काठमाडौं- पछिल्लो १० वर्षमा लाभांश वितरण गर्ने वाणिज्य बैंकहरूमध्ये नबिल बैंक अग्रस्थानमा रहेको छ। नबिलले उक्त अवधिमा औसत ४५ प्रतिशतका दरले लाभांश वितरण गरेको तथ्यांक छ।
गत आर्थिक वर्षको नाफाबाट धेरै लाभांश घोषणा गर्नेमा पनि नबिल बैंक अगाडि रहेको छ। नबिलले गत वर्षको मुनाफबाट आफ्ना लगानीकर्तालाई ३८ प्रतिशत लाभांश दिने घोषणा गरेको छ।
नबिल बैंकले आर्थिक वर्ष २०६६/६७ देखि २०७६/७७ सम्म क्रमशः ७० प्रतिशत, ३० प्रतिशत, ६० प्रतिशत ६५ प्रतिशत, ६५ प्रतिशत, ३४.८४ प्रतिशत, ४५ प्रतिशत, ४८ प्रतिशत, ३४ प्रतिशत, ३४ प्रतिशत र ३५.२६ प्रतिशत लाभांश वितरण गरेको छ।
नबिलपछि धेरै लाभांश बाँड्ने बैंक स्ट्याण्डर्ड चार्टर्ड रहेको छ। यस बैंकले १० वर्षको अवधिमा औसत ४३ प्रतिशतका दरले लाभांश वितरण गरेको तथ्यांक छ।
उक्त अवधिमा सबैभन्दा न्यून लाभांश वितरण गर्नेमा प्रभु बैंक रहेको छ। प्रभुले १० वर्षमा औसत ३.५८ प्रतिशतका दरले लाभांश बाँडेको तथ्याङ्क छ। प्रभुपछि नेपाल बैंक लिमिटेडले औसत ४.१० प्रतिशत लाभांश वितरण गरेको तथ्याङ्कमा देखिन्छ। यी दुई बैंकले लामो समयसम्म लाभांश वितरण गर्न नसकेकाले १० वर्षको लाभांश इतिहासमा पछि परेका हुन्।
प्रभु बैंकले आर्थिक वर्ष २०७४/७५ देखि आफ्ना लगानीकर्तालाई लाभांश वितरण सुरु गरेको हो। यस बैंकले उक्त आर्थिक वर्षमा लगानीकर्तालाई आठ प्रतिशत बोनस सेयर र कर प्रयोजनका लागि ०.४२ प्रतिशत नगद लाभांश गरी ८.४२ प्रतिशत लाभांश वितरण गरेको थियो। प्रभुले आर्थिक वर्ष २०७५/७६ र २०७६/७७ मा लगानीकर्तालाई क्रमशः १६.८४ प्रतिशत र १०.५३ प्रतिशत लाभांश वितरण गरेको छ।
पछिल्लो १० वर्षमा लाभांश न्यून दिने दोस्रो वाणिज्य बैंक नेपाल बैंक रहेको छ। यस बैंकले आर्थिक वर्ष २०७५/६७ देखिमात्र लगानीकर्तालाई लाभांश वितरण गरेको देखिन्छ। नेपाल बैंकले उक्त आर्थिक वर्षमा लगानीकर्तालाई १५ प्रतिशत बोनस सेयर र कर प्रयोजनका लागि १० प्रतिशत नगद लाभांश वितरण गरेको थियो। यस्तै आर्थिक वर्ष २०७६/७७ मा १२ प्रतिशत बोनस सेयर र चार प्रतिशत नगतसहित १६ प्रतिशत लाभांश वितरण गरेको थियो।
दश वर्षको अवधिमा औसत पाँच प्रतिशतभन्दा माथि तथा छ प्रतिशतभन्दा कम लाभांश वितरण गर्ने बैंक सिभिल र सेञ्चुरी छन्। यी बैंकले १० वर्षको अवधिमा औसतमा क्रमशः ५.४२ प्रतिशत र ५.९७ प्रतिशत लाभांश दिएका छन्। छ प्रतिशतभन्दा माथि तथा सात प्रतिशतभन्दा कम औसतमा नाफा दिने बैंक जनता बैंक थियो। उक्त बैंकले आर्थिक वर्ष २०७८/६९ देखि २०७५/७६ सम्म औसतमा ६.६३ प्रतिशत लाभांश वितरण गरेको थियो। आर्थिक वर्ष २०७६/७७ देखि भने जनता बैंक ग्लोबल आईएमईसँग मर्ज भएर संयुक्त कारोबार गरिरहेको छ।
मेगा बैंकले १० आर्थिक वर्षभित्र औसतमा ८.९५ प्रतिशत लाभांश वितरण गरेको छ। यस बैंकले लगानीकर्तालाई आर्थिक वर्ष २०६९/७० देखि लाभांश वितरण गर्दै आएको छ। मेगा बैंकले आर्थिक वर्ष २०७७/७८ मा १० प्रतिशत बोनस सेयर र कर प्रयोजनका लागि २।०७ प्रतिशत नगद लाभांश वितरण गर्ने घोषण गरेको छ।
माछापुच्छ्रे र नेपाल क्रेडिट एण्ड कमर्स (एनसीसी) बैंकले १० वर्षको अवधिमा क्रमशः औसत १०.२७ प्रतिशत र १०.५४ प्रतिशत लाभांश वितरण गरेका छन्।
गत आर्थिक वर्षको नाफाबाट लाभांश प्रस्ताव गरिसकेका बैंक
हालसम्म २३ वटा वाणिज्य बैंकले गत आर्थिक वर्षको नाफाबाट लगानीकर्तालाई लाभांश प्रस्ताव गरिसकेका छन्। अझै चारवटा बैंकको लाभांश घोषणा हुन बाँकी छ।
नेपाल राष्ट्र बैंकको नियमअनुसार बैंक तथा वित्तीय संस्थाले आर्थिक वर्ष सुरु भएको छ महिना (पुस मसान्त) सम्ममा साधारणसभा बोलाइसक्नुपर्ने र गत आर्थिक वर्षको नाफाबाट लगानीर्तालाई लाभांश वितरण गरिसक्नुपर्ने व्यवस्था रहेको छ। सोही व्यवस्था अनुसार बैंकहरूले आफ्ना सेयरधनीलाई लाभांश घोषणा गरेका हुन्।
हालसम्म गत आर्थिक वर्षको नाफाबाट लाभांश घोषणा गरेका बैंकहरुमध्ये सबैभन्दा धेरै दिनेमा नबिल बैंक नै रहेको छ। उक्त बैंकले गत आर्थिक वर्षको नाफाबाट लगानीकर्तालाई ३८ प्रतिशत लाभांश घोषणा गरेको छ। यस्तै, गत आवको नाफाबाट सबैभन्दा धेरै लाभांश दिने दोस्रो बैंक हिमालयन बैंक रहेको छ। यस बैंकले आफ्ना लगानीकर्तालाई २६ प्रतिशत लाभांश दिने प्रस्ताव गरेको छ।
यस्तै गत आर्थिक वर्षको नाफाबाट सानिमा बैंकले १७.८९ प्रतिशत, नेपाल बैंकले १७ प्रतिशत, नेपाल इन्भेस्टमेन्ट बैंकले १६ प्रतिशत, सिटिजन्स बैंकले १६ प्रतिशत, एनएमबि बैंकले १५.८० प्रतिशत, एनआईसी एसिया बैंकले १५.७९ प्रतिशत, नेपाल बंगलादेश बैंकले १५.५० प्रतिशत, सिद्धार्थ बैंकले १४.२५ प्रतिशत, प्राइम बैंकले १५ प्रतिशत, माछापुच्छ«े बैंकले १४ प्रतिशत लाभांश वितरण गर्ने भएका छन्।
यस्तै, गत आर्थिक वर्षको नाफाबाट मेगा बैंकले १२.०७ प्रतिशत, सिभिल बैंकले ८.४२ प्रतिशत, लक्ष्मी बैंकले ११.५० प्रतिशत, नेपाल क्रेडिट एण्ड कमर्स बैंकले १०.८१ प्रतिशत, प्रभु बैंकले १२.६३ प्रतिशत, बैंक अफ काठमाडूले १४ प्रतिशत, ग्लोबल आईएमएई बैंकले १३.५० प्रतिशत, स्ट्यान्डर्ड चार्टर्ड बैंकले १०.०६ प्रतिशत, एभरेष्ट बैंकले १०.३२ प्रतिशत, कुमारी बैंकले ८.६७ प्रतिशत र सन्राइज बैंकले सात प्रतिशत लाभांश प्रस्ताव गरेका छन्।
कृषि विकास बैंक, सेञ्चुरी बैंक र नेपाल एसबीआई बैंकले अझै पनि गत आर्थिक वर्षको लाभांश घोषणा गरेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
