काठमाडौं- तत्कालीन् प्रधानमन्त्री शेरबहादुर देउवाले २०५७ सालमा प्रतिनिधिसभा विघटनको सिफारिस गर्ने निर्णय मन्त्रिपरिषदको बैठकबाट गराएपछि तीनजना मन्त्रीले पदबाट राजीनामा दिए।
राजीनामा दिनेमध्ये थिए तत्कालीन् अर्थमन्त्री डा रामशरण महत, शिक्षामन्त्री आमोदप्रसाद उपाध्याय र महिला, बालबालिका तथा समाजकल्याणमन्त्री राजेन्द्र खरेल। नेपाल लाइभले त्यतिबेलाको अवस्था र मन्त्रीहरूले राजीनामा दिनुको कारणका विषयमा पूर्वअर्थमन्त्री महतसँग कुराकानी गरेको छ।
महतले तत्कालीन अवस्था यसरी सम्झिए-
तत्कालीन् अवस्थामा मन्त्रिपरिषदमा कुनै विस्तृत छलफल र तयारीविना प्रधानमन्त्रीले संसद विघटनको सिफारिस गर्ने प्रस्ताव ल्याउनु भएको थियो। हामीले त्यसमा विरोध जनायौँ। त्यतिबेला माओवादीको हिंसात्मक द्वन्द्व चलिरहेका कारण चुनाव हुन संभव थिएन। अर्कोतर्फ स्थानीय निकाय पनि जनप्रतिनिधिविहीन थिए।
मन्त्रिपरिषदमा कुनै सल्लाहविना नै निर्णय गराउने र अर्कोतर्फ चुनाव पनि नहुने अवस्था आउने स्थिति देखापर्यो। त्यस अवस्थामा राजाले सत्ता लिन सक्छन् र लोकतन्त्र संकटमा पर्छ भन्ने हाम्रो बुझाइ रह्यो। त्यसैकारण हामी तीनजनाले राजीनामा दिने निर्णय गर्यौँ। नभन्दै ४ महिनापछि अवस्था त्यस्तै भयो।
हामीले जे जे खतरा देख्यौँ, त्यही अवस्था एकपछि अर्को गर्दै देखा पर्न थाल्यो। चुनाव हुन सकेन, सत्ता राजाको हातमा गयो। लोकतन्त्रको हरण भयो। लोकतन्त्र फर्काउन हामीले ठूलो संघर्ष गर्नुपर्यो।
अहिले अवस्था फरक छ। तर चरित्र एउटै देखियो। एकातिर कोभिडको संकट छ, अर्कोतर्फ भ्याक्सिन कसरी भित्र्याउने भन्ने चिन्ता छ। तर सत्तारुढ दलको किचलोका कारण संसद विघटन गरिएको छ। अहिले संवैधानिक व्यवस्थाको विपरित हुने गरी प्रतिनिधिसभा विघटन गरिएको छ। संसदको अवधि २ वर्ष बाँकी रहँदा झण्डै दुई तिहाई बहुमत भएको सरकार काम गर्न नसकेर यस्तो अवस्था आयो।
सरकार बन्न नसकेको अवस्था भए फरक हुने थियो। तर अहिले त्यस्तो छैन। अहिलेको सरकारले अधिनायकवाद निम्त्याउने अवस्था आयो। संविधानमाथि अतिक्रमण गर्दै लोकतन्त्र खोसिएको छ। यो सर्वथा गलत छ।
अहिले चरम आर्थिक संकटबाट सरकार गुज्रिरहेको छ। यस्तो अवस्थामा अर्बौँ रूपैयाँ खर्चने कुरा ठीक होइन। तीन वर्षअघि पनि २५ अर्ब रूपैयाँभन्दा धेरै खर्च भएको थियो। अब पनि त्योभन्दा धेरै रकम खर्च हुन्छ। यस्तो अवस्थामा चुनावमा जानु आर्थिक हिसाबले पनि ठिक होइन। सत्ताको दुरुपयोग हुने संभावना पनि उस्तै रहन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
