काठमाडौं- रुसी विदेशमन्त्री सर्गेई लाभ्रोभ र युक्रेनी विदेशमन्त्री दिमित्रो कुलेबाबीच भएको प्रथम चरणको वार्ता निष्कर्षबिहीन टुंगिएको छ।
टर्कीमा बिहीबार सम्पन्न प्रथम चरणको वार्तामा युद्धविरामबारे सहमति गर्न असफल भएको युक्रेनी विदेशमन्त्री कुलेबाले जानकारी दिए।
उक्त भेटपछि बोल्दै युक्रेनी विदेशमन्त्री कुलेबाले रुसी विदेशमन्त्री लाभ्रोभले युक्रेनसँग गरेको माग आत्मसमर्पणसरह भएको बताए।
यद्यपि, उनले युक्रेनी भूमिमा मानवीय सहायताका मुद्दामा समाधान खोज्ने प्रयास जारी राख्न दुई पक्ष सहमत भएको जानकारी दिए।
उनले तात्विक छलफल र समाधान खोज्ने परिदृश्यमा आफू पुन: भेट्न तयार रहेको समेत बताएका छन्।
‘म युद्ध अन्त्यका लागि, युक्रेनी नागरिकको पीडा अन्त्य गर्नका लागि र हाम्रो भू–भागलाई हस्तक्षेपकारी रुसी फौजबाट मुक्त पार्न वार्ता जारी राख्न चाहन्छु,’ उनले भने।
यता, रुसी विदेशमन्त्री लाभ्रोभले रुसको सैन्य कारबाही योजानाअनुरूप नै चलिरहेको दाबी गरे। युक्रेनलाई हतियार दिएर पश्चिमा राष्ट्रहरूले खतरनाक व्यवहार देखाएको उनले बताए।
रुससँग इच्छा नभए युद्ध रोक्न नसकिने उनको भनाइ थियो।
रुसी विदेशमन्त्री लाभ्रोभले रुसको सुरक्षा चासोप्रति कसैले वास्ता नगरेको भन्दै अमेरिकाले युक्रेनी भूमिलाई जैविक अस्त्र विकास गर्न प्रयोग गरेको आरोप लगाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
