फाइल तस्बिर
काठमाडौं– यस वर्ष वर्षाका कारण देशभरका २४८ सडकमा क्षति पुगेको छ। क्षति पुगेका दुई सय ४६ सडक पुनर्निर्माण गरिए पनि अझै दुई वटा सडक खुल्न सकेको छैन। गत जेठ अन्तिम सातादेखि कात्तिकको पहिलो सातासम्म परेको वर्षाका कारण ती सडकमा क्षति पुगेको थियो।
बझाङको जालिबगर र नारुगाडमा सडक अहिले पनि अवरुद्ध छ। सेती नदीले दुई स्थानमा गरी झण्डै पाँच सय मिटर सडक बगाएको छ । नदीमा पानीको बहाव कम भएपछि मात्रै सडक खुलाउन सकिने सडक विभागले जनाएको छ।
यस्तै सुर्खेत–दैलेख–महावुलेख–गाल्जे नाग्मा–गमगढी–नाक्चेलाग्ना सडकअन्तर्गत जुम्लाको जिया भिरमा सडक अवरुद्ध छ। कात्तिक १७ गते सुक्खा पहिरोका कारण सो सडक अवरुद्ध भएको थियो। उपकरणको प्रयोग गरी सडक खुलाउने प्रयास भइरहेको विभागले जनाएको छ।
जेठदेखि १४६ सडक आंशिक रुपमा मात्रै सञ्चालनमा रहेका विभागले जनाएको छ। हाल एक सय सडक मात्रै पूर्णरुपमा सञ्चालनमा छन्। सडक अवरुद्ध हुनासाथ सवारीसाधन एकतर्फी रुपमा सञ्चालनको व्यवस्था गरिएको थियो। वर्षा रोकिएकाले दुईतर्फी सडक खुलाउने विभागको योजना छ।
विगत वर्षभन्दा बढी वर्षा भएकाले यस वर्ष सडक र पुलमा बढी क्षति पुगेको छ। सबैभन्दा लामो समयसम्म बेसीशहर–चामे सडक अवरुद्ध भएको थियो। कतिपय सडक असारमा अवरुद्ध भएपनि कात्तिकको वर्षाले पुनः अवरुद्ध भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
