फाइल तस्बिर
काठमाडाैं- नेपाली कांग्रेसका वरिष्ठ नेता रामचन्द्र पौडेलले वर्तमान सरकारको विकल्प खोज्नुपर्ने बताएका छन्। नेपाल निजामती कर्मचारी युनियन (संघ) केन्द्रीय कार्यसमितिद्वारा काठमाडौंमा आयोजित राष्ट्रिय भेलामा बोल्दै वरिष्ठ नेता पौडेलले वर्तमान सरकार निरङ्कुशतातिर बढिरहेकोले विकल्प खोज्नुपर्ने बताएका हुन्।
प्रधानमन्त्रीले संसद्को रोस्टम प्रयोग गर्न नचाहेको अवस्थामा प्रतिपक्षी दलले कसरी रोस्टमको प्रयोग गर्यो भन्ने कुराको लेखाजोखा इतिहासमा हुने भएकाले कांग्रेसले सरकरको विकल्प खोज्नुपर्ने बताए। त्यसका लागि उदार बनेर अथवा सम्झौता गरेर भए पनि सरकार बदल्न इमान्दार प्रयत्न गर्नुपर्ने उनले बताए।
'संसद्को रोस्टमलाई प्रधानमन्त्रीले प्रयोग गर्न नचाहँदा प्रतिपक्षी दलले रोस्टम प्रयोग गर्यो कि गरेन, कसरी गर्यो यसको पनि लेखाजोखा इतिहासमा हुनेछ। त्यसो भएको हुनाले अहिले यहाँ चुनाव-चुनावमात्रै भनेर सुख पाइँदैन। हामीले अहिले निरङ्कुशतातिर बढिरहेको यो सत्ताको विकल्प खोज्नुपर्छ,' उनले भने, 'विकल्पको लागि हामी उदार बनेर जसरी विकल्प आउँछ त्यसरी हामीले सम्झौता गरेर अरु पार्टीहरुसँग मिलेर हामीले बदल्ने काममा इमान्दार प्रयत्न गर्नुपर्छ।'
नेता पौडेलले विगतमा कांग्रेसले एउटा अवसर छुटाएको उल्लेख गर्दै अहिले पनि सरकार नबदल्ने हो भने भविष्यमा टाउको समातेर रुनुको विकल्प नहुने दाबी गरे। त्यसैले चुनाव-चुनाव भनेर बस्न नहुने उनको भनाइ थियो।
उनले भने, ‘अब एउटा चान्स त हामीले अस्तिनै मिस गरिसकेका छौं। जुनबेला एमाले र माओवादी केन्द्र बनेका थिएनन्, त्यो बेलामा जोखाना हेर्दा-हेर्दै एउटा चान्स मिस भएको छ। यतिमात्रै भन्छु- जोखाना फेरि पनि हेरेर यो चान्स मिस गर्ने अनि पछि टाउको समातेर रुने यो कुरा हुँदैन। चुनाव-चुनाव-चुनाव... यो सबैले भन्छन्। केपी ओलीको पनि नारा चुनावै हो हाम्रा साथीहरुको पनि नारा त्यही हो। आज देश त्यसैमा विभाजित छ।’
पार्टीको अधिवेशन सम्पन्न हुन नपाएको स्थितिमा चुनवमा जाँदा कांग्रेस नै नरहने स्थिति आउन सक्नेतर्फ अहिले नै सचेत बन्नुपर्ने पनि वरिष्ठ नेता पौडेलले बताए। अहिलेको सरकारको कारण लोकतन्त्र बच्ने अवस्थामा नरहेकोले लोकतन्त्र बचाउनको लागि पनि कांग्रेसले आफूलाई बचाउनुपर्नेमा उनले जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
