काठमाडौं– सुरेशबाबु श्रेष्ठको पोखरा महानगरपालिका–५ जिरो किलोमा बुढीगण्डकी कन्ट्रक्शन एण्ड सप्लायर्स प्रालि र गण्डकी हार्डवयेर एण्ड सप्लायर्स व्यवसाय सञ्चालन गर्दै आएका छन्।
गत भदौ १ गते दिउँसो अन्दाजी २ बजेतिर बा २३ च ६६२१ नम्बरको उनको पसल अगाडि आएर रोकियो। श्रेष्ठको पसलमा पुगेका उनीहरुले परिचय दिए, मानबहादुर रोक्का, रञ्जिता भन्ने गीता सुवेदी, प्रेम लामा, नरबहादुर श्रेष्ठ र विकास सिंजाली।
उनीहरुले पिन्सु एकसपोर्ट प्रालि नामको कम्पनी दर्ता गरी ठेक्काको काम गर्दै आएको हार्डवेयर सञ्चालक श्रेष्ठलाई बताए। लमजुङको भोर्लेटारमा बाटो निर्माणको लागि ५० करोडको ठेक्का पाएको र त्यसका लागि धेरै नै हार्डवेयर चाहिएका उनीहरुले बताए।
‘ठूलैमात्रामा व्यापार गरिदिन्छौं भनी मलाई विश्वासमा पारे। मेरो पसलबाट पटक पटक गरी २३ लाख ७१ हजार ७ सय ६८ रुपैयाँ बराबरको फलामको छड किने‚’ श्रेष्ठले कास्की जिल्ला अदालतमा दिएको बयानमा उल्लेख छ, ‘२३ लाख भन्दा बढीको सामान किने पनि त्यसबेला १ लाख ४ हजार ४ सय ६ रुपैयाँ नगद र बाँकी रकमको चेक दिए।’
पिन्सु एकपोर्ट प्रालिको नाममा रहेको महालक्ष्मी विकास बैंकको चेक दिए। चेक साट्दा खातामा पर्याप्त रकम नभएको नभएको कारण चेक सटही भएन।
त्यसपछि ठगिएको गन्ध पाएका श्रेष्ठले प्रहरीकोमा ठगीको कसुरमा जाहेरी दिएका थिए।
लमजुङ भनेर बनेपामा झारियो छड
अनुसन्धानको क्रममा गीता सुवेदीसहितका व्यक्तिले झुक्यानमा पारेर ठगी गरेको पाइएको छ। लमजुङको भोर्लेटारमा बाटो निमार्णका लागि भनेर खरिद गरिएका छड रातारात ट्रकमा लोड गरेर बनेपामा झारिएको अनुसन्धानबाट खुलेको थियो।
ना ३ ख ५०७० नम्बरको ट्रकका चालक रामबहादुर थापालाई भनेर २३ हजार भाडा दिएर बनेपामा उक्त छड झारिएको पाइएपछि उनीहरुको ठगको कर्तुत बाहिरिएको हो।
सुरेशबाबुले गुरु गणेश हार्डवेयर सञ्चालक राजकुमार प्रजापतिसँगको मिलेमतोमा ठगी गरी उनकै हार्डवयेरमा समान झारेको भन्दै ठगीको उजुरी दिएका थिए।
चेक दिएपछि खाता क्लोज
गीता सुवेदीले छडको रकम वापतको चेक दिएपछि खाता क्लोज समेत गरेको पाइएको छ। तर उनले बयानमा भने आफ्नो नामको चेक हराएकोले रद्द गर्न भनेर बैंकमा निवेदन दिएको बताएकी थिइन्।
‘म यहाँ नाम उल्लेख गरेका कसैलाई पनि चिन्दिन, मेरो कम्पनीको नामबाट जारी भएको चेकमा भएको सहीछाप मेरो होइन, उक्त चेकहरूमा को–कसले सहीछाप गरेका हुन् मलाई केही थाहा भएन‚’ अदालतमा गीताले इनकारी बयान दिइन्।
आफ्नो सहीछापबाट जारी भएको चेक हराएकोले रद्द गरिपाऊँ महालक्ष्मी विकास बैंक न्यूरोड, काठमाडौमा निवेदन दिएको र उक्त चेक मैल नकाटेको कसले काट्यो खोजी कारबाही गरी पाउँ भन्दै महानगरीय प्रहरी कार्यालय काठमाडौं समेत निवेदन दिएको उनले बयान दिएकी थिइन्।
तर अनुसन्धानका क्रममा भने ठगी गर्ने नियतले उनले चेक दिएपछि खाता क्लोज गरेको पाइएको थियो। त्यस्तै जाहेरीमा आफ्नो नाम गीता सुवेदी लेखिएको तर आफू गीता पुन भएको उल्लेख गर्दै छुटकारा पाउनुपर्ने तर्क राखेकी थिइन्।
उनीसँगै हार्डवेयर किन्न गाडीमा गएका भनिएकाहरुको भने ठगीमा कुनै भूमिका अनुसन्धानबाट खुलेन।
प्रमाण भन्छ- ठगीका योजनाकार गीता हुन्
अदालतमा गीताकुमारीले इन्कारी बयान दिए पनि विभिन्न प्रमाणले भने उनी ठगीको योजनाकार भएको देखाएको छ।
गीताकुमारीले सञ्चालन गरेको प्रिन्सु एक्सपोर्ट इम्पोर्टको नाममा महालक्ष्मी विकास बैङ्कको चेकहरू जाहेरवालालाई दिएको भनी प्रहरीसमक्ष उनले बयान गरेकी थिइन्।
मिसिल संलग्न चेकहरू हेर्दा उक्त चेकहरू गीताकुमारी पुनले सञ्चालन गरेको प्रिन्सु एक्सपोर्ट इम्पोर्टको नामबाटै जारी गरेको पाइउको थियो। बरामदी तथा खानतलासी मुचुल्का, घटनाविवरण कागजसमेतका मिसिल संलग्न सम्पूर्ण कागज प्रमाणहरूको आधारमा गीताले ठगी गरेको पाइएको जिल्ला अदालत कास्कीका न्यायाधीश श्रीकृष्ण भट्टराईको इजलासले ठहर गर्यो।
अदालतले उनलाई ठगी भएको रकम बराबरको झण्डै २४ लाख रुपैयाँ धरौटीमा रिहा गर्ने आदेश दिएको छ।
‘फौजदारी कार्यविधि संहिता, २०७४ को दफा ६८ को अवस्था विद्यमानता देखिँदा पछि प्रमाण बुझ्दै जाँदा ठहरेबमोजिम हुनेगरी हाललाई यी प्रतिवादी गीताकुमारी पुनबाट २३ लाख ७१ हजार ७ सय ६८ धरौटी लिई रिहा गरी तारेखमा राख्नू। धरौटी तिर्न नसकेको अवस्थामा सिधा खान पाउने गरी कारागार कार्यालय कास्की पठाइदिनू‚’ अदालतको आदेशमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
