काठमाडौं- नेपाल इन्फ्रास्ट्रक्चर बैंक प्राथमिक शेयर निष्काशन हुनु अगाडि दैनिक २० हजार भन्दा धेरै डिम्याट खाता खुल्न थालेको छ। बैंकले माघ दुई गतेदेखि ८ अर्ब रुपैयाँको प्राथमिक शेयर निष्काशन गर्दै छ। पुस महिनामा मात्रै एक लाख ८५ हजार वटा डिम्याट खाता खुलेको सिडिएससी एण्ड क्लियरिङका प्रवक्ता सुरेश न्यौपानेले जानकारी दिए।
अहिले डिम्याट खाताको सेवा प्रदान गर्ने ७६ वटा संस्था रहेका छन्। सम्पुर्ण संस्थाहरुमा नयाँ डिम्याट खाता खोल्नेको लाम लाग्ने गरेको छ। बैंकले निष्काशन गरेको प्राथमिक शेयरमा सबैले अनिवार्य शेयर पाउन सक्ने भन्दै लगानीकर्ताको आकर्षण बढेको हो।
बैंकले ८ करोड कित्तामध्ये कर्मचारीका लागि एक लाख ६० हजार कित्ता सुरक्षित गरेको छ। त्यस्तै म्युचुअल फण्डहरुलाई ५ प्रतिशत अर्थात् ४० लाख कित्ता बिक्री गरिसकेको छ। कर्मचारी र म्युचुअल फण्डलाई बिक्री गरेर बाँकी रहेको ७ करोड ५८ लाख ४० हजार कित्ता सर्वसाधारणका लागि बिक्री गर्दैछ।
यसअघि प्रभु लाइफले आइपिओ निष्काशन गर्दा १० लाख ८५ हजारको आवेदन परेको थियो। चन्द्रगिरीले निष्काशन गरिरहेको प्राथमिक शेयरमा सोमबारसम्ममा ११ लाख जनाको आवेदन परिसकेको छ। यसै कम्तिमा पनि १२ लाख जनाको आवेदन पर्ने देखिएको छ। यहि हिसावले नयाँ डिम्याट खाता खोल्नेको संख्या बढ्दै जाने हो भने १५ लाख जनासम्मको आवेदन पर्ने देखिएको न्यौपाने बताउछन्।
हालसम्म २४ लाख ५१ हजार वटा डिम्याट खाता खुलेका छन्। यसमा सक्रिय खाता भने ११/१२ लाख वटा मात्रै रहेका छन्। एउटै व्यक्तिको दुई वटाभन्दा धेरै डिम्याट खाता भएकाले पनि सक्रिय खाता कम देखिएको हो।
लगानीकर्ताले मेरो शेयरको अनलाइन एप्लिकेसनका साथै आस्वा सुविधा प्रदान गर्ने सम्पुर्ण बैंक तथा वित्तीय संस्थाहरुबाट आवेदन दिन सक्नेछन्।
प्राथमिक शेयरमा आवेदन दिदा मेरो शेयरको अनलाइन एप्लिकेसन ह्याङ हुने समस्या भने समाधान नहुने भएको छ।
हाल मेरो शेयरको एप्लिकेसन अधिकतम २५ हजारसम्मले चलाउदा ह्याङ हुँदैन। तर २५ हजार भन्दा धेरैले मेरो शेयरको एप्लिकेसन चलाउदा सिस्टम नै ह्याङ हुने गरेको छ। कुनै पनि कम्पनीले प्राथमिक शेयर निष्काशन गरेको पहिलो दिनको सुरुवाति समयमा लाख भन्दा धेरै लगानीकर्ताले आवेदन दिन खोज्दा समस्या आउने गरेको न्यौपानेले जानकारी दिए। प्राथमिक शेयर खुल्ने वित्तीकै आवेदन दिनका लागि नहतारिन न्यौपानेको सुझाव छ। कम्पनीको प्राथमिक शेयर चार दिनसम्म खुल्ने भएकाले नहतारिकन खुलाउने हो भने समस्या नभएको उनको तर्क छ।
सिडिएससीले नेपाल इन्फास्ट्रक्चरको प्राथमिक शेयरलाई केन्द्रित गर्दै नेपाल सरकारको दुईवटा सर्भर थप गर्ने भएको छ। यसले कम्तिमा पनि एकै पटकमा ३५ हजारसम्मले आवेदन दिन सक्ने न्यौपानेले जानकारी दिए।
सधैं प्राथमिक शेयरको निष्काशन नहुने भएकाले सर्भरको लागि करोडौं रुपैयाँ खर्च गर्न नसकिएको सिडिएससीको तर्क छ। पछिल्लो समय नयाँ बीमा कम्पनीका कारण प्राथमिक शेयर निष्काशन गर्नेको संख्या बढेको छ। तर सधै प्राथमिक शेयर निष्काशनका लागि कम्पनी हुन्छन् भन्ने छैन। त्यसैले गर्दा केही दिनको लागि मात्रै काम गर्ने भन्दै सधैका लागि सर्भर राख्न नसकिएको सिडिएसीको राय छ। यसले सिडिएससीको खर्च त बच्ला तर लगानीकर्ताले पाउने दुःख भने घट्दैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
