काठमाडौं- संविधानसभा सभासदको हैसियतमा प्राप्त भएको कूटनीतिक राहदानी (रातो पासपोर्ट) दुरुपयोग मुद्दाको पेसी २०औं पटक पनि सरेको छ। मंगलबार न्यायाधीशद्वय दीपककुमार कार्की र मनोज शर्माको इजलासमा पेसी रहेको थियो। तर सर्वोच्च अदालतमा पूर्वन्यायाधीश ईन्द्रराज पाण्डेको निधन भएपछि सबै इजलास स्थगित भएकाले यो मुद्दाको सुनुवाई पनि सरेको छ।
१० महिनापछि उक्त मुद्दाको सुनुवाइ पेसी तोकिने मौका पाएपनि सुनुवाइ भने हुन सकेन। यसअघि २०७६ चैत ४ गते न्यायाधीशहरू सपना प्रधान मल्ल र हरिप्रसाद फुयाँलको इजलासमा रहेको मुद्दा हेर्न नमिल्ने हुँदै सुनुवाइ सरेको थियो। देशमा कोरोना भाइरसको संक्रमणका कारण लकडाउन भएकाले मुद्दाको सुनुवाइ पनि हुन नसकेको हो। यो मुद्दा यसअघि १९ पटक पेसी तोकिँदै सुनुवाइ सर्दै आएको छ।
विशेष अदालतबाट फैसला भएपछि सर्वोच्च अदालतमा दायर भएको ४ वर्षदेखि एकपछि अर्को इजलासमा पेसी चढ्दै थन्कँदै आएको छ। हालसम्म यो मुद्दा ३२ न्यायाधीशको इजलासमा पेसी तोकिइसकेको छ। मुद्दा फैसलाका लागि अंग पुगिसक्दा पनि सुनुवाइ सर्दै आएको छ।
न्यायाधीशहरू तेजबहादुर केसी, हरिप्रसाद फुयाँल, हरिकृष्ण कार्की, ईश्वरप्रसाद खतिवडा र प्रकाशमानसिंह राउतले यो मुद्दा हेर्न मिल्दैन।
विशेष अदालतको फैसलाविरुद्ध अख्तियार दुरुपयोग अनुसन्धान आयोगले २०७३ जेठ ९ गते सर्वोच्चमा पुनरावेदन गरेको थियो। विशेष अदालतले पूर्वसभासदहरू शिवपूजन राय, विश्वनाथप्रसाद यादव र गायत्री साहलाई दोषी ठहर गरेको थियो भने अन्यलाई सफाइ दिएको थियो।
विशेषको उक्त फैसला त्रुटिपूर्ण रहेको भन्दै अख्तियारले विघटित प्रतिनिधि सभाका सांसद नारदमुनि रानासमेत सबैविरुद्ध अभियोग पुष्टि हुनुपर्ने दाबी गर्दै पुनरावेदन गरेको थियो। उनीहरूलाई विशेषले कूटनीतिक राहदानी दुरुपयोग गरेको ठहर गरी जनही तीन महिना कैद र १५ हजार रुपैयाँ जरिवाना गर्ने फैसला गरेको थियो।
पूर्वसभासद यादवद्वय र साहको कूटनीतिक राहदानीमा तस्बिर फेरेर अर्कै व्यक्ति अस्ट्रेलिया गएको भनी दिइएको उजुरीका आधारमा अख्तियार दुरुपयोग अनुसन्धान आयोगले गत साल भदौ २६ गते अदालतमा मुद्दा दायर गरेको थियो। पूर्वसभासद शिवपूजनको राहदानीमा केदारनाथ शर्मा भन्ने व्यक्ति अस्ट्रेलिया गएको आरोप लगाइएको थियो।
उक्त राहदानीमा सभासदको तस्बिर हेरफेर गर्नका लागि देवेन्द्र पौडेल, मनोज कार्की, गोपाल बानियाँ, दिलबहादुर घर्ती र सन्तोषराज उप्रेतीले सहयोग गरेको आरोप लागेको छ। साथै पूर्वसभासद विश्वनाथप्रसाद र साहको राहदानीबाट पृथ्वी छन्त्याल नाम गरेका व्यक्ति अस्ट्रेलिया गएको भन्ने आरोप लगाइएको थियो।
सो मुद्दामा अस्ट्रेलिया गएका छन्त्याललाई एक वर्ष ६ महिना कैद गरी ७५ हजार रुपैयाँ जरिवाना गर्ने फैसला भएको छ। अख्तियारले संविधानसभा सदस्य रहेको हैसियतले प्राप्त गरेको कूटनीतिक राहदानी दुरुपयोग गरी अनधिकृत व्यक्तिलाई विदेश पठाई भ्रष्टाचार गरेको अभियोगमा ४ जना पूर्वसभासद, अध्यागमन कार्यालयका तत्कालीन प्रमुख र केही बिचौलियाहरू विरुद्ध मुद्दा दायर गरेको थियो।
उनीहरूको राहदानीमा रहेको फोटो उप्काएर अन्य व्यक्तिको टाँसी अस्ट्रेलिया पठाएको र सो कार्यमा सहयोग गरेको मुद्दामा अध्यागमन कार्यालयका कर्मचारीहरूसमेत तानिएका थिए। यादव र साहले १ करोड ६२ लाख रुपैयाँमा आफ्नो नाममा जारी भएको राहदानी बिक्री गरी सार्वजनिक पदको दुरुपयोग गरेको भन्दै सोही बराबरको बिगो र जरिवाना असुल हुनुपर्ने दाबी अख्तियारको थियो।
अख्तियारले २०६८ वैशाख २८ गते विशेष अदालतमा मुद्दा दायर गरेको थियो। उनीहरूलाई सहयोग गर्ने कार्यमा अध्यागमन कार्यालयका तत्कालीन प्रमुख खडानन्द ढकाल (प्रतीक), रमेश लम्साल, देवीदत्त खत्री, ईन्द्रकुमार सुनुवार र श्यामबहादुर भण्डारीको संलग्नता रहेको भन्दै अख्तियारले उनीहरूलाई समेत भ्रष्टाचारको मुद्दा दायर गरेको थियो।
अख्तियारले नारदमुनि राना र शिवपूजन रायलाई जनही २२-२२ लाख रुपैयाँमा राहदानी बिक्री गरेको भन्दै सोही बराबरको बिगो र जरिवाना असुल हुनुपर्ने माग गरेको थियो। त्यस्तै राहदानीको फोटो परिवर्तन गर्नेलगायतका कार्यमा सहयोग गरी बिचौलीयाको भूमिका निभाएको अभियोगमा डिलबहादुर घर्ती, गोपाल बानियाँ, मनोज कार्की, देवेन्द्र पौडेल र सन्तोषराज उप्रेतीविरुद्ध समेत भ्रष्टाचारको मुद्दा अख्तियारले दायर गरेको थियो।
अख्तियारको अभियोगपत्रमा भ्रष्टाचार निवारण ऐन २०५९ अन्तर्गत सबै प्रतिवादीसँग बिगो बराबर जरिवाना र ८ देखि १० वर्षसम्म कैद हुनुपर्ने माग गरेको थियो।
४ वर्षदेखि सधैं स्थगित
२०७३ सालमा दर्ता भएको उक्त मुद्दाको दोस्रो सुनुवाइ हुन सकेको छैन। मुद्दामा पहिलो सुनुवाइ २०७५ चैत १३ गते भएको थियो।
न्यायाधीशद्वय ईश्वर खतिवडा र तेजबहादुर केसीको इजलासले विपक्षीहरुलाई झिकाउने आदेश गरेको थियो। यसअघि न्यायाधीश हरिकृष्ण कार्की र विश्वम्भरप्रसाद श्रेष्ठको इजलासमा पेसी थियो।
उक्त मुद्दामा कार्कीले कानुन व्यवसायी हुँदा बहस गरेकाले हेर्न नमिल्ने भन्दै स्थगित भएको थियो। यसरी विचाराधीन हुने मुद्दामध्ये नेकपाका सांसद नारदमुनि रानाको पनि हो। उनी कैलाली ५ बाट प्रत्यक्षतर्फ विजयी भएका थिए।
अहिले प्रतिनिधि सभा विघटन भएर उनी पूर्वसांसद भइसक्दा पनि उक्त मुद्दा पेसी चढ्ने अनि सुनुवाई नहुने हुँदै आएको छ। उक्त मुद्दामा सरकारी पक्ष र निवेदकको गरी २५ थान निवेदन रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
