काठमाडौं- प्रधानमन्त्री केपी शर्मा ओलीले उद्योगी व्यवसायीले थैलोमा पैसा हालेर चन्दा बुझाउनुपर्ने अवस्था नरहेकाे भन्दै नेपालमा लगानी गर्ने वातावरण बन्दै गएकाे बताएका छन्। नेपाल उद्योग वाणिज्य महासंघ को ५५ औं वार्षिक साधारण सभालाई सम्बाेधन गर्दै प्रधानमन्त्री ओलीले विगतमा जस्तो उद्योगी व्यवसायीलाई धम्काउने, तर्साउने तथा जबर्जस्ती चन्दा असुल्ने जस्ता गतिविधि अहिले नरहेको बताए।
‘उद्योगका लागि चाहिने शान्तिपूर्ण वातावरण अहिले छ। अब नेपालका हिंसा छैन, चन्दा असुली छैन,’ उनले भने, ‘विगतमा अकारण मारिने, अपहरणमा पर्ने, तर्साउने जस्ता गतिविधि थिए। यसको डरले तपाईहरुले थैलोमा भरेर पैसा चन्दा दिनुभयो। तर अहिले हामी शान्तिपूर्ण र भयरहित वातावरणमा छौं।’
महासंघले अबको एक दशकभित्र मुलुकको आर्थिक अवस्था कस्तो हुने भन्ने परिकल्पनासहित तयार पारेको ‘राष्ट्रिय आर्थिक रुपान्तरण २०३० पुस्तक’ (भिजन पेपर) लगानीको वातावरण तयार पार्नका लागि सहयोगी सिद्ध हुने उनले बताए।
‘तपाईहरुले पोलिसी त दिनुभयो ठिक छ। त्यो नीति पुरा गर्नका लागि सरकारले गर्नुपर्ने काम के हो भनेर बुँदागत रुपमा दिनुहोस्। सरकारले त्यो पुरा गर्छ,’ उनले भने। त्यस्तै व्यापार व्यवसायलाई सम्मानितसँगसँगै सुदृढ पेशाका रुपमा स्थापित गर्न सरकारले प्रयास गर्ने पनि उनले बताए।
‘तपाईहरुको नारा समृद्धिका लागि सम्मानित निजी क्षेत्रः समुन्नत नेपाल भन्ने रहेछ। सम्मानित सँगसँगै सुदृढ पनि बन्नुहोस्। बलियो बन्नुहोस्,’ उनले भने, ‘तपाईहरुको पीडा झल्किन्छ यो सम्मानित भन्ने शब्दमा। तपाईहरुले कति अपमानित महशुस गर्नु भएको रहेछ भन्ने यसमा झल्किन्छ। देशको विकासमा योगदान पुर्याएको व्यक्ति सम्मानित नहुने भन्ने सवाल नै रहँदैन।’
पछिल्ला वर्षहरुमा विकास निर्माण, लगानी तथा व्यापारका क्षेत्रमा सुधार हुँदै गएको पनि उनले दावी गरे। आयात नियन्त्रण र निर्यातमा बढोत्तरी भएर वैदेशिक व्यापार सन्तुलनको प्रयास गरिएको उनले बताए।
‘वैदेशिक व्यापार सन्तुलनतर्फ फर्काउने कोशिस गरेका छौं र त्यो कोशिस सफल भएको छ। अब व्यापार घाटा लगातार बढ्दो अवस्थाबाट नियन्त्रण हुन्छ,’ उनले भने। त्यस्तै उद्योगी व्यवसायीहरुका समस्या सुन्न सरकार सधै तयार रहेको र समस्या भए मिलेर समाधान गर्नुपर्ने पनि उनले बताए।
‘केहि समस्या छ भने हामी सँगै बसेर समाधान गरौं। कुनै नियम कानून संशोधन गर्न आवश्यक छ। केहि पूरा हुँदै गएका छन्। मजदुर र रोजगारदाता, रोजगारदाता र सरकार र सरकार र मजदुरबीच सन्तुलिन नीति लिएर काम गरौं,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
