काठमाडौं- कोरोना महामारीको दोस्रो लहर फैलिएसँगै यतिबेला विश्व फेरि त्रसित बनेको छ। केही देशले कोरोना भाइरसको संक्रमण नियन्त्रणका लागि लकडाउन गरिसकेका छन्।
नेपालमा पनि यही वैशाख १६ गतेदेखि लागू हुने गरी विभिन्न जिल्लामा निषेधाज्ञा घोषणा भइसकेको छ। कोरोना संक्रमणको गति तीव्र बन्दै गइरहेको अवस्थामा कलाकारहरू भने अवार्ड थाप्ने दौडधुपमा देखिएका छन्। कोरोना नियन्त्रणका लागि भूमिका खेल्नुपर्ने बेला उनीहरू उल्टै सरकारले जारी गरेको निर्देशनको उल्लंघनमा लागेको देखिन्छ।
नेपाल लाइभले कोभिडको समयलाई कलाकारहरूले कसरी सदुपयोग गरिरहेका छन् भन्ने बुझ्ने कोशिस गरेको थियो। यही क्रममा मंगलबार दिउँसो अभिनेत्री अनु शाहलाई टेलिफोन सम्पर्क गर्दा उनले आफू अवार्ड थाप्न निस्कने तयारीमा रहेको बताइन्। यस्तो अवस्थामा पनि अवार्ड कार्यक्रम छ र? भनी प्रश्न गर्दा उनले उल्टै प्रतिप्रश्न गर्दै भनिन्, ‘सरकारले लकडाउन गरेको दिन त आउनै बाँकी छ हैन र?’
उनी नेपाल म्युजिक एण्ड फेसन शोको अवार्ड थाप्न हिँडेकी हुन्। अवार्ड थाप्नेमात्रै हैन, सुटिङलगायत काममा आफू व्यस्त रहेको उनले बताइन्। उनले भनिन्, ‘भोलि पनि सुटिङमा जाँदै छु।’
निषेधाज्ञा लागू हुन अझै दुई दिन बाँकी रहेकाले आफ्नो व्यस्तता बढेको उनको भनाइ छ। अनुले थाप्ने अवार्ड कार्यक्रममा पूर्वउपराष्ट्रपति परमानन्द झाको उपस्थिति रहने आयोजकले जानकारी दिएको छ।
महामारीबीच अवार्डको दौडधुपमा रहेका अर्का कलाकार हुन् पल शाह। उनले सोमबारमात्रै एक अवार्ड शोमा सहभागिता जनाए। गत वर्षको लकडाउन खुलेपछि आधाभन्दा धेरै समय म्युजिक भिडियो छयांकनमा बिताएका शाह म्युजिक भिडियोसँग सम्बन्धित प्रायः अवार्ड शोमा पुग्न भ्याउँछन्।
सोमबार मात्रै उनले तेस्रो योङ माइन्ड इन्टरटेनमेन्ट अवार्डमा वर्षकै चर्चित कलाकारको अवार्ड थापे। उनले आयोजकलाई धन्यवाद दिँदै अवार्डसहितका तस्बिर सामाजिक सञ्जालमा पोस्ट गरेका छन्। उनीसँगै गायक दुर्गेश थापाले पनि योङ माइन्ड अवार्डको ट्रफी उचालेका छन्।
अन्य कलाकारले पनि उक्त समारोहमा अवार्ड थापेका थिए। धेरैले ट्रफी उचालेका तस्बिर पोस्ट गरेर सामाजिक सञ्जालको भित्ता रंग्याएका छन्।
यी अवार्ड कार्यक्रम सरकारले भीडभाड हुने गरी सभा, समारोह तथा भेला नगर्न निर्देशन जारी गरेपछिका कार्यक्रमहरू हुन्।
कलाकारलाई ‘देशको गहना’ भन्ने गरिन्छ। यो कुरामा कलाकार स्वयं पनि गर्व गर्ने गर्छन्। तर, देशमा अप्ठ्यारो परिस्थिति आएको बेला पनि उनीहरू सरकारको निर्देशनविपरीत अवार्ड थाप्ने दौडधुपमा लागेका छन्।
हुन त हरेक कुराको आ-आफ्नै विशेषता हुन्छ। त्यसलाई अरूसँग तुलना गर्न मिल्दैन। तर, सबैतिर विपद्को बेला कलाकारले पनि आफ्नो ठाउँबाट योगदान गर्नुपर्ने कुरा सामाजिक सञ्जालमा उठेको छ।
किरण लामाले छिमेकी देशका कलाकारको उदाहरण दिँदै सामाजिक सञ्जाल ट्विटरमा लेखेका छन्, ‘हाम्रा देशका कलाकारले पनि देश समस्यामा परेको बेला सहयोग गर्नुपर्छ। हामीले नेपाली भएकैले नेपाली फिल्म हेर्छाैं भने हामीलाई समस्या परेका बेला उनीहरू किन आफैंमा रमाइरहेका छन्?’
उनले थप लेखेका छन्, ‘त्यति धेरै फ्यान फलोइङ भएका कलाकारले केही नगरे पनि मास्क कसरी लगाउने, भीडभाडमा किन नजाने, सामाजिक दूरी किन कायम गर्नेजस्ता बिषयमा भिडियोमार्फत् जनचेतना फैलाउन सक्छन्।’
छिमेकी देशका कलाकार के गर्दै छन्?
बलिउड अभिनेता सोनु सुद यतिखेर जनचेतना फैलाउन व्यस्त छन्। उनी आफैं कोरोना पोजिटिभ भए पनि विभिन्न भिडियो अन्तर्वार्तामार्फत् जनचेतना फैलाउने काममा व्यस्त भएका हुन्।
उनले सामाजिक सञ्जालमा टेलिग्राम च्यानल बनाएर सक्रिय युवाहरूलाई स्वयंसेवकका रूपमा खटाइरहेका छन्। ‘हाथ से हाथ मिलाएँगे, देशको बचाएँगे’ भन्दै उनले युवालाई एक ठाउँमा ल्याएका छन्। साथै, विभिन्न ठाउँबाट आएर अक्सिजन अभावको समस्यामा परेका तथा इमर्जेन्सीका बिरामीलाई उनले सहयोग गरिरहेका छन्।
अभिनता सुदको सामाजिक सञ्जाल हेर्ने हो भने अक्सिजन सकिएका, इमर्जेन्सीमा परेका बिरामीहरूलाई सकुशल उद्धार गरिएको विषय हेर्न र पढ्न पाइन्छ। उनलाई पञ्जाव सरकारले कोभिडसँग लड्नकै लागि निःशुल्क खटाएको छ।
सुदले सीमामा अलपत्र परेका नेपालीलाई खाना र पानीसमेत वितरण गरेका थिए। उनी स्वयं उपस्थित हुँदा सबैले उनको नाममा नारा लगाएका थिए। भारतले उनलाई वास्तविक जीवनको हिरोको उपमासमेत दिएको छ। उनले कीर्गिस्तानमा अलपत्र परेका एक हजार भारतीय नागरिकलाई व्यक्तिगत रूपमा जहाज चार्टर्ड गरेर उद्धारसमेत गरेका थिए।
त्यस्तै, अभिनेत्री सुस्मिता सेनले दिल्लीका विभिन्न अस्पतालमा सिलिण्डर उपलब्ध गराएकी छन्। सेनले सामाजिक सञ्जाल ट्विटरमा सिलिन्डरको अभाव भएकाले त्यसको व्यवस्था गरेको बताएकी छन्। मुम्बईबाट दिल्लीसम्म अक्सिजन पुर्याउने उपाय नभेटेको भन्दै उनले सहयोगको अपिलसमेत गरेकी छन्।
सुस्मिता र सोनुजस्तै अन्य कलाकार पनि अहोरात्र कोभिडका बिरामीको सेवामा खटिएका छन्। अभिनेता सलमान खानले सम्पूर्ण अस्पतालका ‘फ्रन्टलाइनटर’ चिकित्सकका लागि खाना र पानीको व्यवस्था आफैं उपस्थित भएर गरिरहेका छन्। आर्थिक रूपमा सहयोग गर्न नसक्नेहरूले पनि जनचेतना फैलाउने काममा सामाजिक सञ्जालको भरपुर उपयोग गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
