काठमाडौं– गृहमन्त्री एवम् कार्यवाहक प्रधानमन्त्री बालकृष्ण खाणले पेट्रोलियम पदार्थको आपूर्तिमा देखिएको समस्या तत्काल समाधान गर्न निर्देशन दिएका छन्।
आपूर्ति सचिव गणेश पाण्डे, नेपाल आयल निगमका कार्यवाहक महानिर्देशक वीरेन्द्र गोइत र नेपाल पेट्रोलियम डिलर्स एसोसिएसनका महासचिव विश्व अर्याललाई शनिबार टेलिफोन गरेर खाणले तत्काल समस्या समाधान गर्न निर्देशन दिएका हुन्। खाणले अत्यावश्यक वस्तुमा समस्या देखिए सरकार नचाहँदा नचाहँदै कठोर हुन पर्ने पनि बताएका छन्।
व्यवसायीहरूले पेट्रलियम पदार्थ बेचे नबेचेको अनुगमन गर्न कार्यवाहक प्रधानमन्त्रीले आफूहरूलाई निर्देशन दिएको र आफूहरूले जिल्ला प्रशासन कार्यालय काठमाडौँको सहयोगमा अनुगमन गरेको निगमका कार्यवाहक महानिर्देशक गोइतले जानकारी दिए।
‘मन्त्रीज्यूबाट पेट्रोलियम पदार्थ विक्रि वितरण भए नभएको काठमाडौं जिल्ला प्रशासन कार्यालयसँगको समन्वयमा उपत्यकाका पम्पहरूमा अनुगमन गर्न निर्देशन भएको थियो,’ कार्यवाहक महानिर्देशक गोइतले भने, ‘हामीले उपत्यकाका २० बढी पम्पहरूमा अनुगमन गरेका छौँ। केहीले बेचेको, केहीले नबेचेको पायौँ । भोलि थानकोटको डिपो खुल्ला हुन्छ। त्यहाँ गएर ल्याएर बेच्न भनेर कागज गराएर आएका छौँ।’
विभिन्न माग राखेर पेट्रोलिय पदार्थको ढुवानी रोकेका व्यवसायीसँग शनिबार साँझ ५ बजे वार्ताको तयारी भइरहेको गोइतले जानकारी दिए।
डिलर्स एसोसिएसनका महासचिव अर्यालले पेट्रोलियम पदार्थमा देखिएको समस्या निगमसँग वार्ता गरेर टुंग्याउन गृहमन्त्री खाणले आग्रह गरेको बताए। ‘पेट्रोलियम पदार्थमा देखिएको समस्या निगमसँग वार्ता गरे टुंग्याउन भन्नुभएको छ,’ अर्यालले भने, ‘हामीले हाम्रा माग सामान्य छन्, निगमलाई भनिदिनुस्, हामी वार्तामार्फत् सहमति गर्न तयार छौँ भन्यौँ।’
व्यवसायी र डिजेल ढुवानीकर्ताहरूले डिजेलको भाउ बढेपछि भाडा पनि बढाइनु पर्ने, डिजेल पेट्रोल बोक्ने टयांकरको भाडा बढाइनु पर्नेलगायतका माग राखेर पेट्रोलियम पदार्थ विक्रि वितरण नगर्ने चेतावनी दिइरहेका छन्।
व्यवसायीहरुको आन्दोलनका कारण पेट्रोलियम पदार्थको ढुवानी नियमित हुन सकेको छैन। काठमाडौं उपत्यका सहित देशका प्रमुख सहरमा पेट्रोल पम्प अगाडि इन्धन भर्ने सवारी साधनको लामो लाइन लागेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
