काठमाडौं– गैर आवासीय नेपाली संघ (एनआरएनए) का नवनिर्वाचित अध्यक्षलगायत पदाधिकारीले मंगलबार प्रधानमन्त्री शेरबहादुर देउवा तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई छुट्टाछुट्टै भेटी १०औं विश्व सम्मेलनको छलफलबाट निस्केको निचोडसहित ज्ञापनपत्र बुझाएका छन्।
नवनिर्वाचित अध्यक्षहरु कुल आचार्य, डा. बद्री केसी तथा रबिना थापा, निवर्तमान अध्यक्ष कुमार पन्त, पूर्वअध्यक्ष भवन भट्टलगायत नवनिर्वाचित पदाधिकारीले नेपाली कांग्रेसको सानेपास्थित केन्द्रीय कार्यालयमा कांग्रेस सभापति तथा प्रधानमन्त्री देउवासँग भेटघाट गरेका थिए।
उक्त अवसरमा बोल्दै प्रधानमन्त्री देउवाले एनआरएनहरुलाई मिलेर अगाडि बढ्न सुझाव दिए। उनले एनआरएनहरु नेपालका अवैतनिक राजदूत हुन् भन्दै उनीहरुलाई विदेशी लगानी भित्र्याउन आग्रह गरे। उनले नेपालको विकासमा एनआरएनहरुले धेरै ठूलो योगदान पुर्याएको भन्दै एनआरएनहरुलाई साथ दिन सरकार तयार रहेको बताए।
नेपाली कांग्रेसका वरिष्ठ नेता रामचन्द्र पौडेलले एनआरएनहरुले उठाउंदै आएको दोहोरो नागरिकता, मतदानको अधिकारलगायत विषयमा कांग्रेस पार्टी सकारात्मक रहेको बताए।
कार्यक्रमको सुुरुमा नवनिर्वाचित अध्यक्ष कुल आचार्यले संघको तर्फबाट एक ज्ञापनपत्र पढेर सुनाएका थिए। ज्ञापनपत्रमा गैरआवासीय नेपाली नागरिकता संसदबाट छिट्टै पारित गर्न, पशुपति क्षेत्रमा एक सय कोठाको आधुनिक सुविधायुक्त एक श्रद्धाश्रम (वृद्धाश्रम) बनाउन जग्गा उपलब्ध गराई दिन, वैदेशिक रोजगारमा रहेका नेपालीका लागि सामाजिक सुरक्षा कार्यान्वयन तथा कम्तीमा १० अर्बको एनआरएन नेपाल विकास कोषको कार्यान्वयनमा देखिएका वाधा व्यवधान हटाउन आग्रह गरिएको छ।
उक्त अवसरमा बोल्दै नवनिर्वाचित अध्यक्ष रविना थापाले विदेशबाट फर्केर आएका महिलाका लागि आश्रय गृह (सेल्टर) खोल्न सरकारले सहयोग गर्नुपर्ने बताइन्। अर्का नवनिर्वाचित अध्यक्ष डा बद्री केसीले संघले कोभिडको बेला ५० देशमा २,५०० भन्दा बढी नेपालीहरुलाई सहयोग गरेको बताए। उनले संघले रुस–युक्रेन युद्धको चपेटामा परेका ५ सयभन्दा बढी नेपालीलाई एक हप्ता भित्रै उद्धार गरेको पनि जनाए।
माओवादी केन्द्रका अध्यक्ष प्रचण्डसंग भेट
%20pratibedan/d2653f66-759f-4d29-90bc-adfe0565fbb2.jpg)
मंगलबार बेलुका एनआरएनएका पदाधिकारीहरुले माओवादी केन्द्रका अध्यक्ष तथा पूर्व प्रधान मन्त्रीपुष्प कमल दाहाल ’प्रचण्ड’ संग भेट गरे।
खुमलटारस्थित प्रचण्ड निवासमा भएको भेटमा अध्यक्ष दाहालले तीन जना अध्यक्ष रहेको संघको कार्यसमितिलाई नै सरकारले मान्यता दिने स्पष्ट पारे। उनले अहिलेको अवस्थामा गैरआवासीय नेपालीहरुलाई एकतावद्ध भएर अघि बढ्न पनि आग्रह गरे। ‘तीन जना अध्यक्षभन्दा कस्तो कस्तो सुनिए पनि गैरआवासीय नेपाली संघ विशुद्ध सामाजिक संस्था भएकाले यसले नै सबैलाई गोलबद्ध गर्न सक्छ,’ उनले भने।
सो अवसरमा प्रमुख संरक्षक शेष घलेले सहमतिभन्दा बाहिर गएर अर्को समिति गठन गरेको तर्फ एनआरएनएका पदाधिकारीले ध्यानाकर्षण गराएपछि अध्यक्ष प्रचण्डले घलेसँग आफ्नो भेट भएमा उनलाई पनि यतै आएर गोलवद्ध हुन अनुरोध गर्ने बताए। नेपालीहरु फुटेरभन्दा पनि जुटेर अघि बढ्दा नेपाल र नेपालीको हित र समृद्धि तथा विकास निर्माणको चाहनाले पूर्णता पाउने विश्वास उनले व्यक्त गरे।
यस्तै, एनआरएनएलाई नागरिकता दिने सवालमा राजनीतिक दलहरुका बीचमा छलफल भइरहेको बताउँदै समस्या समाधानका लागि माओवादीको पनि सकारात्मक पहल हुने अध्यक्ष प्रचण्डले बताए। यसैगरी प्रवासमा रहेका नेपाली नागरिकहरुलाई अनलाइनबाट भए पनि सहभागी गराउने विषयमा दलहरुका बीचमा छलफल भइरहेको बताउँदै आउँदो स्थानीय तहको निर्वाचनमा सम्भव नभए पनि आसन्न प्रदेश र संघीय संसदको चुनावका लागि प्रयास भइरहेको उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766824868.png)
-1764146706.png)
-1763721444.png)
-1766648928.png)
