुलुकको बृहत्तर हितका ५ आधार भनेकै समृद्धि, सहभागितामूलक लोकतन्त्र, सुशासन, स्वाधीनता र समाजवाद हो । ५ ‘स’ का रुपमा अगाडि सारिएका हाम्रा यी एजेन्डामा अहिले पनि दृढ छौं । तिनै आधारमा टेकेर नै मुलुकको विकास र प्रगति गर्न सकिन्छ । लामो छलफल र वार्तापछि यसमा सबैको सहमति जस्तै देखियो, त्यसैले मिलेर अघि बढ्दा यो लक्ष्य छिटो प्राप्त गर्न सकिन्छ भन्ने निष्कर्षमा पुगेका हौं।
स्थानीय निर्वाचनमा नयाँशक्तिलाई जनताले खासै नपत्याएको देखेपछि सहकार्यको टेको खोजे जस्तो त देखियो नि?
म फेरि पनि भन्छु, मुख्य कुरा मुद्दा हो । त्यसलाई संख्यामा तुलना गरिनु हुँदैन । विचार र मुद्दा सही भएपछि त्यो ढिलो–चाँडो स्थापित हुन्छ नै । हाम्रो विचार र मुद्दा पनि स्थापित भएरै छाड्थ्यो । त्यसलाई गति दिन विचार मिल्ने जति एक भएर अघि बढ्न खोजिएको हो।
तपाईंकै शब्दको एक समयको ‘बुर्जुवा’ एमाले नेतृत्वमा यी कुरा कसरी सम्भव देख्नुभयो?
यसबीच हामीले धेरै छलफल गर्यौं । सबै सच्चिँदै अघि बढेर देशलाई स्थिरता, सुशासन र समृद्धितर्फ अगाडि बढाउने नै हामी सबैको प्रमुख ध्येय हो । अहिले ठूलो पार्टी हुनुका नाताले एमालेले यसको अगुवाई गरिरहेको छ । पार्टी एकतापछि हामी महाधिवेशनमा जान्छौं । विचार र नेतृत्व पनि क्रमशः रुपान्तरित हुँदै जान्छ।
कांग्रेसको लोकतान्त्रिक मोर्चाबाट चाहिँ प्रस्ताव आएन?
कांग्रेससँग हाम्रो कुरै मिल्दैन । ऊ मूलतः दक्षिणपन्थी पार्टी हो । जनजीविकाका सवालमा कांग्रेस पूरै निरपेक्ष छ । मुलुकको समृद्धि, स्वाधीनता, समावेशी लोकतन्त्र जस्ता कुरामा उसलाई कुनै चासो छैन । हामी वामपन्थी पृष्ठभूमिका भएकाले कहीँ न कहीँ जनताकै माझबाट उठेर आएका हौं । हाम्रा लागि जनजीविकाका सवाल प्रधान छ । मुलुकलाई समृद्धिको बाटोमा अघि बढाएर जनताका चाहना पूरा गर्नु नै हाम्रो प्रमुख ध्येय हो, हुनेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
