काठमाडौं– अटोरिक्सा भाडाको विषयमा विवाद हुँदा कैलालीको धनगढीमा एक भारतीय नागरिकको हत्या भएको छ।
हत्या आरोपमा दुई जना पक्राउ परेका छन्। हत्या आरोपमा अटो चालक बाजुरा खप्तड छेडेदह गाउँपालिका–२ का २४ वर्षीय राजेन्द्र बुढा र उनकै साथी सोही ठेगानाका २० वर्षीय भुपेन्द्र बुढा पक्राउ परेका हुन्।
फागुन २३ गते राति अन्दाजी ८ बजेतिर धनगढी उपमहानगरपालिका–५ केराबारीस्थित सडकको नालीमा एक व्यक्ति मृत भेटिएका थिए। प्रहरी अनुसन्धानको क्रममा मृत भेटिएका ती व्यक्ति भारत उत्तर प्रदेश सहेजापुरका ४२ वर्षीय कुलदीप गुप्ता रहेको खुलेको थियो।
त्यसपछि घटनाको अनुसन्धान सुदूरपश्चिम प्रदेश प्रहरी कार्यालय र जिल्ला प्रहरी कार्यालय कैलालीको विशेष टोली गरेका थिए। गुप्ता केही वर्षदेखि धनगढी उपमहानगरपालिका–४ शिवपुरी धाम नजिक डेरा गरी बस्ने गरेको खुलेको थियो। आठ महिना अघि स–परिवार भारत गई फागुन २१ गते उनी धनगढी फर्किएका थिए।
त्यसपछि उनको कान्छो भाइ सुमित गुप्ताकोमा फागुन २२ गतेदेखि बस्न थालेका थिए। सोही दिन बिहानदेखि उनले धनगढी–१ स्थित मिल्की फन आइसक्रिमका सञ्चालक वंश गोपाल मिश्राको पसलमा काम गर्न थालेका थिए।
ठेलामा आइसक्रिम लिएर कुलदीपले दिनभरी बेचेर मिश्रालाई १ हजार २४० रुपैयाँ समेत दिएका थिए। राति साढे ८ बजेतिर अदालत रोड नजिक दाजु प्रदीप गुप्ताकोमा गई मदिरा समेत सेवन गरी कुलदीप हिँडेका थिए ।
अनुसन्धानका क्रममा कुलदीप २२ गते राति ९ बजेर १२ मिनेट जाँदा धनगढी मेनरोड स्थित कारागार जानेबाटोबाट पश्चिम गइरहेको सिसी टिभी फुटेजमा देखिएको कैलालीका एसपी विश्व अधिकारीले बताए। त्यसपछि उनी पशुपती टोल जाने बाटोबाट मेनरोडमा निस्की पार्कमोडतिर गएको सिसी टिभीमा देखिएको थियो।
पार्कमोडबाट प्रदेश सभा भवन अगाडि निलो रङको अटो रिक्साको अगाडिको भागमा बसी पूर्वतर्फ आई नैनादेवीसम्म पुगेको सिसी टिभी फुटेजमा देखिएको थियो। प्रहरीले निलो रङको अटोको खोजी सुरु गरेको थियो। सो क्रममा २७ गते बिहान ८ बजे प्रहरीले कुलदीप चढेको से १ घ २८६६ नम्बरको अटो पहिचान गरेको थियो।
सोही क्रममा अटो चालक राजेन्द्र बुढालाई नियन्त्रणमा लिएर अनुसन्धान गर्दा कुलदीपको हत्या राजेन्द्र र उनका साथी भुपेन्द्र बुढाबाट भएको खुलेको एसपी अधिकारीले बताए।
रुवस होटल अगाडिको एउटा पसलमा मदिरा सेवन गरी जाईस्थित राजेन्द्र बुढाको डेरामा जाँदै गर्दा पार्कमोडमा कुलदीपसँग भेट हुँदा उनले जाली जाने भनेपछि कुलदीपलाई समेत राखेर उनीहरु तीनै जना नैनादेवी मन्दिर हुँदै चक्मेली बजारबाट शिवनगरको बाटो अगाडि बढेका थिए।
सोही क्रममा उनीहरुबीच भाडाको विषयमा विवाद हुँदा शिवनगरबाट जाई जाने सडकको कल्भर्टनजिक पुगेपछि कुलदीप गुप्ताले ‘नेपाली लोग’ भनेर गाली गरेपछि हात हालाहाल हुँदा उनको मृत्यु भएको आरोपितले प्रहरीसमक्ष बताएका छन्।
विवाद भएपछि भुपेन्द्रले अटोमा रहेको काठको टुक्राले समेत कुलदीपलाई प्रहार गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
