काठमाडौं- संविधान संशोधनका लागि गृहकार्य गन पाँच सदस्य कार्यदल बनाउन प्रधानमन्त्री तथा एमाले अध्यक्ष केपी शर्मा ओली र जनता समाजवादीको महन्थ ठाकुर पक्षबीच सहमति जुटेको छ।
ठाकुर पक्षका एक नेताले पाँच सदस्य कार्यदल बनाउन सैद्धान्तिक सहमति जुटेको नेपाल लाइभलाई बताए। ‘संविधान संशोधनका लागि पाँच सदस्यीय कार्यदल बनाउने सैद्धान्तिक सहमति बनेको छ। कार्यदल सदस्यमा रहने व्यक्तिहरुको टुंगो आज (शुक्रबार) लाग्छ’, ठाकुर निकट जसपाका नेता सुरेन्द्र झाले भने।
उनले कार्यदललाई दिइने समयावधि र त्यसमा रहने सदस्यहरुको हैसियतका विषयमा भने खुलाउन चाहेनन्। संविधान निर्माणदेखि नै असहमति दर्ज गर्दै आएको मधेस केन्द्रित दलले संशोधनको माग गर्दै आएका थिए। तर केपी ओलीले भने संविधान संशोधनको विरोध गर्दै आएका थिए।
उनले आवश्यकता र औचित्यको आधारमा संविधान संशोधन हुनसक्ने भन्दै अन्य दलले उठाउने गरेको संशोधनको विषयलाई अस्वीकार गर्ने गरेका थिए। तर, पछिल्लो समय जसपाको ठाकुर पक्षसँग निकट सम्बन्ध स्थापित भएपछि भने उनी संविधान संशोधन लगायतका अन्य मागहरुमा लचक देखिएका हुन्।
ओली र ठाकुरबीच संविधान संशोधनका विषयमा गृहकार्य गर्नका लागि कार्यदल गठन गर्ने विषयमा केहीअघि देखि नै समान धारणा बन्दै गएको थियो। तर, कार्यदलमा दुई पार्टीका नेताहरु मात्रै राख्ने, सर्वदलीय कार्यदल बनाउने वा विज्ञहरु सम्मिलित कार्यदल बनाउने जस्ता विषयमा समान धारणा बन्न सकेको थिएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
