काठमाडौं- नेपाल धितोपत्र बोर्डले गत आर्थिक वर्ष २०७७/७८ मा अघिल्लो वर्षको तुलनामा 'मेरो सेयर' प्रयोगकर्ताको सङ्ख्या करिब साढे तीन गुणाले बढेर २८ लाख पुगेको जानकारी दिएको छ।
प्रतिनिधिसभाअन्तर्गत अर्थ समितिको आजको बैठकमा उक्त आवमा डिम्याट खाता पनि शतप्रतिशतभन्दा बढी वृद्धि भइ ३७ लाख पुगेको जानकारी दिइएको छ। उक्त आवमा १४ अर्ब १५ करोड रुपैयाँ पुँजीगत लाभकरबापत सरकारलाई राजस्वमा योगदान दिन सफल भएको बोर्डका कार्यकारी प्रमुख भीष्मराज ढुङ्गानाले जानकारी दिए।
१५औँ योजनाको पुँजी बजारसम्बन्धी परिमाणात्मक लक्ष्य धितोपत्रमा लगानीकर्ताको सङ्ख्या बढाइ कूल जनसङ्ख्याको २० प्रतिशत पुर्याउने रहेकामा आर्थिक वर्ष २०७७/७८ को अन्त्यसम्ममा १२ प्रतिशत पुगेकाले सहजरुपमा लक्ष्य हासिल हुने दाबी गरिएको छ। धितोपत्रको प्रारम्भिक सार्वजनिक एउटै निष्काशनमा करिब २४ लाखले आवेदन दिइ खरिद गरेको तथ्याङ्क बैठकमा प्रस्तुत गरिएको थियो। २०७७ असारमा धितोपत्रको दोस्रो बजार अनलाइन कारोबारका लागि ३५ हजारभन्दा बढीले युजर आईडी लिएकामा समीक्षा वर्षमा उक्त सङ्ख्यामा २२ गुणभन्दा बढीले वृद्धि भइ सात लाख ९५ हजार पुगेको जानकारी दिइएको थियो।
समग्रमा आठ लाख ८० हजार लगानीकर्ता कारोबारमा सक्रिय रहेको तथा पुँजी बजारमा लगानीकर्ता क्रमश: प्रविधिमैत्री हुँदै गएको बताइएको छ। धितोपत्रको प्राथमिक बजारमार्फत् पुँजी परिचालनका लागि वित्तीय क्षेत्रबाहिरका हाइड्रो, उत्पादनमुलक, व्यापारिक तथा केबलकारजस्ता कम्पनी सक्रिय छन्। प्राथमिक बजारमार्फत् धितोपत्र निष्काशन आव २०७७/७८ मा उल्लेख्य वृद्धि भएको छ। उक्त वर्ष प्राथमिक बजारमार्फत् एक खर्ब आठ अर्ब २२ करोड रुपैयाँ बराबरको धितोपत्र निष्काशनका लागि बोर्डले अनुमति दिएको तथ्यांक छ। साधारण सेयर र ऋणपत्र निष्काशनमा पनि उल्लेख्य वृद्धि भएको छ। नेपालको पुँजी बजारमार्फत् परिचालन भएको रकम सार्क देशमै दोस्रो ठूलो रकम हो। नेपाली सेयर बजार पुँजीकरणतर्फ ४४ खर्ब ३७ अर्ब पुगेर नयाँ उचाइ कायम भएको छ।
धितोपत्र बजारको विकास र विस्तारका लागि बोर्डले चालेका कदम कारण बजारमा लगानीकर्ताको मनोबल बढेर सर्वसाधारणको सहभागिता उत्साहजनक रुपमा वृद्धि भएको निर्देशक ढुङ्गानाले दाबी गरे। एक वर्षदेखि बजारका अधिकांश परिसूचक ऐतिहासिक उचाइमा पुगेको तथा बजार पूर्वाधार र सेवा सुधार, धितोपत्रको निष्काशनमार्फत् पुँजी परिचालन, सर्वसाधारणको सहभागिता, दोस्रो बजारको कारोबार, नेप्से सूचकाङ्कजस्ता विविध परिसूचक पनि ऐतिहासिक रहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1775812183.jpg)
-1779545841.jpg)
