काठमाडौं– प्रहरी निरीक्षक (इन्स्पेक्टर) देखि नेपाली सेनाको सेकेण्ड लेफ्टिनेन्ट (क्याडेट)सम्मका प्रतिस्पर्धीहरुले म्यादी प्रहरी बन्न आवेदन दिएका छन्।
आउँदो वैशाख ३० गते हुने स्थानीय चुनावका लागि म्यादी प्रहरी बन्न इन्स्पेक्टरदेखि नेपाली सेनाको क्याडेटमा प्रतिस्पर्धा गरेकाहरुले समेत आवेदन दिएको महानगरीय प्रहरी परिसर काठमाडौंले जनाएको छ।
परिसरका एक अधिकृतका अनुसार आमाछोरीले नै म्यादी प्रहरीको फारम भरेका छन्। जसमा आमा यसभन्दा अघि तीन पटक म्यादी प्रहरी बनिसकेको र चौंथो पटकका लागि म्यादी बन्न आवेदन दिएको पाइएको छ। उनीसँगै आवेदन दिएका उनकी छोरी भने सेनाको क्याडेटमा समेत फारम भरेर प्रतिस्पर्धा गरेको पाइएको छ।
त्यसैगरी, इन्स्पेक्टरमा समेत प्रतिस्पर्धा गरेकाहरु समेत म्यादीको लाइनमा रहेका छन्। ‘यसले उनीहरुमा सुरक्षा निकायमा सेवा गर्ने चाहना अत्यधिक रहेको देखाउँछ’, एक अधिकृतले भने।
परिसर काठमाडौंमा आवेदन दिनेहरुमा ४६ जना स्नातक पास गरेकाहरू छन्।
देशभरबाट भने ३४१ जना स्नातक पास गरेकाहरुले आवेदन दिएका छन्। आवेदन दिनेमध्ये २२ हजार पूर्वम्यादी, ४१ सय पूर्वसुरक्षाकर्मी रहेको प्रहरी हेडक्वार्टरले जनाएको छ। १ लाख म्यादी प्रहरी माग भएकोमा २ लाख ९३ हजार २ सय ६३ जनाले आवेदन दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
