नेप्सेमा झिनो सुधार, साढे १५ अर्बको कारोबार

बैंक/बिमा/सेयर

रासस बुधबार, साउन २७, २०७८ १७:४६

काठमाडौं- धितोपत्र बजारमा सेयर कारोबार मापक नेप्से परिसूचक आज झिनो अङ्‍कले बढेको छ। मङ्‍गलबार उच्च अङ्‍कले बढेको नेप्से आज भने सुस्ताएको छ। नेपाल स्टक एक्सचेञ्जका अनुसार ०.९४ विन्दुले बढेर नेप्से तीन हजार १६२.५९ मा पुगेको छ।

यस्तै, ठूला कम्पनीको सेयर कारोबार मापन गर्ने सेन्सेटिभ परिसूचक २.३८ विन्दुले घटेर ५८५.७१ मा पुगेको छ। कूल २३० कम्पनीको दुई करोड ७२ लाख ९८ हजार ६२४ कित्ता सेयर १५ अर्ब ४५ करोड ५९ लाख ४१ हजार ७५४ रुपैयाँ मूल्यमा कारोबार भयो।

नेप्सेका अनुसार कारोबार भएका १३ उपसमूहमध्ये पाँच उपसमूहको सेयर उकालो लागेको छ भने आठ उपसमूहको सेयर मूल्यमा गिरावट आएको छ। बैंकिङ १४.१७, व्यापार ४९.६५, विकास बैंक ४१.२, वित्त १९.६६, उत्पादन ३.८४, अन्य १२.४३, सामूहिक लगानी कोष ०.११ र लगानी १.०३ विन्दुले घटेको छ। यस्तै, होटल तथा पर्यटन १०२.९१, जलविद्युत् १४४.७९, निर्जीवन बीमा ७.९९ र जीवन बीमा १०.०५ विन्दुले बढेको छ।

कारोबारका आधारमा माथिल्लो तामाकोशी जलविद्युत् कम्पनी शीर्ष स्थानमा रहेको छ। उक्त कम्पनीको ६८ करोड ३० लाख ७१ हजार ७०१ रुपैयाँ बराबरको कारोबार भयो। यस्तै, अरुण भ्याली हाइड्रोपावर ५७ करोड ३७ लाख ७० हजार ६७९ रुपैयाँ, अरुण काबेली पावर ५६ करोड १२ लाख ९३ हजार, अपि पावर कम्पनी ५३ करोड १७ लाख ४५ हजार ३८७ र आईसीएफसी फाइनान्स ५१ करोड ५१ लाख १३ हजार ३४४ रुपैयाँ बराबरको कारोबार भइ शीर्ष स्थानमा रहे।

छ कम्पनीको सेयरमा सकारात्मक सर्किट
बुधबारको कारोबारमा विभिन्न छ कम्पनीको सेयरमा सकारात्मक सर्किट लागेको छ। त्यसमा आईसीएफसी फाइनान्स, रिडी हाइड्रोपावर, रुरु जलविद्युत् परियोजना, जीवन विकास लघुवित्त, युनियन लाइफ इन्स्योरेन्स र एनआरएन इन्फ्रास्टकचर एण्ड डेभलपमेन्ट कम्पनीको सेयर १० प्रतिशतले बढ्दा सकारात्मक सर्किट लागेको छ।

त्यस्तै, जानकी फाइनान्स ४.१७, एचआईडीसीएल ३.३९, गुर्खाज फाइनान्स ३.१६, वेष्ट फाइनान्स ३.१६ र एक्सेल डेभलपमेन्ट बैंकका सेयरधनीले प्रतिकित्ता ३.१३ प्रतिशतका दरले गुमाए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।