काठमाडौं– नेकपा एमालेका अध्यक्ष केपी शर्मा ओली वरिष्ठ नेता माधव कुमार नेपाल पक्षको मागअनुसार पार्टीलाई २०७५ जेठ ३ गते पूर्वको अवस्थाबाट अगाडि बढाउन राजी भएका छन्।
आइतबार पार्टी एकताका लागि आह्वान गर्दै ओलीले माधव नेपाल पक्षको मागअनुसार पार्टीलाई २०७५ जेठ ३ गते पूर्व (जेठ २ गते) माओवादी केन्द्रसँग एकता हुनु अगाडिको अवस्थाबाट अगाडि बढाउन तयार भएको बताएका हुन्।
त्यसका लागि माधव नेपाल पक्षका तत्कालीन सांसदहरुले संसद पुन:स्थापना तथा कांग्रेस सभापति शेरबहादुर देउवालाई प्रधानमन्त्री नियुक्तिका लागि आदेश जारी हुनुपर्ने मागदाबीसहित सर्वोच्च अदालतमा दायर गरिएको रिटबाट हस्ताक्षर फिर्ता लिनुपर्ने शर्त पनि ओलीले अगाडि सारेका छन्।
अध्यक्ष ओलीले वरिष्ठ नेता नेपालसहित उनको पक्षका अन्य नेतामाथि भएका कारबाही पनि फिर्ता लिइने प्रतिवद्धता जनाएका छन्।
आफू जहिले पनि कम्युनिस्ट एकताको पक्षमा रहेको बताउँदै ओलीले भोलिका दिनमा पनि यसैका लागि क्रियाशील रहने बताएका छन्।
अहिले एमालेको आन्तरिक राजनीतिक जीवनमा समस्याहरु देखा परेको उल्लेख गर्दै ओलीले समस्या समाधान गर्ने र पार्टी एकतालाई रक्षा गर्न ६ बुँदे प्रस्ताव अगाडि सारेका छन्।
प्रस्तावको पहिलो नम्बरमा उनले एमालेलाई माओवादी केन्द्रसँग एकता हुनु अगाडि २०७५ जेठ ३ गते पूर्वको अवस्थाबाट अगाडि बढाइने बताएका छन्। यद्यपि सर्वोच्च अदालतको २३ फागुन २०७७ को फैसलानुसार तत्कालीन नेकपाको एकता भंग भएपछि आफूलाई साथ दिँदै एमालेमा आएका माओवादीका नेताहरुलाई आधार मानेर केन्द्रीय कमिटी र स्थायी कमिटीका संरचना गतिशील हुने पनि ओलीको प्रस्ताव छ।
ओलीले दोस्रो बुँदामा मातहतका पार्टी कमिटी र जनसंगठनहरु मूलभूत रुपमा २०७५ जेठ ३ पूर्वको अवस्थामा फर्केर क्रियाशील हुने प्रतिवद्धता पनि जनाएका छन्।
पार्टीलाई ०७५ जेठ २ को अवस्थामा फर्काउने निष्कर्ष कार्यान्वयन गर्दा देखा पर्ने समस्या समाधानका लागि कार्यदलले काम गर्ने पनि ओलीले तेस्रो बुँदामा प्रस्ताव गरेका छन्।
प्रस्तावको तेस्रो बुँदामा ओलीले आफूलाई प्रधानमन्त्री पदबाट हटाई विपक्षी दलका नेता (शेरबहादुर देउवा)लाई प्रधानमन्त्री बनाइयोस् भन्ने मागसहित सर्वोच्च अदालतमा प्रस्तुत रिट निवेदनमा प्रयोग गरिएको नेकपा (एमाले) का निवर्तमान सांसदहरुको हस्ताक्षर फिर्ता हुनुपर्ने शर्त अगाडि सारेका छन् ।
पाँचौं बुँदामा ओलीले बीचमा ओलीले विभिन्न नेतालाई गरिएको कारबाही फिर्ता हुने बताएका छन्।
छैटौं बुँदामा ओलीले नेकपा (एमाले) लाई वैचारिक, संगठनात्मक र भावनात्मक रुपले एकतावद्ध, अनुशासित र अझ सुदृढ बनाउन सबै नेताहरुबाट रचनात्मक योगदान हुने अपेक्षा राखेका छन्।
आइतबार मात्र नेपाल पक्षले ओलीले पार्टी एक बनाउन नचाहेकाले एकताका सबै प्रयास असफल भएको निष्कर्ष निकाल्दै अब बैकल्पिक बाटो तय गर्ने घोषणा गरेको थियो। स्थायी कमिटी बैठकबाट यस्तो निर्णय गरेको नेपाल पक्षले देशभरका नेता र कार्यकर्तालाई एकताको भ्रममा नपर्न र सशक्त संगठन निर्माण गर्न समेत निर्देशन दिएको थियो। यस्तो निर्णय आएको केही घण्टामै ओलीले आफूले एकता बचाउन चाहेको सन्देश दिनेगरी सार्वजनिक आह्वान गरेका छन्। उनले नेपालपक्षले उठाएका बुँदागत अडानलाई पनि त्यसैगरी बुँदागत रुपमै सम्बोधन गर्ने प्रयत्न गरेको देखाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
