काठमाडौं- पूर्वमन्त्री एवं राष्ट्रिय प्रजातन्त्र पार्टी (राप्रपा)का नेता विक्रम पाण्डेको भ्रष्टाचारसम्बन्धी मुद्दाको सुनुवाइ फेरि सरेको छ। मंगलबारका लागि पेसी तोकिए पनि उक्त मुद्दाको सुनुवाइ हेर्न नभ्याउने हुँदै सरेको हो।
न्यायाधीशद्वय अब्दुल अजिज मुसलमान र नित्यानन्द पाण्डेको इजलासमा दोस्रो नम्बरमा पेसी रहेको पाण्डेको मुद्दा हेर्न नभ्याउनेमा परेको हो।
२०७७ चैत ४ गते अन्तिम सुनुवाइ सुरु भएको यो मुद्दा विशेष अदालतका तत्कालीन अध्यक्षसहितका न्यायाधीशको सरुवा भएपछि पुन: सुनुवाइमा गएको थियो। पछिल्लो दुई महिनामा यसको लगातार पेसी चढेको छ। पछिल्लोपटक २०७८ कात्तिक ७ गते बहस नोट पेस गर्न दुई न्यायाधीशको इजलासले आदेश गरेको थियो। उक्त आदेशपछि कात्तिक २८ गते फेरि पेसीमा चढे पनि हेर्न नभ्याउने हुँदै सरेको थियो। हेर्न नभ्याउने हुँदै मुद्दा सरेको यो दोस्रोपटक हो।
अख्तियार दुरुपयोग अनुसन्धान आयोगले सिक्टा सिँचाइ आयोजनमा साढे आठ अर्ब रुपैयाँ भ्रष्टाचार भएको दाबी गर्दै २०७५ मङ्सिर २१ गते मुद्दा दायर गरेको थियो। सिक्टा सिँचाइ आयोजनामा कमसल काम गरी भ्रष्टाचार गरेको अभियोगमा पाण्डेसहित २१ जनाविरुद्ध मुद्दा दायर भएको थियो। आयोगले राष्ट्रिय गौरवको आयोजना सिक्टा सिँचाइको नहर निर्माणमा कमसल काम गर्ने कार्यमा संलग्न पाण्डेसहित २१ जनाबाट आठ अर्ब रुपैयाँ असुल हुनुपर्ने दाबी गरेको छ। अख्तियारले पाण्डेविरुद्ध मात्र दुई अर्ब १३ करोड रुपैयाँको बिगो दाबी गरेको छ।
पूर्वमन्त्री तथा कालिका कन्स्ट्रक्सनका प्रमुख पाण्डेसहितको मुद्दामा दुई वर्षपछि एउटै आदेश दोस्रोपटक गरेको हो। २०७६ जेठ १७ गतेबाट उक्त मुद्दाको प्रक्रियागत क्रम सुरु भएको थियो।
उक्त मुद्दाको पहिलो सुनुवाइ २०७६ भदौ ५ गते भएको थियो। विशेष अदालतका न्यायधीशत्रय शिवराज अधिकारी, बालेन्द्र रुपाखेती र रवि शर्मा अर्यालको इजलासले साक्षी बुझ्ने आदेश गरेको थियो। उक्त इजलासले २०७६ मङ्सिर २४ गते आयोजनाको निर्माणबारे राय दिन विशेषज्ञ झिकाउने आदेश गरेको थियो। पाण्डे २०७५ माघ २ गते धरौटीमा छुटेका थिए।
अख्तियारले पाण्डेसहित आयोजना प्रमुखहरू सर्वदेव प्रसाद, सरोजचन्द्र पण्डित, दीलिपबहादुर कार्की, रमेश बस्नेत, आयोजनाका नौ जना सीडीई इन्जिनियर, सिँचाइ विभागका तीन इन्जिनियर, कालिका कन्स्ट्रक्सनका प्रबन्ध निर्देशक र तीन जना इन्जिनियरविरूद्ध भ्रष्टाचार मुद्दा दायर गरेको थियो।
अख्तियारले प्रतिवादी कायम गरेकाहरुमा युवराज क्षेत्री भनिने युवबहादुर क्षेत्री, हेमनिधि शर्मा, अरुणकुमार चौधरी, दीलिपबहादुर कार्की, सरोजचन्द्र पण्डित, सूर्यदेव थापा क्षेत्री, योगेन्द्र मिश्र, श्यामबहादुर कार्की, सुशीलचन्द्र देवकोटा, प्रेमराज घिमिरे, वीरसिंह धामी, प्रकाशबहादुर कार्की, मिनराज ढकाल, आशिषभद्र खनाल, कमलप्रसाद रेग्मी, सर्वदेव प्रसाद, रमेश बस्नेत, उद्ववराज चौलागाई, रविनाथबाबु श्रेष्ठ र कृष्णप्रसाद सुवेदी पनि छन्।
पाण्डेको कम्पनीले कमसल निर्माण गरेपछि सिक्टा नहर परीक्षणकै क्रममा दुई पटक भत्किएको थियो। मूल नहरको डिजाइनमा नै त्रुटि र निर्माणका क्रममा आयोजनामा खटिएका प्राविधिक, कन्सल्टेण्ट, निर्माण व्यवसायीले पर्याप्त सुपरभिजन नगरेको अख्तियारको दाबी छ।
सिँचाइ आयोजनामा कार्यरत कर्मचारीहरूको संलग्नतामा माटोको गुणस्तर परीक्षण तथा त्यसको उपयुक्तता, विस्तृत आयोजना प्रतिवेदनको तयारीबिना गुणस्तरहीन नहर निर्माण भएको अख्तियारको अभियोगपत्रमा दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
