काठमाडौं– विशेष अदालतमा विचाराधीन मुद्दाका पक्षहरूले अब जिल्ला र उच्च अदालतहरूबाट अनलाइन तारेख लिन पाउने भएका छन्।
विभिन्न जिल्लामा रहेका सेवाग्राहीलाई अदालतसम्म आउन नपर्ने गरि सुविधा दिनका लागि यस्तो व्यवस्था गरिएको विशेष अदालतका प्रवक्ता दिपेन्द्रनाथ अधिकारीले बताए। विशेष अदालतको पूर्ण बैठकबाट सूचना प्रविधिको प्रयोग (अनलाइन)बाट तारिख लिने सम्बन्धी निर्देशिका, २०७२ पारित गर्दै विशेषले लागू गर्ने तयारी गरेको हो।
फुलकोर्टको निर्णयअनुसार यो व्यवस्था आगामी वैशाख १ गते देखि लागू हुने छ।
विशेष अदालतमा अनलाइन तारिख लिने सम्बन्धमा समन्वयका लागि शाखा अधिकृत भुपेन्द्र उपाध्याय, शाखा अधिकृत यज्ञराज रेग्मी र प्राविधिक टामलाल भुसाललाई चयन गरिएको प्रवक्ता अधिकारीले बताए।
पक्षहरूलाई अनलाइन तारिखको सुविधा उपलब्ध गराउनको लागि आवश्यक व्यवस्था, सहयोग तथा सहजीकरण गर्न १७ चैत २०७८ मा सर्वोच्च अदालतबाट आदेश भएको थियो। त्यस्तै, अनलाइनबाट तारिख लिनको लागि विशेष अदालतले निर्देशिकाको अनुसूची २ बमोजिम फारमको ढाँचा समेत बनाइसकेका छ।
सर्वोच्च अदालतको आज (चैत २० गते)को पत्रबाट अनलाइन तारिख सम्बन्धमा आवश्यक व्यवस्था, सहयोग तथा सहजीकरणका लागि सबै उच्च अदालत र जिल्ला अदालतहरूलाई परिपत्र गरिसकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
