काठमाडौं- भारतको पञ्जावमा आम आदमी पार्टी दुई तिहाइको जिततर्फ उन्मुख देखिएको छ।
बिहीबार जारी मतगणना अनुसार आपले विधानसभाको ११७ सिटमध्ये अहिलेसम्म ५४ सिटमा जीत हात पारेको छ। जारी मतगणना अनुसार आपका उम्मेदवारले ३८ सिटमा अग्रता कायम गरिरहेका छन्।
दोस्रो स्थानमा कांग्रेस रहेको छ जसले ८ सिटमा जीत हात पारेको छ र १० सिटमा अग्रता बनाएको भारतीय सञ्चारमाध्यहरुले जनाएका छन्।
पञ्जाबमा मुख्यमन्त्री चरणजीत सिंह चन्नीले पराजय व्यहोरेका छन् भने अन्य राजनीतिक हस्तीहरुलाई आपका उम्मेदवारले पराजित गरेका छन्। पञ्जाब कांग्रेस प्रमुख नवजोत सिंह सिद्धुसहितका नेता पराजित भएका हुन्।
यससँगै पञ्जावमा आपका तर्फबाट भगवन्त मान मुख्यमन्त्री बन्ने भएका छन्।
सन् २०१७ को निर्वाचनमा जम्मा २२ सिट जितेको आपले यसपल्ट पञ्जावमा झण्डै दुई तिहाइ जित हात पार्न लागेको हो।
सन् २०१७ मा ७७ सिटसहित सरकार बनाएको भारतीय कांग्रेस भने यसपल्ट नराम्ररी पछारिएको छ।
पञ्जावमा आपले जनतालाई सोधेर मुख्यमन्त्रीका उम्मेदवार छनोट गरेको थियो। ‘जनता चुन्नेछन् आफ्ना मुख्यमन्त्री’ अभियानअन्तर्गत आपले फोन र सामाजिक सन्जालमार्फत् राय मागेको थियो। ९३ प्रतिशतले भागवान्त मनलाई मुख्यमन्त्री बनाउनुपर्ने मत प्रकट गरेका थिए। अभियानमा २२ लाखको हाराहारीमा जनता सहभागी थिए।
सन् २०१४ देखि लोकसभा सदस्य रहेका उनी २०१९ मा पञ्जाबबाट लोकसभा चुनाव जित्ने एक मात्र आप उम्मेदवार हुन्।
पञ्जावमा आपको उदयसँगै भाजपा र भारतीय कांग्रेसको विकल्पका रुपमा आप अघि बढ्न थालेको विश्लेषण भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
