काठमाडौं- प्रधानमन्त्री केपी शर्मा ओलीविरुद्ध बन्ने संयुक्त सरकारको विषयमा जनता समाजवादी पार्टी (जसपा) पुन: अनिर्णित बनेको छ। यही विषयमा निर्णय लिन आइतबार र सोमबार पदाधिकारी बैठक बसे पनि निर्णयमा पुग्न नसकेको हो। अब उक्त विषयमा केन्द्रीय कार्यकारिणी समितिले निर्णय गर्ने भएको छ।
'पदाधिकारी बैठकमा छलफल गरिरहेका छौँ। तर, पदाधिकारी बैठकले मात्रै यो विषयमा निर्णय गर्न सक्दैन, निर्णय गर्ने अधिकार पनि छैन,’ जसपाका वरिष्ठ नेता राजेन्द्र श्रेष्ठले भने,‘मंगलबारदेखि नयाँ वर्ष लागिहाल्यो, थप छलफल गर्ने सम्भावना छैन। नयाँ वर्षपछि पदाधिकारी बैठकमा एउटा 'अन्डरस्ट्यान्डिङ' बन्छ र कार्यकारिणी समितिले निर्णय गर्छ।’
गत शुक्रबार कांग्रेस सभापति शेरबहादुर देउवाले माओवादी केन्द्र र जसपाका शीर्ष नेताहरुलाई बूढानीलकण्ठमा बोलाएर कांग्रेसको नेतृत्वमा संयुक्त सरकार बनाउने प्रस्ताव राखेका थिए। उक्त बैठकमा माओवादी केन्द्रका अध्यक्ष पुष्पकमल दाहाल‘प्रचण्ड’सहित नारायणकाजी श्रेष्ठ, देव गुरुङलगायत नेता सहभागी थिए। त्यसैगरी जसपाका अध्यक्ष महन्थ ठाकुर, उपेन्द्र यादवलगायत नेताहरु देउवा निवासमा भएको उक्त बैठकमा सहभागी भएका थिए।
तीन दलीय बैठकपछि प्रचण्डले संयुक्त सरकारका विषयमा माओवादी सकारात्मक भएको बताए पनि जसपा नेताहरुले पदाधिकारी बैठक बसेर यस विषयमा निर्णय गर्ने बताएका थिए। देउवाले संयुक्त सरकारको प्रस्ताव गरेको चार दिन बितिसक्दा पनि जसपाले निर्णय गर्न नसकेको हो।
जसपाको कार्यकारिणी समिति ५२ सदस्यीय रहेकोमा रेशम चौधरी जेलमा हुँदा हाल ५१ सदस्यीय रहेको छ। उक्त समितिलाई कार्यकारी अधिकारसहितको निकायको रुपमा पार्टीको विधानमा व्यवस्था गरिएको छ।
यसअघि चैत ५ गतेको जसपा कार्यकारिणी समिति बैठक ओली सरकारलाई समर्थन गर्ने वा नगर्ने विषयमा विवाद हुँदा स्थगित भएको थियो। अहिले पनि उक्त विवाद यथावत् रहेको छ।
जसपाका अध्यक्ष ठाकुर, वरिष्ठ नेता राजेन्द्र महतोलगायत आफ्ना मागलाई केन्द्रमा राखेर ओली सरकारलाई समर्थन गरेर जानुपर्ने पक्षमा छन्। अर्का अध्यक्ष उपेन्द्र यादव, संघीय परिषद् अध्यक्ष बाबुराम भट्टराई, वरिष्ठ नेता अशोक राई, राजेन्द्र श्रेष्ठलगायत नेताहरु ओलीविरुद्ध बन्ने संयुक्त सरकारमा सहभागी हुनुपर्ने पक्षमा छन्। पार्टीमा दुई लाइन संघर्ष चलिरहेकाले जसपा कुनै निर्णय नगरी बीचधारमै बसेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774336446-1774337130.jpeg)
-1764146706.png)
