काठमाडौं- आफूलाई ‘सामाजिक अभियन्ता’ दाबी गर्ने ज्वाला संग्रौलाको समूहले जसरी पनि सरुवा गराएर छाड्छु भनेको एक सातामै सरुवा भएका असई मणिकान्त झालाई कसैको दबाबमा सरुवा नगरिएको दाबी प्रहरीले गरेको छ।
महानगरीय ट्राफिक महाशाखाका एसएसपी जनक भट्टराईले महानगरीय ट्राफिक प्रहरी वृत्त महाराजगञ्जमा खटिएका असई झालाई संग्रौलासँग विवाद भएको एक सातामै ट्राफिक महाशाखा तानेका थिए।
यसबारे नेपाल लाइभले जिज्ञासा राख्दा एसएसपी भट्टराईले यो विषय अस्वीकार गरे। ‘कसैको दबाबमा सरुवा भएको होइन। उहाँ आफैं आउन चाहेर आउनु भएको हो। यो विषय नै मलाई थाहा थिएन। हिजो समाचार र भिडियो देखेपछि फेरि महाराजगञ्ज नै फिर्ता पठाइएको छ’ एसएसपी भट्टराईले नेपाल लाइभसँग भने।
एसएसपी भट्टराईले यो विषय नकारेपनि प्रहरी स्रोतकै अनुसार संग्रौलासँगको विवादकै कारण असई झालाई ट्राफिक महाशाखा तानिएको हो। जबकी उनी महाराजगञ्ज सरुवा भएको ६ महिना पनि भएको थिएन। सामान्यतया एक वर्ष नपुगी प्रहरीमा सरुवा गरिँदैन।
असई झाको सरुवाको विषयमा नेपाल लाइभले नेपाल प्रहरीका प्रवक्ता तथा एसएसपी वसन्त कुँवरसँग पनि जिज्ञासा राखेको छ। त्यही विवादको विषयलाई लिएर सरुवा कसैको दबाबमा भएको रहेछ भने सरुवा गर्ने अधिकारीलाई कारबाही समेत गरिने उनले बताए।
‘विवादको विषयलाई लिएर कसैको दबाबमा कसैले सरुवा गरेको रहेछ भने त्यो छानबिन हुन्छ। त्यस्तो पाइयो भने सरुवा गर्ने प्रहरी अधिकारी कारबाहीको दायरामा ल्याइन्छ’, एसएसपी कुँवरले भने।
संग्रौलासहितको टोलीको सवारी साधन ड्युटीमा खटिएका असई झाले रोकेर जाँच सुरु भएपछि असई झामाथि रंगभेदी व्यवहार समेत भएको थियो। निषेधाज्ञामा पासबिना सवारी चलाउन नमिल्ने भन्दै झाले पास मागेका थिए। तर, उनीहरुले देखाउन सकेका थिएनन्।
त्यसपछि लाइसेन्स माग्दा समेत उनीहरुले लाइसेन्स देखाउन सकेका थिएनन्। त्यसपछि गाडी होल्ड गर्न लगाएपछि विवाद भएको थियो। महाराजगञ्ज चोकबाट भएको विवाद ट्राफिक कार्यालयसम्म पुगेको थियो।
प्रहरी कार्यालयमा संग्रौलाको टोलीले असईको नाम सोधेपछि उनले आफ्नो नाम मणिकान्त झा भएको बताएका थिए। त्यसपछि संग्रौलासहितको टोलीले रंगभेदी शब्द प्रयोग गरेर दुर्व्यवहार गरेका थिए।
रंगभेदी अभिव्यक्ति दिएको भन्दै मधेशी आयोगमा यस विषयमा उजुरी समेत परिसकेको छ। संग्रौलासँग विवाद भएपछि महाराजगञ्जबाट हटाइएका असई झालाई नेपाल लाइभमा समाचार प्रकाशन गरेपछि बुधबार साँझ पुन: महाराजगञ्ज नै फिर्ता पठाइएको छ।
संग्रौलासहितको टोलीले ‘ज्वाला संग्रौला भन्ने को हो? नाम सुनेको छ? मिडिया हेर्ने गरेको छ? प्रहरीको फुली लगाए भनेर ठूला कुरा गर्ने होइन नि फेरि। तपाईंको आईजीपीले सम्मान गरेर हिँडेको मान्छे हो ज्वाला संग्रौला। तपाईंले यो तरिकाले डिल गर्ने? म ठेगान लगाइदिन्छु म के हो भन्ने देखाइदिन्छु’ समेत भनेर धम्की दिएका थिए।
सम्बन्धित समाचार :
‘सामाजिक अभियन्ता’ दाबी गर्ने संग्रौलाको रंगभेदी अभिव्यक्तिको छानबिन सुरु
प्रहरीमाथिको रंगभेदी दुर्व्यवहारको भिडियो आईजीपीको सचिवालय पठाइयो
प्रहरीमाथि गरिएको रंगभेदी हर्कत्विरुद्ध मधेशी आयोगमा उजुरी दर्ता
'सामाजिक अभियन्ता’ भन्नेहरूको दबाबमा सरुवा गरिएका असई मणिकान्त महाराजगञ्ज फिर्ता
‘सामाजिक अभियन्ता’ भन्नेहरूले ‘एनीहाउ सरुवा गराउँछु’ भनेका असई मणिकान्तलाई महाराजगञ्जबाट हटाइयो
‘सामाजिक अभियन्ता’ले नै प्रहरीमाथि प्रहरी कार्यालयमै यसरी गरे रंगभेदी हर्कत्
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
