महानगरीय ट्राफिक प्रहरी वृत्त महाराजगञ्जमा ज्वाला संग्राैला र उनको समूह। तस्वीर : अनलाइन न्यूज नामक युट्युब च्यानलको भिडियोबाट।
काठमाडौं- आफूलाई ‘सामाजिक अभियन्ता’ दाबी गर्ने ज्वाला संग्रौला र उनको टोलीले प्रहरी कार्यालयभित्रै पुगेर जसरी पनि सरुवा गर्ने धम्की दिएका ट्राफिक प्रहरीका सहायक निरीक्षक (असई)को सरुवा भएको छ। महानगरीय ट्राफिक प्रहरी वृत्त महाराजगञ्जमा कार्यरत असई मणिकान्त झालाई त्यहाँबाट हटाइएको हो।
संग्रौलाको टोलीले गत जेठ ११ गते असई झालाई त्यहाँबाट जसरी पनि सरुवा गराउने धम्की दिएको थियो। त्यसको दुई साता नबित्दै उनलाई महाराजगञ्जबाट महानगरीय ट्राफिक प्रहरी महाशाखा (बग्गीखाना) तानिएको हो। उनलाई काज सरुवा गरिएको भनिएको छ।
झाको काज सरुवा भएको प्रहरी स्रोतले पुष्टि गरेको छ। ‘नियमित सरुवा अन्तर्गत उहाँको काज सरुवा भएको हो’, एक प्रहरी अधिकारीले भने, ‘विवादको विषयका कारण सरुवा भएको जस्तो मलाई लाग्दैन।’
ती अधिकारीले नियमित सरुवा अन्तर्गत् झा बग्गीखाना गएको दाबी गरे पनि काज सरुवा नियमित सरुवा अन्तर्गत् पर्दैन। प्रहरी नियमावलीमै प्रष्ट रुपमा सामान्यतया कुनै पनि प्रहरी कर्मचारीलाई काज सरुवा नगरिने उल्लेख छ। गर्नैपर्ने अवस्थामा मात्रै काज सरुवा गर्न सकिने प्रावधान नियमावलीमा छ।
त्यसमाथि झा महाराजगञ्ज वृत्तमा सरुवा भएर आएको ६ महिना पनि पूरा भएको थिएन। नियमित सरुवा हुन कम्तीमा १ वर्ष पुगेको हुनुपर्छ। असई झालाई ६ महिना नपुग्दै सरुवा गर्नुको कारण भने प्रहरीले खुलाएको छैन।
संग्रौलाले जसरी हुन्छ सरुवा गराएरै छाड्छु भनेर धम्की दिएको केही दिनमै असई झाको सरुवा हुनुले प्रहरीको मनोबल कमजोर हुने सुरक्षा विज्ञ बताउँछन्।
संग्रौलासहितको टोलीले गत जेठ ११ गते ड्युटीमा खटिएका झासँग महाराजगञ्ज क्षेत्रमा वादविवाद गरेको थियो। निषेधाज्ञाको बेला सवारी पासबेगर सवारी साधन लिएर हिँडेका उनीहरुलाई झासहितको ट्राफिक प्रहरीको टोलीले रोकेको थियो। पास र चालक अनुमतिपत्र दुवै उनीहरुसँग नरहेको भेटिएपछि झाले उनीहरुको सवारी होल्ड गरेका थिए। त्यसपछि विवाद भएपछि उनीहरुले असई झाले आफूहरुमाथि दुर्व्यवहार गरेको आरोप लगाएका थिए।
त्यसपछि वृत्तको कार्यालयम आइपुगेका उनीहरुले झामाथि तथानाम भनेको भिडियो सार्वजनिक भएको थियो। भिडियोमा देखिएअनुसार प्रहरी कार्यालयमा संग्रौलाको टोलीले असईको नाम सोधेपछि उनले आफ्नो नाम मणिकान्त झा भएको बताएका थिए। त्यसपछि संग्रौलासहितको टोलीले ‘झा... मधेशी... अब मधेशतिरै गएर खेतीकिसानी गर्नु....ट्राफिकको जागिर खाएर काम छैन...’जस्ता रंगभेदी शब्दसहित दुर्व्यवहार गरेका थिए।
भिडियोमा देखिएअनुसार त्यसअघि संग्रौलासहितको टोलीले ‘ज्वाला संग्रौला भन्ने को हो? नाम सुनेको छ? मिडिया हेर्ने गरेको छ? प्रहरीको फुली लगाए भनेर ठूला कुरा गर्ने होइन नि फेरि। तपाईंको आईजीपीले सम्मान गरेर हिँडेको मान्छे हो ज्वाला संग्रौला। म ठेगान लगाइदिन्छु, एनीहाउ सरुवा हुनुपर्छ, गराइदिन्छु’ भनेर प्रहरी कार्यालयभित्रै असई झालाई धम्क्याएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
