काठमाडौं- गैरआवासीय नेपाली संघ (एनआरएनए), एनसीसी जापानको चुनावमा भएको धाँधलीको छानबिन गर्न माग गर्दै नेपाल प्रहरीको साइबर ब्यूरोमा उजुरी परेको छ।
एनसीसी जापानका केही पञ्जीकृत सदस्यहरुले आफूहरु मताधिकारबाट वञ्चित भएको र आफ्नो नामबाट अरु कसैले आफूलाई थाहा नै नदिइ मतदान गरेको भन्दै छानबिनका लागि उजुरी दिएका हुन्।
जापानमा नयाँ कार्यसमिति चयनका लागि गत जुलाई ३० मा अनलाइन मतदान भएको थियो। सो मतदानमा निर्वाचन समितिसँगको मिलेमतोमा केही व्यक्तिहरुले एउटै कम्प्युटरबाट सयौं व्यक्तिको भोट खसालेको र सम्बन्धित मतदातालाई त्यसबारेमा जानकारीसमेत नभएको बताइएको छ।
‘एनआरएनए जापानको १०औं अधिवेशनको लागि डिजिटल प्रक्रियाबाट भरिएको हाम्रो फाराम इमेल हाम्रो जानकारी एवम् हाम्रो अनुमति नलिइकन तेस्रो व्यक्तिले हाम्रो इमेल परिवर्तन गरी मतदान गरेको हुनसक्ने हुनाले उचित छानबिन गरीपाउँ,’ साइबर ब्यूरोमा पठाइएको निवेदनमा उल्लेख छ।
‘तेस्रो व्यक्ति वा असम्बन्धित व्यक्तिले हाम्रो इमेल अनुमतिबिना फेरबदल गरी मतदान गरी हाम्रो मतदान गर्न पाउने हक अधिकारबाट वञ्चित गरिएको छ, जुन नेपाल तथा अन्तर्राष्ट्रिय साइबर कानुनअन्तर्गत अपराध हुन आउँछ,’ निवेदनमा भनिएको छ, ‘त्यसैले उक्त व्यक्ति वा समूह जो कोही भए पनि कानुनबमोजिम छानबिन गरी साइबर कानुनअन्तर्गत कारबाही गरीपाउँ।’
गैरआवासीय नेपाली संघ नेपाल सरकारको कानुनअन्तर्गत परराष्ट्र मन्त्रालयमा दर्ता भएको संस्था हो। संघमा हुने अनियमितताको छानबिनमा नेपालको कानुन सीधै आकर्षित हुन्छ। एनआरएन जापानमा भएको चुनावमा गरिएको धाँधलीको छानबिन गर्न माग गर्दै परराष्ट्र मन्त्रालयमा पनि उजुरी परेको छ।
निर्वाचनमा धाँधली भएको प्रमाणसहित आईसीसीका दुई तथा अध्यक्षका चार जना उम्मेदवारसहित २९ जना उम्मेदवारले तत्कालै निर्वाचन समितिमा उजुरी दिएका थिए। उम्मेदवारहरुले संघको आईसीसीमा पनि छानबिनका लागि निवेदन दिएका थिए।
उजुरीपछि संघले छानबिन समिति बनाएर प्रतिवेदन सार्वजनिक नगर्दै आईसीसीका केही उच्च पदाधिकारीहरुको दबाबमा निर्वाचन समितिले एक पक्षलाई निर्वाचित भएको प्रमाणपत्र दिँदै शपथ गराएपछि यो विवाद ब्यूरोसम्म आइपुगेको हो।
के हो विवाद?
एनसीसीको नयाँ नेतृत्व चयनका लागि जुलाई ३० तारिखमा भएको चुनावमा तीन हजार ६१५ नक्कली भोट हालिएको तथा एक हजार १०० मतदातालाई भोट हाल्न इमेल र मेसेज नै नपठाइएको दाबी निवेदकहरुको छ।
निर्वाचनलगत्तै दुई जना आईसीसी सदस्य, अध्यक्षका चार जना उम्मेदवारहरु, वरिष्ठ उपाध्यक्षका उम्मेदवार एक जना, उपाध्यक्षका उम्मेदवार सात जना, महासचिव, कोषाध्यक्ष तथा सदस्यका उम्मेदवार लगायत २९ जनाले एनआरएनए जापानको अध्यक्ष मण्डललाई पत्र लेखी विश्वासिलो आईटीविज्ञ राखी छानबिन गरेर यथार्थ बाहिर ल्याएपछि मात्र निर्वाचन परिणाम घोषणा गर्न माग गरेका थिए। बहुसंख्यक उम्मेदवारहरु नै छानबिनको पक्षमा उभिएको दाबी गरिएको छ।
'नियोजित कथित निर्वाचन एउटा धोका हो। यो बिहारी शैलीमा गरिएको मजाकबाहेक अरु केही होइन, यस सम्बन्धमा सप्रमाण पेस गरेका छौं,' केन्द्रीय अध्यक्ष कुमार पन्तसमेतलाई बोधार्थ दिइएको उजुरीपत्रमा भनिएको छ।
त्यस्तै, निर्वाचन समितिले तय गरेको मापदण्डविपरीत एउटै कम्प्युरबाट अटोमेटिक रुपमा सयौंको संख्यामा मतदान भएको, जापानबाहिरका देशहरुबाट पनि मतदान गरिएको र त्यसरी गरिएको मतदानको संख्या पनि धेरै रहेको उजुरीमा उल्लेख छ।
निवेदकहरुले नेपालका काठमाडौं र पोखरा तथा भारतका विभिन्न सहरबाट पनि मतदान भएको मतदानमा प्रयोग गरिएको कम्प्युटर, लोकेसन तथा आईपी एड्रेस लगायतका प्रमाण पनि उजुरीमा समावेश गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
