एमसीसीले देशको अर्थतन्त्रमा टेवा पुर्‍याउँछ : प्रकाशमान सिंह

अर्थ समाचार

रासस बुधबार, फागुन २५, २०७८ १४:५८

फाइल तस्बिर।

काठमाडौं– नेपाली कांग्रेसका नेता प्रकाशमान सिंहले मिलेनियम च्यालेन्ज कर्पोरेसन (एमसीसी)ले नेपालको अर्थतन्त्रमा टेवा पुर्‍याउने बताएका छन्।

काठमाडौं निर्वाचन क्षेत्र नम्बर १ अन्तर्गत शङ्खमूलमा आयोजना गरेको बुथ कार्यसमिति गठन समारोहमा बोल्दै उनले एमसीसी नेपालको हितमा रहेकाले कांग्रेसले प्रतिपक्षमा रहेको बेलामा पनि एमसीसीको वकालत गरेको स्मरण गरे।

'एमसीसी मुलुकको अर्थतन्त्रलाई टेवा पुर्‍याउने काममा लगानी हुन थालेकाले नेपालको हितमा छ भनेर कांग्रेसले सरकार र प्रतिपक्षमा हुँदा आवाज उठाउँदै आएको हो', उनले भने। उनले विपक्षी दलले सरकारमा हुँदा एउटा र सरकारबाट बाहिरिएपछि अर्को कुरा गर्न नमिल्ने टिप्पणी गरे।

सिंहले केही दलले एमसीसीका बारेमा राष्ट्रघाती भनेर गलत प्रचार गर्दै हिँडेको भन्दै आपत्ति जनाए। 'के एमसीसी राष्ट्रघाती भएको भए संसद्‌बाट पारित हुन्थ्यो त?', सिंहको प्रश्न छ। एमसीसीका बारेमा जनतालाई घरघरमा गएर बुझाउने जिम्मा कांग्रेसको काँधमा आएको उनको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।