काठमाडौँ- पूर्व सभामुखहरूले राष्ट्रियसभाको हिउँदे अधिवेशन ८ दिनमा नै अन्त्य गरेर जनताको मुख थुन्ने काम भएको बताएका छन्। प्रतिनिधिसभा नभएको अवस्थामा जनताको आवाज मुखरित हुने राष्ट्रियसभाको अन्त्य गर्नु उचित नभएको पूर्वसभामुखहरूले टिप्पणी गरेका हुन्।
प्रधानमन्त्री केपी ओलीले आइतबार आकस्मिक मन्त्रिपरिषद् बैठक बोलाई हिउँदे अधिवेशन अन्त्य गर्न राष्ट्रपतिलाई सिफारिस गरेका थिए। मन्त्रिपरिषद्ले सिफारिस गरेको २४ घण्टा बित्न नपाउँदै राष्ट्रपतिले संसद्को हिँउँदे अधिवेशन अन्त्य गरेकी हुन्।
पूर्व सभामुख दमननाथ ढुंगाना, तारानाथ रानाभाट र ओन्सरी घर्ती मगरले पार्टीभित्रको अन्तरविरोधले राष्ट्रियसभा अन्त्य गर्नु गलत भएको टिप्पणी गरेका छन्।
राष्ट्रिय सभालाई पाका अनुभवी र विज्ञहरुको सभा भनिएपनि मनोमानीढंगले अन्त्य गर्नु ठिक नभएको पूर्व सभामुख दमननाथ ढुंगानाले बताए। ‘प्रतिनिधिसभा र राष्ट्रियसभाको आ–आफ्नै महत्त्व छ। राष्ट्रियसभालाई पाका, विज्ञ र अनुभवीहरूको सभा मानिन्छ। प्रतिनिधिसभा विघटन गरिएको अवस्थामा राष्ट्रियसभाको झनमहत्व बढ्दै गएको थियो,’ नेपाल लाईभसंग कुरा गर्दै ढुंगानाले भने, ‘राष्ट्रियसभाको काम सीमित भएपनि जनताको आवाज मुखरित गर्ने राष्ट्रियस्तरको एउटा मात्रै सभा थियो। त्यसको पनि अन्त्य गरिनु ठिक कुनै हालतमा राम्रो मान्न सकिँदैन।’
राष्ट्रिय सभाको हिउँदे अधिवेसन सुरु भएको हप्ता दिन भित्रै अन्त्य गर्नु सान्दर्भिक नदेखिएको ढुंगानाले तर्क गरे। सरकारले सबै समस्याहरु सडकमै पोखियोस् भन्ने चाहेको हो?,' भन्दै ढुंगानाले प्रतिप्रश्न गरे।
‘प्रजातन्त्रमा जुनसुकै असन्तुष्टि सभामै पोखिनु राम्रो मानिन्छ। अब त्यो सभा नभएको स्थितिमा सडकमा पोखिने निश्चित छ,’ आक्रोश व्यक्त गर्दै ढुंगानाले भने, ‘सरकारले अहिलेको परिवर्तन र संविधानलाई अन्त कतै लान खोजेको हो कि भन्ने प्रशस्त आशंका पैदा गराएको छ।’
सरकारले प्रतिनिधिसभा र राष्ट्रियसभा अन्त्य गरेर राजनीतिलाई अर्कै मोडमा लैजान खोजेको ढुंगानाको आरोप छ। अब दुवै सभाका सांसद्हरू परिवर्तन र संविधानका पक्षमा उभिनुपर्ने उनले सुझाव दिए।
000
यस्तै पूर्वसभामुख ओनसरी घर्तीले प्रधानमन्त्रीले एकपछि अर्कोे गर्दै जनताको मुख थुन्ने काम गरेको टिप्पणी गरिन्। सडक र सदनमा सरकारको आलोचना बढ्दै गएपछि सहन नसकेर राष्ट्रियसभाको हिउँदे अधिवेशन अन्त्य गर्न प्रधानमन्त्रीले सिफारिस गरेको बताइन्।
‘प्रतिनिधिसभा नभएपछि राष्ट्रियसभामा जीवन्त बहस भइराखेको थियो। त्यो मूलतः जनताको पक्षमा थियो। प्रधानमन्त्रीले त्यसलाई पनि फेस गर्न सक्नुभएन। उहाँहरु रक्षात्मक हुनुभयो,’ पूर्वसभामुख घर्तीले भनिन्, ‘अब उहाँहरुले चाहेर पनि सक्नुहुन्न। सत्य कुरा जहाँबाट भएपनि बाहिर आएरै छाड्छ। सत्य भनेको सत्य नै हुन्छ। बहसबाट भाग्न कसैलाई छुट छैन। उहाँहरु बहसबाट भाग्नुभयो।’
जनताले सत्य कुरा थाहा पाउँछन् भनेरै प्रधानमन्त्रीले राष्ट्रियसभाको अधिवेशन अन्त्य गरेको घर्तीको भनाइ छ। जनताका जनजीविकाका समस्या सदनमा पोखिएको अवस्थामा सरकारले सुन्नै नचाहेको प्रष्टै भएको घर्तीको दाबी छ।
‘प्रधानमन्त्रीले राष्ट्रियसभाको हिउँदे अधिवेशन किन, खोल्नुभयो?,’ घर्तीले प्रश्न गर्दै भनिन्, ‘के भएन र अधिवेशन अन्त्य गर्नुभयो? सत्य कुरा जनताले थाहा पाउँने भएर हो? सत्य कुरा जनताले थाहा पाए के हुन्छ? उहाँहरुलाई खतरा हुने भयो हैन त?’
000
पूर्व सभामुख तारानाथ रानाभाटले राष्ट्रियसभामा बिजनेस नहुने र एकहोरो विरोध मात्रै हुने स्थिति देखिएपछि प्रधानमन्त्रीले बन्द गरेको हुन सक्ने आँकलन गरे। सडक र सरकारमा नै एकै पार्टी भएकाले राष्ट्रिय सभा अन्त्य हुने अवस्था आएको रानाभाटले बताए।
राष्ट्रियसभामा बिजनेस नभएको अवस्थामा अन्त्य हुनु स्वभाविकै हुने बताउँदै रानाभाटले पार्टीभित्रको झगडाका कारण सदनको अधिवेशन नै अन्त्य हुुनु ठिक नभएको तर्क गरे। अब दुवै सभा नभएको अवस्थामा सबै विरोध सडकमा पुग्ने रानाभाटले बताए।
सरकारले गत पुस १७ गते राष्ट्रियसभाको हिउँदे अधिवेशन बोलाउने निर्णय गरेको थियो। राष्ट्रियसभाका चार बैठक मात्र हुने बित्तिकै मन्त्रिपरिषद्ले अधिवेशन अन्त्य गर्ने सिफारिस गर्नु उचित नभएको उनको तर्क छ।
राष्ट्रियसभा चलेलगत्तै बैठकमा प्रतिनिधिसभा विघटन र सरकारका कामकारवाहीका विषयमा निरन्तर विरोध हुदैँ आएको थियो। संसद्को अधिवेशन अन्त्यपछि विरोधका सबै कार्यक्रम सडकमा नै सीमित भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
