काठमाडौं- जनता समाजवादी पार्टी (जसपा) दुई चिरामा विभाजित हुन थालेपछि त्यसको असर प्रदेश सभाहरूमा पनि देखिन थालेको छ। यसअघि लुम्बिनी प्रदेश सभामा जसपाको केन्द्रीय विग्रहको छायाँ देखिएको थियो। र, जसपा विग्रहको असर अब प्रदेश २ सभामा पनि देखिने भएको छ।
प्रदेश २ प्रदेश सभामा जसपाका संघीय परिषद् अध्यक्ष बाबुराम भट्टराई र अध्यक्ष उपेन्द्र यादव पक्ष हाबी हुने देखिएको छ। जसपाका ५५ प्रदेश सभा सदस्यमध्ये बाबुराम-उपेन्द्र पक्षमा ३५ जना खुलेको दाबी गरिएको छ। प्रदेश सभामा जम्मा १०४ सदस्य छन्।
जसपाको कार्यकारिणी समितिमा बाबुराम-उपेन्द्र पक्ष बहुमत भएकाले त्यसको असर प्रदेश सभामा समेत देखिएको छ। तत्कालीन राष्ट्रिय जनता पार्टी (राजपा)बाट २५ र समाजवादी पार्टीबाट ३० जना निर्वाचित भएका थिए।
पछिल्लो समय जसपा ध्रुविकरण बढ्दै गएपछि तत्कालीन राजपा पक्षका सांसदहरू बाबुराम–उपेन्द्र पक्षतिर तानिन लागेका हुन्। मुख्यमन्त्री लालबाबु राउत बाबुराम–उपेन्द्र पक्षका भएकाले मन्त्री पद र अन्य प्रलोभनमा पारेर आफ्नो कित्तातिर तानेको महन्थ ठाकुर-राजेन्द्र महतो पक्षका एक प्रदेश सभा सदस्यले बताए।
‘मुख्यमन्त्री लालबाबु राउत बाबुराम-उपेन्द्र पक्षको हुनुहुन्छ। सत्तामा भएपछि मन्त्री पद वा अन्य कुनै प्रलोभनमा पार्न सजिलो हुँदोरहेछ यताबाट उता जानेको संख्या बढ्ने देखिन्छ’, ती प्रदेश सांसदले भने, ‘यदि पार्टी नै विभाजन हुने स्थिति भएमा राजनीतिक रुपमा बाबुराम–उपेन्द्रतिर लाग्दा फाइदा देखेकाले त्यता तानिएका छन्।’
प्रदेश सभामा बहुमत भएकाले बाबुराम–उपेन्द्र पक्ष पेलेरै जाने रणनीतिमा छ। मुख्यमन्त्री राउतलाई संसदीय दलको नेता बनाएर उनीहरूले त्यसको शुरुआत गरिसकेका छन्।
साविक राजपा पक्षले साथ छोडेमा बाबुराम–उपेन्द्र पक्षले कांग्रेस, नेकपा (माओवादी केन्द्र)सँग सहकार्य गर्ने तयारी थालिसकेका छन्।कुल १०४ प्रदेश सभा सदस्यमध्ये महन्थ–राजेन्द्र पक्षबाट २५ जना बाहिरिएमा दोस्रो विकल्पमा जाने बाबुराम-उपेन्द्र पक्षको तयारी छ।
त्यस्तो अवस्थामा १९ सिट भएको कांग्रेस, ८ सिट भएको माओवादीसँग यो पक्षले सहकार्यको हात अघि बढाउनेछ। यद्यपि, माओवादीले साथ नदिएर कांग्रेस एक्लैले मात्र साथ दिएपनि बहुमत पुग्ने छ। तर, बाबुराम–उपेन्द्र पक्ष तत्काल विकल्प खोज्ने पक्षमा देखिएका छैनन्। आफ्नो पार्टीमा बहुमत हुँदासम्म विकल्प नखोजिने बाबुराम-उपेन्द्र पक्षका एक नेताले बताए।
‘अहिले जसपाकै एकल बहुमत छ। यस्तो अवस्थामा अर्को पार्टीसँग बहुमतका लागि किन गुहार्नु पर्यो? महन्थ-राजेन्द्र पक्ष निस्कने अवस्था आएमा कांग्रेस र माओवादीसँग सहकार्य गरेर हाम्रै सरकार बन्छ’, ती नेताले भने।
आर्थिक मामिला तथा योजना मन्त्री विजय यादवले पनि जसपाको बहुमत भएकाले तत्काल अन्य पार्टीसँग सहकार्य गर्नुपर्ने अवस्था नरहेको प्रक्रिया दिए। ‘अहिले पार्टीमा यो पक्ष त्यो पक्ष भन्ने छैन सबै जसपा हौं’, मन्त्री यादवले भने, ‘जसपाको एकल बहुमत हुँदा अर्को पार्टीसँग सहकार्य गर्नुपर्ने अवस्था छैन।’
पार्टी नै विभाजन हुने स्थिति आएमा विकल्प सोच्न सकिने यादवले बताए। प्रदेशमा ६ मन्त्री र ५ राज्यमन्त्री छन्। जसमध्ये भौतिक पूर्वाधार विकास मन्त्री जितेन्द्र सोनल मात्रै महन्थ–राजेन्द्र पक्षका हुन्। अरु सबै ५ मन्त्री बाबुराम-उपेन्द्र पक्षका हुन्।
यस्तै, ५ राज्य मन्त्रीमा भौतिक पूर्वाधार विकास राज्यमन्त्री डिम्पल झा मात्रै महन्थ–राजेन्द्र पक्षकी हुन्। डिम्पल झा संघीय खानेपानी मन्त्री अनिल झाको श्रीमती समेत हुन्। अरु चार राज्यमन्त्री बाबुराम–उपेन्द्र पक्षकै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787494229.jpg)
-1786602170.png)
-1786513116.png)
